Яко древле не точию иноцы, но и мирстии людие бегаху еретическаго причащения

Откуду последствующе божественных пастырей и учителей, священным гласовом, колицы иноцы, колицы простии народи, отступаху от еретик, да не сообщницы в приятии причащения их бывше сопричастницы и мучению уготованному им будут. еже явственно видимо есть от историк церковных. Сице в житии иже во святых отца нашего Григория Богослова, архиепископа Констянтиня града, повествуется [генваря в 25 день]: Бысть же и нечто таково: арианстеи ереси духом лукавствия потопляющи церковь. (ниже) дано бысть дерзновение пагубным пастырем, и овчею кожею волка покрывающым изгоняти верныя архиереи, и первому Пастырю Христу достойныя, сими бо нецыи страхом убо ужасшеся, ови же ласканьми умягчившеся, или именьми побеждени бывше, друзии же простотою нрава прелстившеся, лщение ересию приемлют, писанием же ручным и приобщением совокупльшеся противным, их же един бе и блаженнаго Григория отец препростием разума удицы впад. Сего страны оныя не терпяще, от общения его отсецают, соотступи же с ними, и от людей часть немалая.

Но и в римстей стране коль безчисленнии иноци, гнушающеся еретическаго причащения, крыющеся бегающе по пустыням и непроходимым местом. О чесом повествуется в житии преподобнаго Антония римлянина [Пролог, август, в 3 день] [латыни отпали в лето 6300, Сергий патриарх ис помяновения извергну папу в лето 6508]: Сей убо преподобный отец наш Антоний, родися в граде Риме от христианину родителю, его же родителя держаста в тайне, крыюще в домех своих понеже Рим отпаде веры христианския. И навыче книжному учению, и облечеся в иноческии образ, и сам отъиде в пустыню, и обрете мнихов крыющихся от еретик в пустыни, в них же бе един презвитер, и едва их преподобныи умоли, еже пострищи его. (ниже) Бывшу же гонению конечному от латин, тоя же пустыни иноци от гонения разыдошася, и не познаша друг друга. Преподобныи же Антонии жительствова при мори в непроходимых местех, на едином камени.

Что же преподобная Мария Голендуха, колико возгнушася сквернаго еретическаго причащения, якоже пишет в житии ея сице [Пролог, июля во 12 день, и минея четия новопечатн.]: По различных убо муках бывши святая во Иеросалиме и поклонившеся животворящему честнаго креста древу, и гробу Господню, и прочим святым местом, прииде в некии монастырь, в нем же злочестиваго Севира бяше ересь, исповедающая божество быти страдателное, аки Отец и Святыи Дух купно с Сыном страдал на кресте. Помолися убо святая к Богу да открыет ей о северианех, аще подобает приступити к причащению их, или ни. И виде ангела держаща два потира, един полн тмы, а другии света исполнен. являя ей, яко потир со тмою, еретическое есть причащение, а иже со светом, то соборныя святыя кафолическия церкве. Возгнушася убо святая еретическим общением, и скоро оттуду отъиде.

Видиши ли како древнии святии гнушахуся еретическим причащением, яко от церквей отступаху, домов своих и обиталищь лишахуся, по пустым и непроходимым местом крыяхуся, всякия тесноты, всякия скорби подъимаху, точию бы не причастным быти им, и ты глаголеши невозможно спастися.