О печатании просфир трисоставным крестом, в кругловидной печати и танстве кругловидства

К сим святая древлеправославная великороссийская церковь, последующи святей древлеблагочестивей яко матери своей восточьней церкви, имеющи содержаше обычай печатати просфиры трисоставным крестом, в кругловидней печати, с копием и тростию, и надписанием евангельским. Се Агнец Божии вземляй грехи мира сицевым видом [на поле: прилагается рисунок печати]. Каковым обычай святыя восточныя церкве, еже печатати просфиры кругловидною печатию, имущею посреде трисоставный крест по премногу утверждает святый восточный учитель, Симеон Фессалонитский, во главе 88, книги своея. Кий един той же а не ин обычай восточныя церкве, и в великороссийстей церкви, от самого крещения России, даже до времене патриаршества Никонова, неизменно содержашеся. Свидетельствуют сие самовидетелне, обретающиися в России, древлецерковнии дорники. Не менше и сам Питирим, в книзе своего сочинения Пращице, во ответе 25, утверждает. Ныне убо от лет Никона патриарха, в великороссийстей церкви, святоотеческий обычай кругловидства печати изменивше отринуша. Глаголют яко [кругловидство, (якоже Феофилакт Тверскии [книга на ответы выгорецкия, лист 62]) от римскаго обычая бяше]. Вместо же кругловидныя печати, имущия трисоставный крест, печатают просфиры, четвероуголною печатию, имущую посреде двочастный крест; без надписания евангелскаго, сицевым видом [на поле: изображение четвероугольной печати, с надписанием IИС ХС:НИ КА]. Обаче, аще и тщатся сими своими словесы, яд прелести своея укрыти; но не возмогут. Абие бо обратится болезнь их, псаломски рещи, на главы их и на верси их неправда их снидет. Вемы бо святаго Иоанна Златоустаго глаголюща [в беседах апостол. на деяния, нравоуч. 17] вемы, яко [противницы церкве видяще что противно своему зловерию, в книзе каковей, и хотяще ю отвержену и помрачену имети, не могуще же инако ни единым образом противу стати, оглаголуют ю быти коего любо еретика]. Равнообразне и зде восхотевше отринути кругловидную печать от просфир, оглаголуют ю западнаго костела преданием. Но аще западнаго костела еже печатати просфиры кругловидною печатию, имущею посреде себе трисоставный крест, с надписанием евангелским, есть обычай, и предание, а не святыя древлевосточныя церкви. Како святый учитель восточный Симеон Фессалонитский, изъявляя кругловидство печати в печатании просфир, утверждает восточныя церкве обычай. сице глаголя: [Яже, (рече) смотрения Спасителя во хлебе, яже убо суть божества, в хлебе печати, яже кругловидная есть, и посреде ея крест]. книга 1, глава 88. Видиши ли коль явственно глаголет, в хлебе печати, яже кругловидная есть, и посреде ея крест, и не рече четвероуголная, но кругловидная. Како же и святии гречестии восточныя церкве архиереи, вселенския патриархи Иеремия, и Феофан, в России самобывша, святую литоргию служиша, самовидне своими очесы видевша, на просфирах трисоставный крест, в кругловидней печати, не зазреста и не порекоста латинским обычаем; но и паче похвалиста в России содержащееся тогда благочестие, якоже явствует в Кормчей. Аще бы был латинский обычай, всяко имела быста зазрети, и повелена быста исправити, яко вселенская патриарха. Како же и по сию оставшия святии архиереи, греци суще, Арсений и Иосиф Суждалстии, Нектарий Вологодцкий, иже присно на своих престолех служаще, трисоставным крестом в кругловидней печати просфиры печатаны имуще, якоже древнии дорники показуют, не зазреша, и не отринуша, порекше латинским обычаем? Ельма же убо и святый Симеон Фессалонитский, кругловидство печати утверждает: елма вселенская патриарха самобывша в России, и самовидевшая кругловидную печать, не зазреста и не порекоста латинским обычаем: елма святии архиереи; греци суще, служившии, в России на престолех, повыну видевше кругловидную печать, и не отринуша. Всякому проявлено, яко еже печатати просфиры, кругловидною печатию, имущею посреде трисоставный крест, есть обычай и предание святыя восточныя церкве, а не латинский. Аще убо глаголеши латинский; рцы, когда и в кая лета? при коем благочестивем князе, или царе великороссийстем? и при коем митрополите, или патриарсе российстем? и ким внесеся сей обычай в Россию, всяко не имаши показати. Ибо сей обычай, еже кругловидною печатию печатати просфиры, от самого начала христианския веры, непременно в России содержашеся. Что убо хощеши ли да ти аз покажу? Возмем от Никона, и пойдем разсмотряюще времена даже до лет князя Владимера и всяко обрящем той же обычай непрерывно содержащийся. И виждь ми: При пяти благочестивых великороссийских патриарсех, Иове, Филарете, Ермогене, Иоасафе, и Иосифе, во святей великороссийстей церкви, даже до лет Никона патриарха, обычай бе просфиры печатати кругловидною печатию. Еже по премногу древлецерковнии дорники обретающеся в России самовиденне показующе утверждают. Сицев же обычай печатания просфир, и прежде пяти патриархов в России, при святейших митрополитех Московских до царя Иоанна Васильевича, и при царе Иоанне Васильевиче непременно содержашеся. Явственно сие засвидетельствует Питирим в Пращице, во ответе 19. Той же а не ин обычай, печатьствования просфир и прежде царя Иоанна Васильевича, при благочестивых князех, даже до лет святаго Владимира, и при Владимире, отнележе начашася службы в России, непреложно имяшеся, зело сие утверждают отцы стоглавнаго собора, иже содержаху обычай древний друг другопреемательне, печатати просфиры кругловидною печатию. понеже убо сей святый собор, собравыйся с Макарием митрополитом, не новыя введе, но древния святыя великороссийския церкве обычаи и содержания укрепи, яко в предисловии Стоглава изъявляет. И аще от лет святаго князя Владимира, до лет благочестиваго царя Иоанна Васильевича, в Российстей церкви, непременителне содержашеся обычай, печатати просфиры кругловидною печатию: аще от лет царя Иоанна Васильевича, до бытия пяти благочестивых патриархов, той же обычай неизменителне соблюдашеся: аще в бытность пяти благочестивых патриархов, до лет Никона патриарха, един той же а не ин, святыя восточныя церкве обычай бяше, печатати просфиры кругловидною печатию, имущею посреде трисоставный крест. Остается прочее яко четвероуголною печатию печатати просфиры, имущею посреде двочастный крест, не есть предание святыя древлеправославныя восточныя церкве, не есть содержание, святыя древлероссийския: но римскаго отпадшаго благочестия костела обычай. И в лепоту. Ибо аще хотя лжею лицемерия своего яко овчиною закрывающе в себе, внутренняго волка и не объявляют [книга Кирилова, лист 495]. Потаемне согласившеся с римляны, яко христопродавец Июда с жидами умыслиша всех благочестивых в здешней области христиан, безвести отторгнувше, с собою в погибель вринути. Обаче самая их писания объявляют яко есть римскаго костела обычай. Глаголют бо яко вся наши книги преводим с греческих, яже печатаются в латинских странах. Которая книги печатаются, в трех латинских градех, в Риме, в Паризе, и в Венеции. Но сия греческия книги новыя многая несогласия и погрешения, с древними греческими и словенскими имут. Сие не ин кто, но сам Никон патриарх их засвидетельствует. Егда бо его извергаху из сана патриарша, принесена бысть книга Номоканон, по ней суд произвождаху, именуемый восточный, еже и закон царский, назва ю еретическою, яко напечатася в западных странах. О чесом в соборном деянии писано, о извержении того Никона патриараха, в лето 7175. Но и в житии того же Никона патриарха, повествует; Яко печатныя греческия новыя книги, с греческими же и славенскими, древними, многая несогласия и погрешения имут. В книзе же Жезле, тыяждо книги, и в тех же градех печатныя книги глаголюще оправдает [Жезл новопечатный, лист 54]: [Яко праведне и нерастленне печатают их латыни. от них же вся наша книги преводим. ничесоже прилагающе или отъемлюще, да совершенне им уподобимся]. Зде снеси купно словеса Никона и Жезла, и виждь каковы суть нынешния великороссийския церкве книги. Никон рече, яко печатныя греческия книги новыя, с греческими же и славенскими древними, многа несогласия и погрешения имут. Жезл же глаголет: от них же вся наша книги преводим, ничесоже прилагающе или отлагающе, да совершенне им уподобимся. От коих преведше напечаташа [Скрижаль, лист 57, во Псалтырех новых]: [креста убо образу от двою древу совокупляюще покланяемся, на нем же и распятыи за нас, Iисус Христос руце прострыи, вся языки расточенныя в концах, во едино собра]. И якоже крест двочастный, от новых, греческих, в латинских странах печатных, растленных книг, преведше, древле в России неслыханных в своих книгах, подобящеся им совершенне, напечаташа и церкви предаша: Тако и четвероуголную печать, от тех же книг преведше, подобящеся латином, в новых своих Служебницех напечатавше, определиша в церкви просфиры ею печатати. Отсуду явственно видимо есть, яко четвероугольною печатию печатати просфиры содержимый ныне в великороссийстей церкви обычай есть римскаго костела, а не восточныя церкве. Кругловидною убо печатию, святая древлеправославная церковь определила печатати просфиры, не просто ниже всуе: но таинственне и по прообразованию. Понеже бо манна в ветсем завете, еюже евреи в пустыни питахуся, с небесе сходящая бе кругла. яже круглотою своею прообразоваше божество, в пресущественнем хлебе и вине. якоже споведует кир Гавриил Филадельфийский, сице глаголя [книга О седми тайнах, лист 118]: [и манна убо бе кругла, и круг убо прообразоваше в божество, в пресущественнем хлебе и вине, ниже начала, ниже конца имеюще]. глава 8. Подобообразне и зде кругловидство печати прообразует божество Христа Спасителя. Сие святый Симеон Фессалонитский толкуя таинство просфиры утверждает, глаголя: [Яже, рече смотрения Спасителя, яже убо суть божества, в хлебе печати, яже кругловидная есть, и посреде ея крест]. книга 1, глава 88. Виждь, рече, яже убо суть божества, в хлебе печати, яже кругловидная, прообразует, яже убо божества Спасителя, сиречь, безначальное и безконечное. Ибо якоже печати оныя кругловидство не имать ни начала ни конца: сице и Сын Слово Божие не имать ни начла ни конца, но всегда и везде сыи. Яко же той же святый Симеон Фессалонитский толкуя таинство кругловидства печати, сказует сице: [Безначалнаго и безконечьнаго Слова воплощения всем вкупе показующи, и Бога суща, и по нас явльшагося, и воплотившагося поистинне и страдавша]. глава 88. Се колико и каково кругловидная печать таинство в себе замыкает. Коего таиньства в четвероугольной печати, аще, и многащи потщишися поискати, отнюд не обрящеши. Понеже четвероуголная не имать в себе кругловидства, имже изобразуется безначалное и безконечное Слова воплощеннаго. Не имея же, кругловидства, ниже имать и знаменования безначалнаго и бузконечнаго. В четвероуголии бо есть начало, есть и конец. Ибо от угла до угла черты протязаемыя показуют начало и конец. В едином бо угле начинается черта в другом же окончание свое имать. И тако сими своими началом и концем, четвероуголная печать не показует, якоже кругловидная, безначалное и безконечное Бога Слова: Но всяко под началом суща, якоже Арий злочестивый блядословляше глаголя: Бе некогда яко Сын Божии имеяше начало. Откуду сим своим новым мудрствованием, показуют себе смудрствовати Арию, но таковою четвероуголною печати, показующею начало и конец Бога Слова, и нехотяще самою вещию подтверждают себе зело зело.

Ктомуже святая древлеправославная великороссийская церковь, повсемественне содержащи имеяше обычай, в кругловидней печати полагати надписание, словес пророка Иоанна Предотечи рекшаго [Ин. зач. 3]: Се Агнец Божии вземляй грехи мира. обаче не всуе ниже туне определила сицевое надписание полагати на просфирах: но вин ради благословных. Ибо предложенный хлеб в проскомидии знаменует самого Христа Спасителя. Еже яве видимо есть от толкования литоргии, идеже пишет тако [Иоанн Нафанаил, в толковании литургии, глава 68, Скрижаль, лист 152]: [хлеб убо, иже разлучися от священника, да священнодействуется. (ниже) знаменует Христа по возрасту оному, от Него же бысть, дар, бысть убо дар от самаго рожества]. Скрижали, глава 68. Священник же начинаяй божественную литоргию, знаменает Иоанна Предотечю. Явственно сему научает Иоанн Нафанаил в толковании литоргии сице глаголя [Скрижаль, глава 53, лист 148]: [Священник, иже начинает божественную литоргию, носит образ Предотечи Иоанна Крестителя]. глава 53. Якоже убо тогда узре святый Иоанн Предотеча Христа грядуща к себе, возва глаголя [Ин. зач. 3]: Се Агнец Божии вземляй грехи миру. Подобне и начинаяй служити литоргию священник, видя в проскомидии предложенный хлеб, иже знаменует самого Христа, отлученный в священнодействие, на нем же имать воспоминание страстей Христовых изображати, аки перстом указуя глаголет: Се Агнец Божии вземляй грехи мира. Тем и начиная проскомисати глаголет: [Жрется Агнец Божии вземляй грехи миру]. Сие толикое и таковое таинственное евангелское подписание, нынешнии великороссийския церкве архиерей, порекше излишним, яко Питирим Нижеградский в Пращице, во ответе 211, отринуша, и в новоизданней своей четвероугольной печати не подписуют. Да како убо есть излишнее, егда хлеб отлученный на проскомидии, да священнодействуется, знаменует самого Христа, священник же священнодействуяй, знаменует Иоанна Предотечю? ей несть излишнее. Аще бы было излишнее: не бы и святая древлеправославная церковь определила подписовати. Но понеже несть излишнее. но велие в себе таинство заключающее есть, сего ради и узаконоположила. Убо лепотствует надписовати, да весть, яко хлеб сей Христа знаменует.

К сим нынешния великороссийския церкве архиереи сопротивомудрствующе, преданию и содержанию святыя древлевосточныя, и великороссийския церкве, копие и трость, от креста отъявше, отринуша, и в четвероугольней своей печати на просфирах при кресте не изображают. Святая бо древлеправославная великороссийская церковь, последующе древлевосточней, имеяше обычай, в кругловидней печати при кресте Господни изображати копие, имже животворивая ребра Господня прободена быша, и трость на нюже оцет придевше напояху Его. якоже свидетельствуют, священнии евангелисти, Матфей в зач. 113, Мр. в зач. 68, Ин. в зач. 61. Кая оружия святая древлеблагочестивая церьковь изображала на просфирах, купно с крестом, вин ради благословных.

Первое: Святии богословцы, копие и трость, купно с крестом Господним почитают, и прославляют, и покланяются, яко сими вкупе страсть Его содеяся. Сице святый Иоанн Златоустый труба церковная вопиет, глаголя [Маргарит, лист 517]: [С ними же и мы искуплены от клятвы законныя, честною ти кровию, покланяемся безстрастия ходатайственым ти страстем, и смерти волней нас оживльшей. Целуем же крест и губу, и трость и копие, и гвоздие с багряницею, еюже поруган бысть сладосте церковная. Прилагаем же к сим устне, и очи и сердца]. в слове, О распятии Господнем. Подобне святый Георгий архиепископ Никомидийский воспевая глаголет [во святый и великий пяток]: [Лобзаю Твой крест, имже мой осудил есть грех, имже смертнаго мя осуждения свободил еси. Целую трость, еюже свобождение ми подписал еси, еюже строптиваго змия уязвил еси главу. Целую губу иже ко пресвятым Твоим принесенную устом, еяже ради преслушания горькое в сладкое претвори. Яко сладкую вместо желчи вкусих снедь, яко веселия вместо оцта причастихся питию. (ниже) Целую копие иже мое рукописание раздравшее, безсмертия источник отверзшее]. в слове на погребение.

Второе: Святый сладкопеснивый церковный славий, яко святый сладкопеснивый сирин Иоанн Дамаскин, Феофан митрополит Никейский, Иосиф песнописец, в своего творения имнах, ублажающе копие и трость, купно с крестом воспевают сице: [Покланяющеся чтем копие, и губу, и трость, имиже дарова миру своему, мир и велию милость]. глас 5, вторн. вечер, в стихере. И паки: [Копие, и трость, губу и венец, лобзающе, (ниже) Честне почитаем, имиже спасохомся]. в четверток вечер в стихере. Паки: [Страдати претерпев Владыка, яко да безстрастие всем подаси, покланяющимся Твоим страстем, и волному заколению, и копию, и гвоздем, и тростем яже долготерпеливе хотя претерпел еси, яко да и мне исходатаиши Господи, ради страстей Твоих безстрастие]. глас 8, во вторник веч. стихера. Сим подобне, и триоднии творцы, святии Феофан Никейский, и Иосиф песнописец, Феодор Студит, купно с братом, Иосифом Солунским, воспевающе поют: [в пениих поюще и глаголюще, слава живоносному Ти кресту, слава божественному копию Твоему, имже ожихом едине Человеколюбче]. в пяток, 3 недели поста, на утрени седален. Паки: [Кресту Твоему вси покланяемся Христе, предпразньство творяще воскресения Твоего. поем гвоздия Твоя, чтем и копие, устне и очи, душю же и тело сим очищаем]. в понеделник, 4 недели поста, песнь 1. И паки: [Поем Ти Iсусе многую благость, покланяющеся кресту Твоему копию и трости. тем бо разори Щедре вражды средоградие]. среда, 4 недели поста, песнь 6. И паки: [Пою копие Твое, покланяюся, и гвоздем Твоим, губе и трости с крестом, имиже спасе мя Iсусе Боже]. в среду, 6 недели поста, в 9 песни стих. Темже елику убо святии богословци, и церковнии песнотворцы, всегда и всюду, крест копие, и трость вкупе научаху прославляти, и покланятися, потолику и святая древлеблагочестивая церковь крест воображаше неразлучно с копием и тростию, на нем же и ими же содеяся страсть Господня, яко на иконах, сице и на просфирах.

Третия: И наивящшая вина, еже на просфирах, при кресте Господни копие и трость изображати, от самыя приличности показуется годствовати. Зане просфира оная, юже разлучи священник, да священнодействует, в проскомидии, яже знаменует Христа прообразует страсти Христовы, страсть, смерть, и погребение [Скрижаль, глава 68, лист 157]. И показует самыми делы, яко сим образом прииде на страсть Господь, сим образом умре, сим образом прободеся в ребра, сим образом от прободенных ребр излияся кровь и вода. понеже бо священник повнегда возмет хлеб, глаголет [Скрижаль, глава 69, лист 160]: Воспоминание творим Господа Бога и Спаса нашего Iсуса Христа. Кое воспоминание? страсть, крест и смерть: О сих нам повеле творити воспоминание Его. И откуду явлено есть сие. от Павла. он бо добре разуме таинства Христова. Ибо пиша к коринфом о таинстве сем глаголет: Яко Господь рече: сие творите в Мое воспоминание. Сего ради, егда речет священник, в воспоминание Господне, приводит и оная. яже являют крест и смерть. Ибо режа хлеб, глаголет пророчество пророка Исаии: Яко овча на заколение ведеся, сиречь, Христос ведеся в смерть яко овча, и словом и делом показует, елико есть возможно. И якоже бо тогда на кресте един от воин прободе в ребра: Сице и в проскомидии водружает копие священник в просфиру, изобразуя прободение ребр Господних. Еже и святый Симеон Фессалонитский утверждая глаголет: [и от приносящих хлебов един прияв, знаменует, его копием крестообразно, спасительную страсть прообразуя Христову]. глава 84. И понеже убо аще тогда во время страдания Господня при кресте копие и трость быша, како и зде ныне, воспоминанию совершающуся тогожде самого страдания Господня в хлебе, при кресте на просфире не лепотствует изображатися копию и трости? ей ей лепотствует, паче должно есть.

Темже убо аще нынешняя великороссийская церковь, сопротивомудрствуя отринувши обычай и содержание, святыя древлеправославныя церкве, еже печатати просфиры кругловидною печатию, [Коея кругловидство знаменует безначалное и безконечное Бога Слова] уставила четвероуголною, подобящеся латином, в ней же не показуется знаменователнаго безначалнаго и безконечнаго Бога Слова, печатати просфиры: аще отвергла подписание евангельское, Се Агнец Божии вземляй грехи миру, от печати просфир: аще от изображения на просфирах копие и трость бывших при кресте Господни отринула: аще самый трисоставный животворящий крест Христов, совершеннотворитель всякаго таинства, отринувши печатает двочастным, иже несть крест, о чесом выше доволно засвидетельствовахом, Христов. Яко же и святый Иоанн Златоустый глаголет [в беседе 10 ко евреом, лист 2966, Кирилова лист 59]: [Несть втораго распятия, сиречь, крест вторыи несть ктому]. в беседе 10 ко евреом. Но един крест Господень честный, егоже на рамех своих Христос, на смерть грядый с места снес на гору Голгофу, на нем же и титла от Пилата была написана. книга Кирилова, лист 59. И не токмо отринула, но и печатающия трисоставным крестом просфиры, по древлецерковному преданию, а не двочастным, в соборном свитце отлучению, и анафеме предает, и с еретиками дерзновенно осуждает. В новопечатной же Пращице, во ответе 212, полагающыя на просфирах, креста трисоставнаго воображение в кругловидней печати, с подписанием евангелским, с копием и тростию, под проклятие соборное всех архиереов подлагает и низвергает, но и тайнодействуемыя просфиры под таковым креста воображением, и печатию с подписанием отрицает глаголя [Пращица, ответ 212]: [Не может быти сущее святое тело, и кровь Христова. весма]. То како под таковою четвероуголною печатию, и двочастным крестом, иже несть Христов, в действуемей просфире может быти сущее тело Христово, и кровь Его святая, лишившися самосовершителя креста, без него же, якоже множицею рехом, хлеб и вино не может преложитися в существо тела и крове Христовы? Но и самое сие новосотворшееся печатьствование не по древнему святыя церкве преданию бываемое, несть, несть ли под клятвою святыя древлевосточныя церкве? ей есть. Ибо святая древлеправославная церковь, все новосотворшееся, или последи содеятися хотящее, анафеме предает, сице светлым гласом вопиюще: [Вся яже чрез церковнаго предания учительства, новосотворенная и соделанная, или по сем содеятися хотящая анафема]. правило собора соединения.

И аще убо сия четвероуголная печать, не по преданию древлеправославныя церкве новосоделанная есть под клятвою: аще без трисоставнаго креста, совершеннотворителя таинств, не может хлеб и вино пресуществитися в тело и кровь Христову: благоявленно яко в новодействуемей литоргии, под четвероуголною печатию, и двочастным крестом, и действуемый хлеб и вино несть сущее тело и кровь Христова: Но хлеб хлеб, и вино вино. Ибо аще по их неправому мнению, яко печатию, с надписанием евангельским, и трисоставным крестом Господним, с копием и тростию, в действуемей просфире, еже да не будет, не может быти, (всегда бо и и бысть, и есть, и будет) сущее тело и кровь Христова весма: Но неотрочно, паче в новодействуемей просфире, под четвероуголною печатию, яже есть под клятвою, и двочастным крестом, иже несть совершенотворитель таинств, якоже трисоставный, без него же не пресуществляется хлеб и вино, в плоть и кровь Христову, несть сущее тело и кровь Христова. И аще тако есть, якоже и есть. То како таковаго причащения возможно причаститися? и коего тела Христова имать вкусити причащаяися? разве тела соединения со еретики. и в лепоту. Ибо якоже причащаяйся тела и крове Христовы, едино тело со Христом бывает: Сице и причащаяися со еретики, едино тело с ними бывает. Убо сицеваго причащения весма блюстително есть, яко не со Христом соединяет, но от Христа далече отлучает, и царствия небеснаго лишает.