КЪУТÆРТЫ САБАЗДЖЕРИЙÆН

Тухи кæй кæныс, уый зоны мæ зæрдæ,

(Зæдты тæрхонæй нæ тухи фæцис.)

Хъусын нæ хæхтæй æз ризгæ дæ хъæртæ...

Зонын æз, рагæй мæ низ у дæ низ.

Цардыстæм. Мидæгæй федтон дæ зынтæ,

Хуылфы дæ зæрдæ куыд риссы дæуæн.

Федтон: дæ хуылфы зындзинады тынтæ

Саутар хæлуарæг нывæнды дæуæн...

Хъусын, уынæргъыс мæнау ды дæ риуæй,

Бирæ хъæдгæмттæ дæ зæрдæ ныццис.

Зонын, цъæх ихтæ хæрыс ды Зæриуæй,

Ихæй нæ кæны, нæ, къаддæр дæ низ...

Ацыдтæ. Хизыс ды къæдзæхты сæртæм,

Ризы, дзыназы дæ хъæлæс дæуæн,

Ничи ныккæуы нæ хæхты дæ хъæртæм —

Хæхтæ фæзæлынц дæ хъæрæй дæуæн...

Хъусыс ды, хъусыс, дæ хъус дæ нæ сайы:

Чидæр дæм дзуры кæцæйдæр, сæрæй.

Нæ, уый дын къæдзæх дæ зæрдæ фæсайы,

Дзуры дæ дзырдтæ: «Уæууæй, гъе, уæууæй!»

Хæхтæй æнкъардæй ды размæ æрцæуыс,

Феныс ды тигъыл уæ хæлддзаг мæсыг.

Гъемæ уæд рагъæй æцæг ды æркæуыс,

Зæхмæ фæкалыс æнæвгъау цæссыг...

Денджызы былмæ æз дæр ам фæцæуын,

Зарын-дзыназын... Æз курын цыдæр.

Денджызы былыл дæуау æз фæкæуын,

Хъусын æрмæст-иу, уæ, денджыз, дæ хъæр...

Денджыз тызмæгхуыз йæхи тынг ыскæны,

Тындзы, фæлдахы уылæныл уылæн,

Гъемæ йæ былтæ мæсты цæф ныккæны,

Пырх-иу ыскæлы мæхимæ мæнæн.

Хъусын æз, дымгæ йæ сæрты фæхъазы,

Зилы, æхситтæй фæсуры кæйдæр...

Ниуы. Кæуылдæр цыма уый дзыназы...

Афтæ фæкæуын, дзыназын æз дæр...

Афтæ-иу хъарæг мæнæн ды фæкæныс.

Зоныс, фæкæуын дæуæн-иу æз дæр.

Иры дзæбæхмæ, нæ зæрдæ, фæбæллыс,

Ирыл кæуынæй фæриссыс ды дæр.

Афтæ кæрæдзийæн хъарæг фæзарæм,

Афтæ нæ царды æрвитæм кæугæ.

Афтæ нæ зардыл нæ цæссыг лæдарæм.

Ку ды, нæ Йрыл кæугæ ды, кæугæ!

***

Æгæр тынг æфхæрд дæн фыррæстæй,

Зæрдæмæ кæсыныл фæдæн.

Æвзæр зын, зæрдæхор ныхæстæй

Мæ зæрдæ та судзы мæнæн.

Æвзæр зонд, галиу ныхæстæ

Фæсафынц мæ фæндтæ мæнæн.

Æнæфыст ныр зайынц мæ хæстæ,

Мæнæн нæй хæсимæ цæрæн...

Нæ хуссарон уазал дымгæйæ

Мæ хортæ, мæ хостæ — дæрæн...

Нæ фæззæджы — гутонгæнгæйæ...

Рæстæй дæр кæмæн нæй цæрæн...