О вине материальней

Вторая материалная сущая, и вещество причащения, аще по всем автором яко по древним, тако по нынешним, свойственно и согласно показуется, (хлеб пшеничен квасен, солию же осолен, и вино с водою имущее свою естественную целу сладость). [Катихисис великий, глава 64, лист 264]. Якоже и Гавриил Филаделфийский глаголет [книга О седми тайнах церковных, лист 111]: [Вещество убо божественныя литоргии есть, хлеб и вино с водою, не бо от иного коего либо вещества, или от плода прилучившагося, или сикера, не от истинныя пшеницы, и вина истиннаго, божественное тайнодействие совершати нам Господь, и божественнии Его апостоли предаша]. Обаче и вещи и действа при действии причащения бываемыя, к материи приписуется. Какова суть: Седмопросфирное служение: выимание частей ис просфир: исповедание веры: и прочая последования, описуется в Служебницех. О чесом в книзе Катихисисе малом, вещь хлеб пшеничный, и вино с водою глаголет, в ней же при последовании иных потреб, положенных в Служебниках, от священника совершения причащения бывает, идеже пишет тако [Василий В., Златоуст, Иаков в литоргии, Дионисий о церковном священноначалии, глава 3]: [Первее егда священник имать совершити святую литургию, с намерением ума да совершают ю, еже святая церковь, соборне убо описала своим, и не соборне. Ктомуже да имать приналежащую вещь совершенную сущу и целу, еже есть, хлеб чистыи пшеничныи квасныи, и вино естественное с водою мало смешеное. Потом и иныя потребы, без них же никакоже может святая литоргия совершитися, якоже о том достаточно имамы науку, в Служебниках церковных, или в Потребниках]. лист 29. В новодействуемей же убо литоргии, или причащении, материя, хлеба пшеничнаго, и вина с водою мало смешеннаго, аще убо и подобно полагается: но прочия вещи, и глаголы при причащении бывающыя, не согласны, елико древлеправославней российстей церкви, толико и древлевосточней разньственны обретаются. Ихже егда во испытание действ, вещей, глаголов, доброразсудительне внидем, яже при литоргии, яже в литоргии, церковне преданне положишася, многа несогласия, многа разньства, многия противности, в новодействуемей литоргии, и с древлепечатными книгами несослагателная обрящем. Кая несогласия, разньства, и противности, вся трудно и многовременно изследовати, обаче отчасти некая удобнейшая ко исчислению предлагаем.

1: Святая древлеправославная великороссийская церковь, приемши от святыя восточныя церкве, содержаше непременителне даже до лет Никона патриарха, в священнодействии святую литоргию, над седмию просфирами совершати. Первую, за Господьский хлеб. Вторую, в честь и память Пресвятыя Богородицы. Третию, в честь и славу небесных сил бесплотных. Четвертую, о здравии и о спасении патриарха, и всего священническаго чина. Пятую, о здравии и спасении благочестиваго царя, и царицы, и чад их. Шестую, за всех православных христиан живых. Седмую, за усопших. В новодействуемей же литоргии, две просфире, еже за царя и патриарха особные отложене, и вместо еже по старопечатным Служебникам, тайно действовати литоргию над седмию просфирами, новоуставленно служити на пяти просфирах. Но сие тайнодействие святыя литоргии, еже служити над седмию просфирами по премногу многшии древлепечатнии Служебницы засвидетелствуют, от них же немногия некия и зде во утвержение наше предлагаем.

В Слежебницех перваго патриарха Иова, егоже рукоположи вселенский патриарх Иеремия Констянтинополский, изданных в лето 7120. В Служебницех святейшаго Филарета патриарха, егоже рукоположи Феофан патриарх святаго града Иеросалима, изданных в лето 7131. Святую литоргию над седмию просфирами велено служити. В Служебницех Ермогена патриарха, Иоасафа, изданных в лето 7148. и Иосифа изданных в лето 7159, и в первониконовских, изданных в лето 7160, во всех сих над седмию просфирами повелевает служити. В Потребницех изданных при Иоасафе и Иосифе патриархе, повелевает службе святыя литоргии над седмию просфирами служити. В Потребнице рукописнем святаго Дионисия архимандрита Радонежскаго, литоргия Златоустова повелено на седми просфирах служити. Сие седмопросфирное служение святыя литоргии, и белороссийския печати Служебники явственно утверждают. В Служебницех киевопечерския печати, изданных в лето 7137, такожде на седми просфирах повелевает служити.

В Служебницех Виленския печати в четверть, изданных лета 1624, литоргию Златоустаго велено на седми просфирах служити. В Служебницех Виленския же печати в четверть, изданных в лето 1641, повелено литоргию Златоустаго такожде на седми просфирах служити. В Служебницех в полдесть, печатных благословением епископа Львовскаго в Стрятине, лета 7112, литоргию Златоустаго велено служити на седми просфирах. Сие седмопросфирное служение литоргии и святии восточнии учители утверждают. Сице святый Симеон Фессалонитский в книзе своей [новопреведенной], от главы 92: Сице иерей в квасныи той хлеб, из середины хлеба чинно изимает, являя и всем яко от нашего естества, а не из инаго существа воплотися Спас. От главы 93: Сам же иерей иную восприят просфиру, от иже посреди печати единую изъем частицу копием, в честь и в память приносит Богородицы, и сию одесную иже на дискосе священнаго хлеба полагает. От главы 94: Ошуюю же аггелов и святых всех, зане вторыи сии имеют чин, паче же ниже сравнимую весма коея преимуществу, чрез нея же просвещаются, и из нея первыя и мы чрез святых спасаемся, яко и чрез нея Богу соединяемся. [Скрижаль, глава 75, лист 193] Сие убо совершив иерей, потом и прочия приносит частицы, предварително убо о архиереи, понеже священства есть источник, потом о всем священническом чине, служащем тайне, подобает прежде восприяти трудившемуся, якокже, и Павлу мнится. Потом о верных царех поборающих о благочестии, и спасении их, и христолюбиваго народа. По немже о игумене, аще в монастыре действуется, и о прочей братии, аще же в храме некоем, о воздвигшем, или память совершающем, и о прилежащих тамо, и еще о принесших, и о тех иже дары принесе. И последовано же и о еже о Христе усопших, и всего освященнаго чина, и монашескаго, и паки всех православно скончавшихся верных. Сие святаго Симеона исчисление по всему согласует великороссийския церкве, еже на седми просфирах служити божественную литоргию. Ибо якоже у святаго Симеона, по трех просфирах приносити повелено о архиереи и о всем священническом чине: тако и в древлепечатных Служебниках, четвертая просфира приносится о всем священничестем чине. И яко же у Симеона, по священничестем чине указует, приносити о верных царех, и всех христианех: подобне, и в древлепечатных Служебниках, пятая просфира приносится, о благочестивых царех, и князех, болярех и воех их, и о всех православных христианех. И якоже Симеон по царех повелевает приносити, в монастыре о игумене и о всей братии, в храме же о здатели храма, и присудствующих ко храму, и дары приносящих: сице и в древлепечатных. Шестая просфира приносится, в монастыре о игумене и священницех и причастницех и всех братиях, и служебницех, и за их же хощет здравии приносити и за себе. И якоже Симеон последовано повелевает, за усопшия приносити: равнообразне, и в древлепечатных Служебницех, последняя седмая просфира приносится за усопшия. Согласно древлеблагочестивыя великороссийския церкве содержанию, и научению святаго Симеона Фессалонитскаго, и святии отцы Афона в Номоканоне, иже издан бысть в Москве, при патриарсех Иоасафе и Иосифе, еже на седми просфирах служити святую литоргию научают сице глаголюще [Номоканон афонских отец, печатан в Москве, правило 13]: На святой проскомидии, божественныя литоргия, седмь просфир да имаши: Первая, за Господьскии хлеб. Вторая, Пресвятыя Богородицы. Третия, за святых. Четвертая за патриарха. Пятая, за царя и царицу, и за чад их, а идеже будет к цареву величеству послати, то выимати по именом, всем по просфире. Шестую же, за всех православных, за живых человек, ихже хощеши поминати. А седмую, за усопших едину прямо со другою особно, кождо чином своим, якоже в Служебниках указано и изображено имаши. правило 1. По премногу, яко сей чин в содержание древлеблагочестивыя великороссийския церкве, еже на седми просфирах служити литоргию, древлеправославныя восточныя предание бе, и о новых учителей Питирим Нижеградский в Пращице утверждает глаголя [Пращица, лист 345]: В прошедших летех, до правления старопечатных книг, аще и служили на седми просфирах. (ниже) ибо тако тогда повеление было великороссийския церкви, и не по противлению восточной церкви. ответ 12.

Но аще убо святая древлеправославная великороссийская церковь, имеющи содержание чин, и обычай, до лет Никона патриарха, еже на седми просфирах служити божественную литоргию, не по противлению восточней церкви, то почто таковый чин и содержание пременяти? Или не явно есть преступление таковых, еже святыми богоносными отцы писаное Духом Святым предание во времена подобная положенныя развращати своя же некая мняще быти, паче Духа Святаго лутчая учения вносити [книга Кирилова, лист 305]? Святая же бо древлеправославная восточная церковь определила, на седми просфирах божественную литоргию совершати не туне ниже всуе, но во образ оныя Христовы трапезы, на ней же седмию хлебами четыре тысящи народа насыти, яко высочайшия и духовнейшия. Еже и сами новопременители оныя трапезы засвидетельствуют, и в новосочиненной своей книзе Жезле сице глаголюще [Жезл, часть 2, возобличение 19]: [Не невемы и некиих церквей обычая, яко над седмию служити просфирами, во образ оныя трапезы, егда Христос Господь, изволи седмию хлебы четыре тысящи народа насытити]. часть 2. Сии же седмопросфирную службу отринувше, уставиша над пятию просфирами служити, во образ сея трапезы на ней же Христос Господь пятию хлебы, пять тысящь народа насыти, мняще сию чюдодейственнейшую оныя быти. якоже сами утвержают глаголюще [Жезл, ниже]: [Но лутчи есть над пятию хлебы, пять тысящь народа насыти. Ибо большее есть чюдо пятию хлебами пять тысящь насытити, неже седмию хлебами четыре тысящы]. Обаче аще и мнят быти болшее чюдо в пяти хлебах: но несть бо болшее. В седми бо хлебах духовнейшее, и высочайшее таинство является, нежели в пяти, чистоты ради таинства седморичнаго числа. Явственно о сею трапезу Господню, святый Никита Ираклийский, в толковании словес святаго Григория Богослова, на пятьдесятницу свидетельствует глаголя: [пять (рече) хлеб бывающее от пяти чювств естественно о Бозе учение, в нем же питаются иже по пяти чювствах токмо живуще, и не могущеся воздвигнути крылы ума воззрение высочайшее. Ниже: И не и еще срастны безсловесныя части душа очистивших. А совершенных же пища много лучши и вышши есть, четыретысящнии бо тии. и мнии пятитысящных по числу, злии бо множайшии, и родные добродетели имут. Седмь же хлеб бяше чистоты ради и таинства числа. Чисто бо и действенно седморичное число, и избыток же знамения ради седморицы чист и нетленен. Божествена убо сия и недоведома зрения и духовна, седмь бо духовна дарования]. стих 7. Подобне сему и святый Феофилакт в толковании словес Господних глаголет: [В седми хлебах духовнейши и высочайши таинство являет, неже в пяти хлебах, ядят же просвещеннии и насыщаются]. Благовестник, лист 43 [на зач. от Марка, 32].

2: В старопечатных и древлеписанных святых книгах, во святей литоргии, егда режет Агнца, повелено глаголати сице [Служебник в чине проскомидии]: Жрется Агнец Божии вземляй грехи. В новопечатных же Служебниках напечатано, и повелено глаглати, вместо множественнаго числа грехи, единственным числом грех, сице: Жрется Агнец Божии вземляй грех мира. Что убо еда ли Христос прииде на землю, един некий грех взяти, сиречь очистити, мира, рекше хотящих веровати вонь? а не и вся? никакоже никако, но вся. Понеже убо святый Иоанн Предтеча, егда узре Iсуса к себе грядуща, не рече [Ин., зач. 3]: Се Агнец Божии вземляй грех миру, но грехи миру. Яко не един некий прииде очистити грех, но вся. Темже и пресвятый наш Владыка Христос Господь. пречистыми своими усты, егда исцелив разслаблена жилами, глаголя [Мф. зач. 29; Мк. зач. 7]: Дерзай чадо, отпущаются греси твои. неким от книжник помышляющим, что сей хулит. ведыи помышления их, рече к ним: Но да увесте яко власть имать Сын Человеческии на земли отпущати грехи. Не грех, рече, но грехи.

3: В древлепечатных Служебниках повелено якоже от третия просфиры за всех святых, едину часть выимати: тако и от прочих просфир, за здравие, и за упокой, по единой части выимати определено. В новопечатных же Служебниках, елико от третия просфиры не едину, но девять частей выимати уставляют, толико и от прочих просфир, многая части ис коейждо просфиры, нынешнии архиереи выимать повелевают. Но древнии рукописнии Служебницы, при великих князех писаннии харатейнии и бумажнии, еще же и святых чюдотворцев, яко преподобнаго Димитрия Вологодскаго, тако и прочих, от третия просфиры, не якоже нынешния девять, но едину часть, согласно древлепечатным выимати повелевают: и от прочих просфир за здравие, и за упокой, такожде по единой части, подобно старопечатным указуют выимати.

4: Святая древлеправославная церковь имеюще содержание, по часех пред литоргиею в царских дверех безотлагательства глаголати отпуст. Нынешнии же архиереи в новопечатных своих Служебниках, еже по часех пред обеднею в царских дверех глаголати отпуст, отложиша. Сей же убо отпуст и священнии отцы священным своим собором, иже бе в Москве, при царе Иоанне Васильевиче, в лето 7059, в книзе Стоглаве, неотложно повелевают творити.

5: Во святую и великую неделю пасхи, и в прочия Господьския праздники, и в воскресныя дни, и в седмичныя, на литоргии, на третием антифоне в древлеправославней церкви приглашашеся аллилуиа трижды [во уставах, и Апостолах, и минеях, и триодях]. Нынешнии же архиереи, в новопечатных своих книгах напечатавши, единожды аллилуиа повелеваша припевати. Еже убо трижды, на третием антифоне аллилуиа приглашати, многия древнейшия книги засвидетельствующе утверждают, не точию старопечатныя московския, но и иныя многочисленныя, яко харатейныя, тако древлеписменныя, и белороссийския, ихже отчасти в достоверствие зде предлагаем.

Во Уставе древлехаратейнем, принесеннем из грек, преподобныма Савою и Варсонофием Тверскима. Во Уставе харатейнем, в десть в последовании пятьдесятницы. Во Обиходнице харатейнем. Во Уставе старописаннем болшем.

В книгах московския печати: Во Апостоле печатнем в Москве, в лето 7072, при царе Иоанне Васильевиче, и при митрополите Афонасии. Во Уставех печатных при Ермогене патриарсе. Во Уставе печатном, при Филарете патриарсе. Во Апостолех и минеях месячных, и триодех цветных, и трефолоях тогожде патриарха. Во Уставех, Апостолех, минеях общих и месячных, трефолоях, в триодех цветных печатных при Иоасафе патриарсе. Во Апостолех минеях общих и месячных, триодех цветных печатных при Иоасафе[Иосифе?] патриарсе.

В книгах белороссийския печати: Во Псалтырех с воследованием Краковския печати, печатных в лето 1491. Во Псалтырех с воследованием Острожския печати, выданых в лета 7107. В Часословах Острожских же печатных, лета 1612. Во Уставех печатных в Вилне, в лета 1622. В Служебницех печатных в Киеве, в лета 1620. В книзе новом завете, печати князя Окринскаго в еве, року 1611.

Еще в триодех постных, изданных в Москве, в лето 1664, по описанию их з греческих харатейных, и сербских древних книг печатных.

Во всех сих вышепредреченных книгах на литоргии на антифонах повелевает аллилуия, согласно старопечатным московским, по трижды приглашати.

6: Нынешнии архиереи в новопечатных своих книгах, пред последи поемым трисвятым приложиша, сила, сице: сила Святыи Боже и прочее, яко Скрижаль на листе 673, Ирмологии на листе 157, явствуют. Коего прилога сила, в древлеправославней церкви пред трисвятым певаемаго отнюд не беяше, явственно показуется, яко в древлепечатных книгах его не обреташеся, в древлехаратейных и писменных всячески не имяшеся. В толковых литоргиях древлеписанных на хартии и бумазе несть. Подобне, и в древлехаратейной книзе, евангелии воскресном, преведеном святым Кирилом Философом, в лета 6406, напоследи в толковании литоргии, в трисвятом прилога сего, сила не написано, согласно старопечатным книгам. Но и в преведенной литоргии, святаго Иакова брата Божия, сего прилога несть, в ней же пишет тако: Таже певцы трисвятую поют песнь: Святыи Боже, Святыи Крепкии, Святыи Безсмертныи помилуй нас. Но виждь дерзость их новых учителей, како не устрашишася к толикой и таковой трисвятой песни прилог приложити; юже первее серафими воспеша без прилога, сила. Святый собор четвертый вселенский без прилога же укрепи. Сам Бог чюдом аки печатию некоею запечатле. Якоже святый Иоанн Дамаскин о сем засвидетелствует сице глаголя [книга 3, глава 10; Пролог, лист 93]: Глаголют убо церковную историю сочинившии яко молебствующу в Констянтинополи люду, ради некоего богогневнаго прещения, при Прокле архиепископе бывшаго, случися восхититися детищу от люда, и тако научитися от аггельскаго некоего учения трисвятой песни, Святыи Ьоже, Святыи Крепкии, Святыи Безсмертныи помилуй нас. И абие возврщшуся детищу, и ученое возвестившу, воспети песнь все множество, и сице утолитися прещению. И на святом же и великом вселенском четвертом синоде, в Халкидоне глаголют, сице воспетися трисвятая песнь предадеся. Тако содеянным того святаго синода вносится. Смех убо сущно и играние, аггелы наученную, и наведения престанием веровавшуюся, и толиких же святых отец синодом укрепившуся, и утвердившуся, и первее от серафимов воспевшуюся трисвятую песнь, яко триипостаснаго Божества изъявителную, к’нафея, аки попратися безсловесным, мнением, и убо исправитися, яко серафимы прелогствующаго. Но о самоугодия, да не глаголю безумства! Мы же сице глаголем, [аще и демони растерзаются] Святыи Боже, Святыи Крепкии, Святыи Безсмертныи помилуй нас.

7: Святая древлеправославная церковь определила, в литоргии святаго Иоанна Златоустаго, (еже явствует в Служебниках) целовати диакону святое евангелие. И в самом входе глаголати ко иерею: благослови владыко предложение се. иерей благословит рукою на святая крестообразно глаголя: Благословено предложение священных, и прочая. Сие все ныне в новопечатных Служебниках отложено и несть во употреблении.

8: Древле во благочестивей церкви повелено еже по апостоле пред евангелием, священник взем честный крест, и знаменався им, целует и глаголя: Силою и заступлением, и прочая. И потом благословив диакона. И диакон целует такожде. И еже диакон пред святым престолом творит три поклоны. Сие все в нынешней церкви отставлено и не действуется. К сим же святая церковь повеле диакону пред чтением святаго евангелия возглашати сице: Благослови владыко благовестити благовестие святаго славнаго и всехвалнаго вселенскаго благовестника апостола и евангелиста, имярек. Ныне же сие испревращено тако: Благослови владыко благовестителя, святаго апостола и евангелиста имярек.

9: Святая древлеправославная церковь имеющи содержаще чин, еже пред евангелием и по евангелии, слава Тебе Господи. В нынешней же великороссийстей церкви усугубивше с припеванием поют сице: Слава Тебе Господи, слава Тебе. Но сего прилога, слава Тебе, в древлепечатных и писменных Служебницех отнюд несть. И в протчих старороссийских книгах всячески не обретается. И во Обиходницех монастырьских, Кириловстем и Соловетстем, слава Тебе Господи, без прилога же написано видится. Но и в книзе Старчестве, во главе 35, во Указе чтения евангелия в келии, и в поучении старческом ко ученику, повелевает пети, слава Тебе Господи, без приложения, слава Тебе. И в певчих древних Ирмолоях всюду воображено зрится, слава Тебе Господи, без прилога, слава Тебе. К сим же сие древлецерковное содержание, еже пети, слава Тебе Господи, без прилога, слава Тебе, сам Господь Бог запечатле аки некоею печатию чюдотворением. О чесом блаженный Симеон Метафраст, в житии преподобнаго Даниила Столпника, повествуя о некоем детищи, приведеном к преподобному, еже чюдотворне прия глаголати молитвами его свидетельствует сице [Минея четия древлеписменная в житии Даниила; и новопечатная декабря, в 11]: Егда святому евангелию хотящу честися, и диакону рекшу, от Матфея святаго евангелие чтение, предвари всех отрок, и возопи, слава Тебе Господи.

10: В древлепечатных Служебниках по положении святаго евангелия на престоле повелено литон распростирати на святом престоле, идеже поставити святая. В новопечатных же сие отложено.

11: На великом выходе древлеправославная церьковь повеле священнику и диакону, егда входят в церковь, глаголати: Всех вас да помянет Господь Бог во царствии своем, и прочая. И паки противо западных дверей глаголати: Да помянет Господь Бог всех вас, и прочая. И паки входящим в царския двери глаголати: Благословен грядыи во имя Господне, Бог Господь и явися нам. Сего всего ныне не глаголют священник и диакон.

12: Во святей древлеправославней церкви обычай бе, на велицем выходе, во время херувимския песни, всенародне полагати три поклоны Богу. Ныне вместо того повелено припадати к священнику носящему святыя дары. А иже до земли тогда покланяются, тех глаголют, прельщатися. Якоже в Никоновой Скрижали, идеже пишет тако [Скрижаль, лист 312]: Аже же суть неции, иже поклоняются до земли, якоже прежде освященным даром, егда входит священник, яко мнитмися, прельщаются. Но в древлецерковных святых книгах, сия три поклоны, неотложно повелевает полагати. О чесом ниже предложенныя свидетельства имут явити:

Во Псалтырех в полдесть печатных в Москве, в лето 7154. Во Обиходнице Соловетстем, преподобных Зосимы и Саватия, во главе 13, повелевает, на воскресных литоргиях полагати на херувимской песни, егда понесут перенос, два поклона в пояс, а третий в землю. Во главе же 15, на повседневных литоргиях повелевает полагати, на переносе три поклоны в землю. В книзе Старчестве, во главе 13. Во всех сих вышепредложенных книгах на великом выходе повелевает три поклоны полагати. Но и в Летописце о избрании богоизбраннаго царя на царство Михаила Феодоровича, в чине поставления его повествуется, яко и он полагаше сия три поклоны, в нем же пишет тако: [И егда на херувимской песни сотвориша выход, тогда царь и великии князь снем с себе царскии венец, и постави на златом блюде, и поклонися трижды до земли, и паки на себя возложи царскии венец]. И не токмо в древних но и в той же новопечатной Скрижали, в послании Паисия архиепископа Констянтинополскаго, в сказании литоргии, на велицем выходе поведает со всяцем благоговением людем покланятися ниско, идеже пиша глаголет о священнице сице [Скрижаль, лист 678]: [Молит о всех людех глаголя: Всех вас да помянет Господь Бог во царствии своем. Подобне и людие молятся тожде благоговением и умилением покланяющеся ниско]. В новопечатном же Жезле противохульственно, древлеблагочестивую святую церковь, нынешнии архиереи поносят, сказующе яко бы тогда твари покланяются, яко Творцу. и Божию честь воздают хлебу и вину, подобящеся безумным еллином, не боги за Бога похвалившим. В нем же пишет тако [Жезл новопечатный, лист 42]: [Твари покланяшеся, яко Творцу, Божию честь даваше хлебу и вину. Не сам токмо но и прочих наставляше тако творити. Имже делом уподобися безумным еллином не боги за Бога похвалившим]. И паки глаголют укоряюще: [Понеже хлеб тогда наг совершенныя благодати. убо ему не подобает поклона Божия давати]. лист 42. Коих стретая блаженный Симеон Солунский посрамляя их укорително порицателство, нарицающих предложенныя дары к Богу. идола, сказуя их горших злачестивых никоноборцев быти. Оправдая же поклоняющихся глаголет сице [в книзе 2, во главе 78]: [Да постыдятся хуляще, и еже от Бога отчюждения да убоятся. Ибо не идолослужим мы, божественным даром припадающе, никакоже: но возложенным Богу чрез молитвы даром, и еще несовершившим, честь воздаваем, якоже освященным принесением, якоже принесенным чрез божественныя молитвы: якоже местообразным сущим, тела Христова и крови. Глаголющии сия убо приносящаяся о них, якоже идоли прежде Господня гласа: но прочия молитвы имеют. Кий ответ имети будут весма, иже предложенныя в предложении дары Богу, идола. (оле) именующия. И злочестивых иконоборцев горшыи сии, яко святыя иконы святыя убо, якоже образы истиннии. дары же возложены Богу, и во еже быти тело и кровь Христову, приносимыя. Аще убо священным иконам, честь и поклонение воздавати долженствует, множае, паче самим даром местообразным сущим, якоже Великии глаголет Василии]. книга 2.

13: Премениша в херувимской песни: в старописанных и старопечатных: трисвятую песнь припевающе. Паки в старопечатных, по конце херувимския песни, аллилуия единожды пети повелено. А в новопечатных, аллилуия трижды. Но сего еже трижды пети аллилуия, в древних книгах, яко печатных, тако в писменных, и певчих отнюд не видится. И в самой древнейшей харатейной книзе, в толковании литоргии, святаго Кирила Философа, по херувимстей песни, единожды пети аллилуия засвидетельствуется, в ней же пишет тако: херувимская песнь являет предшествием, и ветреники серафимским образом. И иже видяще мысленныя силы, и лики аггельских сил, невидимо вопиюще песнь аллилуия. есть же и подобно погребению Христову, в нем же Иосиф снем тело с креста, повит плащаницею.

14: Древле во святой литоргии, по херувимстей песни, повелено священнику и диакону полагати три поклоны, пред престолом с молитвою, и прощение творити пред престолом, и целовати святый престол. В новей же ныне литоргии вся сия отставлена. Но приложено вново глаголати пятьдесятый псалом, и тропари умилителныя, а неведомо какия. И вместо еже диакон глаголет: Возми владыко святая: возми владыко, а святая оставлено. И вместо еже диакон возлагает воздух на десное рамо: на левое рамо возлагати новопредано.

15: В древней литоргии, егда священник покрыет воздухом святая, повелено глаголати тропарь, благообразный Иосиф, весь. В новопечатных же точию конец тропаря: Но в третии день воскресе Господь, даруя мирови велию милость, а начало отложено. И приложены два тропаря: Во гробе плотски. яко Живоносец. и паки, благообразныи Иосиф, без конца.

16: Древле в божественней литоргии, егда иерей прием кадило. кадит святая трижды. повелено глаголати сице: Ублажи Господи. [И прочая поряду:] и конец. Тогда возложат на олтарь Твой тельца. Ныне священницы кадяще. вместо единьственнаго числа телца, множественном числом глаголют: Тогда возложат на олтарь Твой телцы. В древлеписменных же убо и печатных святых книгах, везде обретается сие речение, единственным числом, телца, а не телцы. Ибо и сам царственный пророком пророк богоотец Давыд, Духом Святым прорече о телце, имущем заклатися за грехи всего мира на кресте, и датися в снедь верующим вонь, а не о телцах ветхозаконных. Явственно о сем божественный Иоанн Златоустый, толкуя, псалом 50, глаголет: [Тогда возложат на олтарь Твой телца. Сим прообразова страсти Господа нашего Iсуса Христа, причащение святых таин тела и крове Господне. Сии же бо пророк паки бедит ко яди сего телца, глаголя [псалом 33]: Вкусити и видите яко благ Господь]. Псалтырь толковая киевскаго перевода, псалом 50. И паки той же Златоустый, в слове в неделю о блудном сыне, на евангельскую притчю, еже отец обращения ради блуднаго сына, повеле заклати телца упитаннаго, сказует единаго телца, Девыя Сына, на жертвеннице закалаемаго, и не умерщвяемаго, сице глаголя [Соборник, лист 14]: [Приведше телец упитанныи, его же юница девая родила есть, приведше телца питомаго необученаго. (ниже) заколите, иже волею закалаемаго, заколите о животворящаго закалающих Его. заколите закалаемаго и неумерщвяемаго. заколите раздробляемаго, и раздроблющих Его освящающаго. заколите делимаго и неразделяемаго. заколите ядомаго от ведущих Его, и никогдаже иждиваемаго. заколите, иже закалающих Его блаженны соделовающаго, (ниже, лист 15) Таже и аггелом с небесе похваляющим и глаголющим. Свят Отец восхотевыи пожретися Тельцу упитанному. Свят Сын купно и Телец, иже присно закалаемыи, и присно живыи. Свят Утешитель Святыи Дух, иже жертву совершенно действуяй. Сим же внутрь сотворяем, старейшии сын с села пришед, слыша согласия и лики, и призвав единаго от отрок вопрошаше. Что убо суть сия? глас, рече, некии необычен оглашает ми уши. Пророк Давыд внутрь поет [пс. 50]: Тогда возложет на олтарь Твой телца. Той же паки понуждая, ту сущыя ко жрению глаголет [пс. 33]: Вкусите и видите, яко благ Господь]. Соборник, лист 14. И паки той же Златоустый: [Приидите видите на жертвенице, упитаннаго Телца, Агнца Божия закалаема, и не умерщвяема]. в неделю 4-ю поста. И понеже убо сам Бог Отец повеле заклати единаго Телца упитаннаго, Егоже Девая родила. Понеже сам Бог Сын Божий, в священном своем евангелии единаго телца воспомяну, егоже повеле отец блуднаго ради сына заклати. Понеже сам Бог Дух Святый усты пророка Давыда о едином Телце упитаннем, Агнце Божием, прорече. Понеже божественный Иоанн Златоустый, уста Христова, единаго же Телца Агнца Божия, на жертвеннице закалаемаго изъяви. Благоявлено яко древлеправославная церковь исповедающи единаго Тельца нас ради волею пожершагося Сына Божия, глаголаше: Тогда возложат на олтарь Твой телца. Убо нынешнии священницы глаголющии: Тогда возлажат на олтарь Твой телцы, многих телцов изъявляют быти, но киих. не вемы.

17: По кажении древле на святей литоргии [в службе Златоустове], повелено иерею и диакону, пред святым престолом три поклоны положити до полу, глаголюще в себе молитву: Боже очисти мя грешнаго, и прочая. И прощение сотворити, и молитву глаголати пред целованием святых. И по символе, трисвятое глаголати. Ныне же в новопечатных все сие отложено, и не глаголется.

18: Повелено священнику, егда держит над святыми дарами воздух, глаголати символ святыя веры. Но колика и какова несогласия, нынешний священник имать в своем символе с дервлесодержимым святою древлеправославною церковию, виждь.

В древлепечатных:

И во единаго Господа Iса.

Рождена а не сотворена.

И Марии девы вочеловечьшася.

Страдавша и погребена.

Егоже царствию несть конца.

И в Духа Святаго Господа истиннаго.

И во едину святую соборную.

В новопечатных:

И во единаго Господа Iиса.

Рожденна несотворенна.

И Марии девы и вочеловечьшася.

И страдавша и погребена.

Егоже царствию не будет конца.

И в Духа Святаго Господа животворящаго.

Во едину святую соборную.

Божественнии же отцы перваго, и втораго вселенских соборов, сочинивши святый символ, страшными клятвами запечатлеша, во еже бы не ктому кто дерзнул что новое приложити или отложити, или склад и иоту едину пременити. Но якоже предаша Духом Святым наставляеми, тако и да чтется от всех верных, в роды родов вовеки. Якоже о сем преподобный Максим Грек явственно сказует, сице глаголя: [Священныи символ еже есть исповедание православныя веры христианския, изложен бысть первым собором, 318, святых отец, в Никейском граде, при Великом царе Констянтине, изложен бысть ими до сего точию, верую и в Духа Святаго. И вторыи вселенскии собор 150 святых отец собравшихся на духоборца Македония, хуляща на Святаго Духа, и глаголюща Его создана, а не Создателя, приложили святии отцы богословие, еже о Святем Дусе. Третии же во вселенскии собор святых отец, 200, собравшихся во Ефесе на христоборца Нестория. (ниже). Заключи и крепце заповеда страшными клятвами, святыи символ изложенныи прежнима двема соборами, дабы никтоже прочее дерзнул, по малоумней своей дерзости. Ни приложити что отнюд к нему, ни уложити из него, ни едину черту, ни иоту, еже есть ї, ни пременити ни едино речение, ни писмени, от яже в нем, иже изрекоша тако: Аще кто последи дерзнет таково что во святем символе православныя веры, да будет проклят, и чюждь всякаго благословения, и собства христианскаго. (ниже). Не глаголи убо яко мала разнь есть дерзаемое ныне новое аки мудрование. Страшная заповедь их, равне подлагает анафеме, и прилагающаго и отъемлющаго, и пременяющаго наименшее писмя. Недобра убо такова их похвала, да не глаголю дерзость. Под туюже бо анафему, и их подлагает претворящих богодухновенная словеса].

19: В древних святых Служебницех повелено егда речет иерей благодарим Господа, людем возгласне отвещати: Достойно и праведно. Ныне же в службе в новопечатных Служебниках, егда речет иерей: Благодарим Господа, приложено, к достойно и праведно, есть покланятися Отцу и Сыну и Святому Духу Троице единосущней и неразделней. Но сего приложения, еже есть, есть покланятися, в древних книгах печатных писменных, и харатейных нигдеже обретается, и в толковой литоргии, в древних книгах писменных в харатейных, и в древлехаратейной книзе святаго Кирила Философа, всячески несть. Ктомуже в новопечатной литоргии, Иакова брата Божия, к возгласу, егда речет священник: Благодарим Господа; людие вопиют: Достойно и праведно. А приложения сего, еже покланятися Отцу, и протчая, несть. Еще же и Арсений Суханов самобыв во грецех, во 157 годе, написав в книги своей третией части Проскинитария, о литоргии поемей во грецех, повествует: таже патриарх: Благодарим Господа. людие: Достойно и праведно. И виждь разум нынешния церкве и древния. Тогда убо священник подражая перваго священника Христа, иже прежде даже предаде таинство, благодари Богу и Отцу, такожде прежде таинственныя молитвы, понеже священнодействоваше святая призывает людей к благодарению Богу и Отцу, возглашая: Благодарим Господа: Людие исповедающе, глаголют: Достойно и праведно, сиречь благодарити. еже по премногу утверждает и новопечатная Скрижаль, сице глаголющи [Иоанн Нафанаил иерей, в толковании литоргии, глава 100, лист 461]: [Перваго Священника подражая, сиречь Христа, благодаряща Богу и Отцу, прежде даже предати таинство общения, и той прежде таинственныя молитвы, по ней же священнодействоваше святая, благодарение сие творит к Богу и Отцу, Господа нашего Iсуса Христа, глаголя: Благодарим Господа. И всем исповедающим и глаголющим: Достойно и праведно]. глава 100. Ныне же егда священник призывая к благодарению Богу и Отцу, возгласит: Благодарим Господа. Людие иное исповедающе глаголют: Достойно и праведно есть покланятися Отцу и Сыну и Святому Духу, Троице единосущней, и неразделней. Имже своим приложением противоборствует всем преже бывшим святым отцем, паче же всей древлеправославней церкви; но ниже со своими учители соглашается.

20: Святая древлеправославная церковь, во время, егда возглашает священник словеса Господня, приимете и ядите, даже до лет Никона патриарха, не име обычая покланятися. Ныне же нововведеся в нынешнюю церковь обычай странный. Древлеблагочестивей церкви противный. Повнегда бо возгласит священник: Приимите и ядите, абие вси покланяются. Каковый обычай есть латинскаго костела западнаго, отпадшаго благочестия. Доволно сие засвидетельствует, яко западнаго костела обычай, и от новых Иоаким патриарх Московский, иже зело возбраняет на оная словеса Господня полагати поклоны, в слове поучителном. еже чтено бе на соборе, в лето 7198, о поклонех. Яже на возглашение словес Христовых, приимите и ядите. ныне полагают в церкви, сице глаголют [книга Щит веры, в слове поучительном, чтенном на соборе в лето 7198]: [Сие поклонение ново прииде в Россию, от латинских обычаев. (И паки глаголет:) Яко обычай той есть западнаго костела, отпадшаго благочестия. Восточней же церкви, еяже предания, и чины, и обычаи, непретворно вси долженствуем хранити. не есть ниже бысть когда, еже в то время покланятися. (ниже) Имже в то время по древнему отцев наших обычаю. отнюд не подобает быти, ниже сообщницы латином будем, да не с ними и осуждени будем от Бога, отчюждающеся церкве православныя, матере нашея икрения. Глаголют бо закони священнии: Иже аще и малейшее что кафолическия церкве подвизая, есть еретик. И Златоуст святый глаголет: Веру превратиша, и мало нечто ново творят. И паки тойже: В вере, и мало изменяющым анафема. Зде же не малаго но величайшаго предания и обычая православная позывание и предвижение]. книга Щит веры. Понеже бо папежницы римляни, противно святей древлеправославновосточней церкви, яже исповедует предложенным даром, хлебу прелагатися в тело, и вину в кровь Господню, знамением креста и пришествием Святаго Духа, мудрствующе мнят, яко предложенный хлеб претворятеся в тело, и вино в кровь Господню, единеми точию словесы Господними, и сего ради тогда покланяются. Имже, и нынешняя великороссийская церковь последствующи смудрствуя покланяется на возглашение оных словес. Яже бо аще словесы и не являет себе исповедати, яко онеми едиными словесы Господними предложенный хлеб и вино в тело и кровь Господню прелагаются. Обаче самою вещию, самем сим делом показует себе исповедати, яко сими едиными токмо словесы пресуществляется хлеб и вино в плоть и кровь Христову. еже утвержает и Питирим в книзе своей Пращице глаголя [во ответе 192, лист 331 на обор.]: [Святейшии патриарх Иоаким написа, последуя древнему преданию святыя восточныя церькве: Понеже святая восточная церковь имеет мудрование православное, еже на божественней литоргии, предложенныи хлеб и вино, прелагается хлеб в тело Христово, а вино в кровь Христову, молитвою иерейскою, и креста знамением, Пресвятый и животворящий Дух приходит, и прелагается. А костел римскии иное имеет мудрование противное восточней церкве. мудрствует бо прелагатися хлебу и вину, точию едиными словесы Христовыми, того ради и молитву оную, еюже Дух Святыи над предложенныя дары приходит отставили: и узакониша, таковыя ради вины на оных словах покланятися, с тем намерением, яко точию теми едиными словесы предложенная прелагаются, хлеб в тело и вино в кровь, и с таковым мудрованием во оное время, патриарх Иоаким кланятися всеконечне отрече с запрещением, разрушая таковое римскаго костела противное мудрование]. ответ 192.

21: Паки нынешняя великороссийская церковь прияла обычай еретический, западнаго костела римскаго, отпадшаго православныя веры, звонити, егда возглашаются словеса Господня, Приимите и ядите, во един колокол. Коего нововводнаго древле во благочестивей церкви, еже звонити к возглашению словес Господних, обычай отнюд не бяше. Чтоже не бяше сего звону древле в России и в грецех, явственно вся древлецерковныя книги засвидетельствуют. И не точию древлецерковныя, но и от нынешних Иоаким патриарх Московский в новопечатной своей книзе, глаголемей Щит веры в вышепомяненном поучителном слове, в беседе, 3, якоже поклонение оно тако и звон сей отрицает, и обличает, сказуя, яко еже к словесем Христовым звонити, обычай есть западнаго костела. И поносит творящих сие: [Не ведяще суетнии, яко латинское сие нововводство, а не восточныя церкви предание, ниже древнии обычай]. И в лепоту. Понеже бо римляне сопротивно святей древлеблагочестивей восточней церкви мудрствующе, яко оными единеми Христовыми словесы, предложенный хлеб в тело и вино в кровь Христову прелагаются, уставиша почести ради при попе их близ стояще ударяти в колоколчик. По неколицех же летех прияша поляки, с темже костелным мудрованием звонити ко оным словам. По премногу сие утверждает и Питирим епископ Нижеградский, в книзе своего сочинения Пращице, сице глаголя [во ответе 193, лист 332]: [Патриарх Иоаким поминает латинскаго костела мудрование, о преложении святых даров: Понеже у них егда поют оная словеса, тогда при попе их близ стоя и ударяет в колоколчик. По некоторых же летех прияша поляки, с тем же костелным мудрованием, благовестити ко оным словам]. ответ 193. Откуду явственно видимо есть, яко и нынешняя великороссийская церковь, повнегда уподобителне латином, уставила к оным словам Господним в колоколчик звонити, сим своим обычаем от римлян привнесенным в Россию, аще и всеми образы тщится прикрывати себе от смудрствования им, яве показует себе смудрствовати в предложенных даров хлеба и вина в плоть и кровь Христову сими словесы.

22: К сим великороссийская нынешняя церковь, приемши нововводный обычай, противный святей древлевостоней и российской церкви, согласный же униятом и папежником, содержит, ему на литоргии на словеса Христова, иереом и монахом открывати главы. якоже новопечатный Устав, во главе 29, явственно показует. Коего обычая древле во благочестивей церкви всячески не бе. Явственно сие показуется от всех древних святых книг, елико ни во единой от них отнюд обретается таковое повеление, еже бы на словеса Господня открывати иереом и иноком главы. Доволно сие утверждают. Яко не бе сего обычая ни в Грецыи ни в России, и нынешнии гречестии премудрии учители самобратия, Иоаникий и Софроний Лихудиевы, в новосочиненной своей книзе Врачевании сице глаголюще: [Ни во едином святых отец, или синодов, или уставов обрящет кто яко во время Господних словес подобает открыватися иереом и монахом, кроме токмо, в некоем Уставе в новопечатном ныне на российском диалекте, в лето от создания мира, 7190, в главе 29. О еже когда подобает открывати главы. И сие бысть неразсмотрением от исправителя неведуща еллинский диалект, и поверившаго неким книгам, в Киеве или в Полше печатавшимся, от униатов на восточную церковь, в погибель известно душам простших человек. И горе им окаянным растлевшим тако книги святых отец, и смущающим божественная предания. В древних же уставех и новых, (славенских) и греческих не обретается, сие неразсмотривое, и противное православию приложение, еже в словеса Господня открыватися, кроме, якоже прежде рекох, в предреченном новопечатном Уставе, на российском языце токмо]. ответ 10.

23: Древле святая православная церковь, имеющи повеле пред причащением, егда приемлет иерей обема рукама потир со святым покровом, глаголати ему сице [Служебник]: Боготворящую кровь ужаснися человече зря, и прочая. В нынешней церкви в новопечатных сие отложено, и новоприложено: Сие прикоснуся устнам моим, и отъимет беззакония моя, и прочая. И повелено пети, воскресение Христово видевше. и светися светися. и о пасха велия, вся сия до конца. Сего всего в дервлеправославней церкви не бе на литоргии во употреблении.

24: Ныне в великороссийстей церкви привложа повелено глаголати священнику: Спаси Господи своя, и прочая. лик: На многа лета. Коего приложения отнюд в древлеправославней церкви не бе. К сим же новопредано пети: Видехом свет истинныи, прияхом Духа небеснаго, обретохом веру истинную, неразделней Троице покланяемся, Та бо нас спасла есть. Яко бы ныне свет истинный узрели, и Дух небесный прияли, и веру истинную обрели, а дотоле бытто и во тме неведения пребывали, и Духа Святаго не имели, и веры истинныя не обрели. Но что убо; егда ли в древлеправославней церкви, до правления истиннее рещи травления книг Никона патриарха, не видеша света истиннаго, иже просвещает всякаго человека грядущаго в мир [Ин. зач. 1]? И како толь премнози святии в России в чюдесех процветоша, егда не имеша Духа Святаго? И како премногия знамения сотвориша? еда не имеша веры истинныя? И како сице пребезчисленнии святии в нетлении мощей просияша? еда не покланяхуся Троице неразделимей? И како толицы и толь неисчетнии святии спасошася, и наслаждаются в немерцающем свете лицезрения Божия выну? Проявлено яко и видеша, и прияша, и обретоша, и покланяхуся, и покланяемся, и покланятися имамы и имут. Та бо верующих ей истинно и спасла, и спасает, и спасти имать.

25: Святая древлеправославная церковь, по стисе, да исполнятся уста моя похвалы, последующе древлевосточней церкве, име обычай пети аллилуия единожды. Ныне же в церквах сопротивно оному поют, аллилуия по трижды.

26: Древле во святей благочестивей церкви благочестивый обычай содержашеся, еже на отпусте литоргии, егда священник возглашает: Благословение Господне на всех вас. (сие же глаголя) благословляет осенением, креста рукою люди, глаголя: Молитвами пречистыя Ти Матере, и прочая, глаголя: Людие глашают: Достойно есть. Сие в нынешней великороссийской церкви, от лет Никона патриарха отставлено и ни поется.

Прочая приложения, отложения, и изменения (в новодействуемей литоргии) продолжения ради оставляем, оставляем прилоги, отложения, и измены, елики в словесех, елики в речениях, елики в молитвах, елики в возгласех, в тропарех, песнех, и прочих действах речениих, ими же толь премного новопечатании Служебники обогатишася, яко несть молитвы, возгласа, несть периода, несть самыя коммы кия отменами, и приложениями не преправлены, вся сия множества ради претекающе оставляем самим благоразсудителным читателем, желателно потрудитися во оных. Но понеже убо толикия суть, и обретаются в новодействуемей литоргии отмены, толь премногая приложения и отложения в словесех и действах, толь множайшая несогласия к древлецерковному святороссийскому тайнодействию, толь многочисленая и таковая несходства, яже от святых отец клятве предаются, к древлегреческим святым учителем, якоже выше предпоказахом, то како может быти новодействуемое причащение самое суще тело Христово и самая сущая кровь Его? Не вем. Аще бо сие новодействуемое причащение есть сущее тело Христово. Благоявлено яко обрящется и нехотяще, (еже не даждь Боже ниже помыслити кому от сущих христиан) древлеправославныя церкви причащение не сущее быти тело Христово. Аще ли же оно самое сущее животворящее тело Христово было, якоже и было. убо сие новодействуемое безпрекословно несть сущее тело Христово. Зане толикими, и толь премногими отменами приложениями, и привнесениями в тайнодействии своем якоже предрехом, богатообилствующе от онаго разньствуем. И аще новодействуемое несть сущее, како может быти изнурително грехов приемлющаго е? и како приемляй е, приимет самого Христа, егда егда не суща Христова тела причащается? Како же и со Христом будет едино тело, не Его тело ядый? разве со еретики едино тело. И в лепоту, то како возможно прияти е? Аще бо толикия и таковыя отмены, приложения, отложения, и ересей привнесения в новодействуемей литоргии, при тайнодействии причащения содержащияся неприятна суть, како может быти приято новодействуемое причащение? Аще ли новодействуемое причащение лепотствует приимати; Всяко да будут и все вышепредреченныя отмены отложения, приложения, и латинских ересей привнесения при причащении действии, бываемая прията. Аще ли она не суть прията. Убо ниже новодействуемое причащение должно есть приято быти. Убо уне есть, аще весь живот свой, по словеси Иоанна Милостиваго, без причащения пребыти, нежели с еретики причащаяся, со онеми едино тело быти, и с ними купно совселитися во оном веце.

Date: 2015-05-22; view: 479; Нарушение авторских прав