О еже от священника проклятаго преданнаго не подобает причащатися

Доселе убо мы глаголахом о винах новодействуемаго причащения, коликое и каковое несходство имут, с винами святыя древлеправославныя церкве, святаго причащения. ихже ради вин новодействуемаго ныне причащения, хотящему наследником небеснаго царствия быти, всеми силами блюстително есть, во еже бы не быти причастну. ныне взыскателно, аще леть есть от проклятию преданнаго священника причащатися.

Глаголахом бо и прежде в первом догмате, в части третией, яко священник нынешния великороссйиския церкве есть под клятвою. обаче и ныне вкратце привоспомянем, чесо ради и како предается клятве темже слыши.

[1] Святая древлеправославная церковь, не крестящихся двема персты клятве предает, сице вопиющи [книга древлеписменная Никона Черныя горы]: [аще кто не знаменается двема персты, якоже и Христос, да будет проклят]. священник же нынешния великороссийския церкве, не изображает на себе крестнаго знамения двема перстома, но треми. убо есть проклят.

[2] Паки: священник нынешния великороссийския церкве, не благословляет двема перстома, по преданию Господню, но пятию странно. чесо ради от отец собора поместнаго, иже бе при царе Иоанне Васильевиче в Москве, клятве предается, сице взывающих [Стоглав, глава 31]: [Аще кто двема перстома не благословляет, якоже и Христос, да будет проклят]. Убо сей священник есть проклят.

[3] Паки святии отцы поместнаго собора, иже бе в честней патриархии святаго града Иеросалима, изменяющаго образ честнаго и животворящаго креста, клятве предают, сице восклицающе [Свиток многосложный]: [иже убо дерзнет кто инако веровати, или развращати что от законоположенных, или крестнаго образа. (ниже) аще святители суть, да извержени будут и прокляти]. Священник же нынешния великороссийския, сопротивно древлеправославней церкви умствует Христа распята на двочастнем кресте, имже крещение совершает, просфиры печатает, тем венча тем вся таинства совершает. убо есть проклят.

[4] Паки: святая древлеправославная церковь определила таинственное аггельския песни славославие в сугубем аллилуия воспевати, прилагающих же и отъемлющих, клятве предает, сице возглашающи [книга Кирилова, лист 371]: [Мы законы церковныя соблюдаем мы пределы отеческия храним. мы прилагающих нечто или отъемлющих от церкве проклинаем]. Священник убо нынешния великороссийския церкве сопротивно мудрствуя древлеправославныя церкве содержанию трегубо аллилия воспевает. убо есть проклят.

[5] К сим: святая соборная и апостольская церковь, всеми седмию вселенскими, и девятию поместными соборы, символ святыя веры, еже есть верую во единаго Бога, и прочая вся доконца, утвердила всем блюсти неподвижно ни отъемля, ни прилагая что. но цело сохраняти. сего ради и клятвами запечатле страшными аще что кто дерзнет пременити, или речение, или слог, или самую малую черту. якоже о том в самех правилех соборных видимо есть, сице правило втораго вселенскаго собора гремяще вопиет [1 правило]: [яже в Никеи святых отец вера твердо да держится и пребывает, реченная же и писанная на ню от еретик, и еретики да будут прокляти]. Но священник нынешния российския церкве, сопротивно древлеправославней церкви мудрствуя, и отъемлет и прилагает, и пременяет, якоже видети есть в символе о чесом явлено есть во втором пределе, во главе 2. убо есть проклят.

И что много исчисляю; не достанет ми лето повествующу, коликих и каковых ради новин клятве предается, словом рещи: всех ради, яже чрез церковнаго предания и учительства и воображения святых и приснопамятных отец новосотворенных и содеянных, анафеме предается.

И аще тмократне от всея восточныя церкве проклятию предается, како возможно от проклятаго, сиречь от отлученнаго от всех, от отторженнаго от церкве, от отчюжденнаго от Бога, причаститися действуемым от него тайнам. святый, Иоанн Никейский вопиет глаголя [в слове обличителном на армены]: [аще бо тмократицею прокляти бывше. и диаволу предани, како от анафем и от клятв благословение изыдет? или како от диавола духовное и святое дело совершается? от анафемы благословение не бывает, и от проклятия молитва не исходит, и от диавола Христово не совершается таинство]. И аще убо от анафемы благословение не бывает и от проклятия молитва не исходит. рцы ми кий дух на от него действуемыя тайны приходит? Благословением бо, еже рукою иерейскою бывает, и нашествием Святаго Духа прелагается хлеб, в тело, и вино в кровь Христову. Зде же, по сказанию Иоанна Никейскаго от анафемы благословение не бывает. но ниже Дух Святый на призвание его приходит. явственно о сем свидетельствует преподобный Максим Исповедник, сице глаголя [в житии его генваря, в 21 день]: [убо иже сами от себе прокляти суть и от поместнаго собора бывшаго в Риме извержены, и священства отчюждени. тии кая совершают таинства? и которыи дух приходит на тех]. Виждь ми, аще бо тогда единыя токмо ереси единоволницы, единою прокляти быша не ктому уже можаху совершити. аще и действоваху таинства, зане Дух Святый не прихождаше на ня. зде же толикократно проклят от всея восточныя и великороссийския церкве, то кий дух на от него действуемыя тайны приходит? благоявленно яко не приходит. аще же Дух Святый на проклятию преданнаго призывание не приходит. убо и не совершает действуемых от него таин. аще не совершает действуемых от него таин, убо ниже предложенный хлеб прелагается в тело Христово, и вино в кровь Его животворящую. но хлеб есть хлеб, и вино вино. понеже бо без благословения, еже рукою иерейскою бывает, ни нашествия Святаго Духа, сия тайна совершитися не может. сие и от новых Питирим по премногу утверждает глаголя [Пращица, ответ 211, лист 344]: [совершенное самое тело Христово, и кровь Христова, молитв ради иерейских, и знамения крестнаго, иже рукою иерейскою бываемое Пресвятыи и животворящии Дух прихождаше, и предложенныя дары претворяше]. И понеже без благословения иерейскаго бываемаго рукою, и нашествия Святаго Духа, сия тайна не совершается. сиречь предложенный хлеб и вино не пресуществляется в плоть и кровь Христову, убо ниже от проклятию преданнаго, аще и благословляет, благословение действително есть, аще и призывает и Дух Святый не приходит, и предложенный хлеб и вино претворяется, аще и действует, в существо плоти и крови Христовы. и аще убо от проклятаго не пресуществляется в плоть и кровь Христову хлеб и вино то како возможно действуемаго от него причащения причаститися? всячески невозможно, паче же не подобает. понеже убо клятва проклятию преданнаго священника, не токмо строения таин церковных лишает но и подаяния, якоже о сем творец книги Мира с Богом свидетельствует глаголя [догмат 4, о клятвах]: [клятва лишает проклятаго общения таин церковных, сице в приимании их, яко в подаянии. ибо проклятыи не может таин приимати, и сущии священныи подаяти]. Аще убо проклятый не может таин церковных приимати, и сущии священныи подаяти то како священник проклятию преданный может тайну святыя евхаристии совершити? всячески не может. почто понеже по того жь творца книги Мира с Богом свидетельству: [клятва лишает всего строения чина и сана священническаго, такожде приимания и строения добре]. И аще клятва лишает священника всего строения чина и сана священническаго и строения таин церковных, проявлено яко от проклятию преданнаго священника тайна святыя евхаристии не совершается, сиречь предложенный хлеб и вино не претворяется, аще и мнится действовати не пришествующу Духу Святому, во еже преложити я в плоть и кровь Христову. и аще от таковаго священника предложенный хлеб и вино в тело и кровь Христову не пресуществляется, остается прочее яко предложенный хлеб, хлеб, и вино, вино. и таковаго причащения причащаяйся, како тела и крови Христовы имать причаститися, идеже несть разве точию причастится тогожде проклятия и в лепоту. понеже бо аще моляйся со отлученными, по гласу священных апостол, и сам отлучен есть [правило 10]. Благоявлено яко и причащаяися с проклятыми есть проклят. Сего ради всякому хотящему наследником небеснаго царствия быти всеми силами блюстительно есть. еже бы от проклятию преданнаго священника, действуемаго от него причащения не причастится, да не како причастився его, причастится и клятв его и будет ему снаследник во оном веце. понеже бо ядущий от единаго хлеба, едино тело бывают якоже выше рех убо уне есть содержащу веру праву и дела добрая не сущу православну священнику весь живот свой безпричастну пребывати и со Христом вселитися, нежели от проклятию преданнаго священника причаститися, и царствия небеснаго лишитися.