Кииждо от христиан имеяй веру праву и дела добрая, может по мере веры и добродетелей духовне насладатися Агньца Божия

Доволно убо нас научают и святии божественнии отци, пастырие и учители церковнии, яко кииждо от сущих христиан может, по мере веры и добродетелей, причащатися плоти и крове Христовы духовне. Но кто суть таковии? слыши, блаженный Феофилакт архиепископ Болгарский, и святый Никита митрополит Ираклийский. От них же блаженный Феофилакт толкуя божественныя словеса, яже сам Христос пречистыми своими усты рече: Ядыи Мою плоть, и пияй Мою кровь, во Мне пребывает и Аз в нем, трубы велегласнее вопиет глаголя [Благовестник на Ин. зач. 24, лист 105]: [Зде воньми разумне о причащении тела и крови Господни, како подобает веровати, ядыи Мою плоть, и пияй Мою кровь, во Мне пребывает, и Аз в нем. И ты можеши не токмо по тайному причащению ясти и пити плоть и кровь Господню, но по иному образу. Ибо плоть яст кто, егда по детели проходит действенное, нуждна бо делателна плоть. якоже и детель есть трудна. Кровь же пиет яко вино веселящее сердце, виденне глаголю, яко безтрудно виденное, паче же труду покой, зане питие без труда паче, нежели брашно]. Благовестник на Иоанна. Виждь разум словес блаженнаго Феофилакта. Первее рече: И ты можеши не токмо по тайному причащению ясти и пити плоть и кровь Господню. Что есть по тайному причащению? По тайному причащению есть, егда кто приемлет усты и сердцем в чистей совести, животворящее тело Христово, под видом хлеба, и пречистую кровь Его, под видом вина, по преданию Господню. Но и по иному, рече, образу. По коему иному образу? По добродетелному. Егда кто содержит без нарушения веру святыми апостолами преданную, седмию вселенскими соборы запечатленную, егда кто всяцем образом тщится проходити житие свое добродетельми украшенное: Чесому нас по премногу научает блаженный Никита иже от Ираклии сице глаголя [в толкован. на стих, втораго слова на святую Пасху, святаго Григория Богослова, Соборник, лист 635]: [Причастятбося божественному Агньцу и Слову по коегождо уда мысли, кождо по своем чине и силе, и данней тому благодати Духа. рекше: Главы убо, иже от неуказателных начал свободна отнюд имущу яже о богословии словеса веру имея. ушию же, иже божественная словеса с художеством приемля, и послушлив Богови тех ради, даже до смерти бывая. очию же, иже тварь духовне разумевая, и вся яже по чюству же и уму словеса непреткновенне во едино славы Божия собирая исполнение. Перси же, иже сердце богословных исполненно имея видении. Руку же, иже ничтоже отъиде по заповеди дел леностию совершая, но все имея готово и доблественно ко исполнению божественных законов. Души, еже по детели действо. Утробу же, иже раждательное души присно, поточно имея умножимо духовными видении, и несгараемо воспалителное к божественно смешению, безстрашнаго желания рачительство имея. Внутренним же, иже сокровеннейшим взысканием же и разумом, ума глубины Божия испытуя, и неизреченных насыщаяся таинств. Стегнома же, иже слово надлежимо имея душевно, и страстной части, и весма отрицая той вещное движение. Колену же, иже к лежащим и недугующим, верою милосердне по промыслу прекланяяся, и еже к нам Слова воспевая схождение. Голени же и ноги, иже при вере и добродетели и разуме, непоколебима имея душевная шествия, и незыблема. Сице снедаем и приобщаемся комуждо по мере Агнец Божии бывает, претворяя к себе Духом причащающихся]. Ельма же убо всеми уды человек проходя добродетелное житие, желаяй огнепально причаститися плоти и крове Господни, но не могий, причащается по силе и мере добродетелей божественныя благодати. Тем и рече святый Феофилакт, но и по иному образу. ему же согласно и святый Никита Ираклийский изъявляет, яко кииждо от праве верующих во Христа Бога, и проходящих добродетели, по мере веры и добродетелей причащается плоти и крове Христовы, сице глаголя [в толковании, стих 26, втораго слова св. Григория Богослова, Соборник, лист 687]: [Якоже кождо веровавших Богу, по своей силе духовне Христу сраспинается, по действу греха, овым убо единому и самым тем страстем, ов же ниже о страстех воспоминанием. Сице кождо нас в дому некоем особочинием, еже по добродетели прикладствующе ему устроения, закалает Агнец, и прищащается Тоговы плоти, и насыщается Iсусом. Комуждо бо свой бывает Агнец Iсус Христос, якоже кождо вмещати, и ясти Того может по мере, яже в коемждо веры, и благодати подаемыя от Духа. Овому убо сице, овому же сице, обретается весь всему, и всем вся бывая]. стих 26, на святую пасху. Зде убо вонми прилежно. Аще по сказанию блаженнаго Феофилакта глаголющему: И ты можеши, не токмо по тайному причащению ясти и пити плоть и кровь Господню, но и по иному образу, рекше, по мере веры и добродетелей. Аще по научению Никиты Ираклийскаго, кождо нас верных в дому некоем особочинием, еже по добродетели прикладствующе ему устроения, закалает Агнец, и причащается Тоговы плоти и насыщается Iсусом. Комуждо бо свой бывает Агнец Iсус Христос, якоже кождо вмещати и ясти Того может по мере, яже в коемждо, веры, и благодати подаемыя от Духа. Чесо ради в толикое нужды время, егда благочестивосиятелнаго архиерейства во всех концех России не ощущаем, егда православнаго священства отнюд не обретаем, от него же бы годствовало причаститися, телу и крове Господни, невозможно, иже туюжде православно кафолическую веру, юже святии апостоли насадиша, святии отцы соборне утвердиша кроме всякаго примесу ересей имать, иже тыяжде содержит догматы, ихже Господни ученицы предаша, иже таяжде соблюдает предания, яже святая древлеправославная церковь содержала и содержит, иже тщится житие свое, поелику сила есть, добродетельми украшати, желая вкусити устнами плоти и крови Христовы, по тайному образу, но не могий, по иному образу, рекше, по добродетели прикладствующе ему устроения, закалати Агнца, и причащатися Того плоти, и насыщатися Iсуса? Поистинне беспрекословно может. Зане комуждо свой бывает Агнец Iсус Христос, якоже кождо вмещати и ясти Того может по мере, яже в нем веры, и благодати подаваемыя от Духа. Аще бы невозможно было имущему веру непорочную веру христианскую, веру святоотеческую, и добрая дела, и огнепалне желающему прчаститися плоти и крове Христовы, но не имущему где, толиких и таковых ради благословных вин, ихже многократне воспомянухом, без причащения приумножение благодати Божия прияти: не бы блаженный Феофилакт рекл: И ты можеши не токмо по тайному причащению ясти и пити плоть и кровь Господню, но и по иному образу, сиесть с верою правою проходиши житие добродетельное. Не бы святый Никита Ираклийский глаголал: Яко кождо нас верных в дому некоем особочинием, еже по добродетели прикладствующе ему устроение закалает Агнец, и причащается Тоговы плоти, и насыщатися Iсусом. Но понеже и божественный Феофилакт и святый Никита, согласно научают, яко кождо верных может по мере добродетелей, закалати Агньца, и причащатися Тоговы плоти, и насыщатися Iсусом. Убо и ныне кождо нас верных, не имея где причаститися чювственне животворящия плоти и крове Христовы, может особочинием, еже по добродетели прикладствующе ему устроения закалати Агньца, и причащатися Того плоти, и насыщатися Iсуса. Понеже комуждо свой бывает, по словеси Никиты, Агнец Iсус Христос, якоже кождо вмещати и ясти Того может по мере, яже в нем веры, и благодати подаемыя от Духа. И аще тако есть, якоже и есть, убо и ныне кийждо от имущих веру праву, и дела добрая, закалает Агнца и причащается Тоговы плоти, по мере веры и добродетелей, и насыщается Iсуса, может всякаго кроме прекословия, наследник царствия небеснаго, снаследник же Христу быти.