Аще и нужно есть причастие животворящих таин Христовых ко спасению, обаче не имущу где причаститися, может спасен быти

Пресвятый и пречистый Владыка и Спаситель рода человеческаго, Iсус Христос Сын Божий, и Бог, благоволением Отца, и советом Пресвятаго Духа, пришедый на землю спасти род человеческий, егда на тайней своей вечери, на ней же предаде божественным своим учеником, пресвятую свою плоть ясти, и пречистую свою кровь пити, чрез них же и всем верующим вонь, да, иже достойне снедят плоть Его, и испиют кровь Его, наследницы будут царьствия небеснаго, снаследницы же Ему, возлеже, рече [Мф. глава 28, зач. 108]: Приимите и ядите, сие есть тело Мое, еже за вы ломимое, во оставление грехов. Таже приим чашу, благослови, и рече: Пийти от нея вси, сия есть кровь Моя новаго завета, за вы, и многия изливаемая, во оставление грехов. Кая словеса своя пребожественная благоизволи, да вечно непреступнейшима пребудут, от верующих вонь, утвердити, рече: Ядыи Мою плоть, и пияй Мою кровь, во Мне пребывает, и Аз в нем. И паки: Аще не снесте плоти Сына Человеческаго, и пиете кровь Его, живота не имате в себе. Ядыи Мою плоть, и пияй Мою кровь, имать живот вечныи [Ин. глава 6, зач. 24, и 27]. Сия словеса Господня нецыи от зелных ревностнолюбителей, слышаще и ведяще, всеми силами, всяким усердием, тщатся исполнити. глаголют бо, яко отнюд невозможно не причастившуся святых божественных таин, наследником царствия небеснаго быти, аще и вся добродетели совершил. Понеже сам Господь пречистыми своими усты рече: Аще не снесте плоти Сына Человеческаго, и пиете кровь Его, живота не имате в себе. Ядыи Мою плоть, и пияй Мою кровь, имать живот вечныи. Вемы воистинну вемы и мы, яко сия словеса Христа Бога нашего, елико всякаго достоверства, и благоговейнаго почитания достойна суть: толикаго и прилежнаго во тщании исполнения требовательна, во еже всякому всегда причастнику быти животворящия плоти и крове Господни, во освящении души и тела, в наследия живота вечнаго. О чесом вси верующии во Христа, а наипаче всем сердцем спастися ревнующии, огнепалное желание присно являти усердствуют. Сия словеса пречистаго Владыки Христа Бога нашего и мы, аще и грешнейши всех есмы, и несмы достойни таковаго божественнаго дара, во еже причастниками быти животворящаго тела Господня, и пречистыя крове Его, огнепалне всеми силами, всяким тщанием, всем усердием, да наследницы будем небеснаго Его царствия, снаследницы же Ему, исполнити желая желаем: но не можем. Яко видим великороссийскую церковь различными пестротами ересей преиспещрену. Яко видим в ней обливаемое крещение с трипогружателства крещением за равносилное содержимое. Яко видим в ней премногая привложения, отложения, и изменения древлеправославных догматов. Яко видим литоргию не на седмию, по преданию божественных отец, и содержанию древлеправославныя церкве, но над пятию просвирами, совершаему. О часом напреди имамы пространнее глаголати. Яко не имамы благочестиво сиятелнаго архиерея, от него же бы производилося православное священство. Яко не имамы православнаго иерея, от него же бы предложенныя дары, нашествием Пресвятаго Духа, пресуществилися в плоть и кровь Христову. Понеже не имать православно христианския веры. Не имея же истинныя православно христианския веры, не может и совершити, во еже бы предложенный хлеб и вино пресуществилось в плоть и кровь Господню. И слыши о сем древлеправославную церковь сице вопросоотвещателне вопиющю [Катихисис велик., глава 4, лист 210]: [Вопрос: Истинныя ли и правыя пресвятыя тайны Христовы суть у еретиков? Ответ: Понеже они истинныя и правыя веры Христовы не имут, то како пречистыя и святыя тайны Христовы у них быти могут?]. Катихисис великий, глава 4. Яко обретается от божественных отец, пременений, и привложений, и отложений ради под клятвою, о чесом доволно показахом в первой части, и напреди имамы рещи еще. Чесо ради таинство Христово, сиречь животворящее тело Его, и пречистая кровь не может от него совершитися. Якоже сему явственно научает блаженный Иоанн митрополит Никейский, сице взывая: [От анафемы благословение не бывает, и от проклятия молитва не исходит. от диавола Христово не совершается таинство]. в слове обличителном на армены. Что убо, рцы ми; Аще кого случай не допустит причаститися животворящаго тела Христова, и пречистыя крови Его, за неимением православнаго священника, может ли имый веру праву, и дела добрая, спасен быти? или ни? Речеши ли ни. Како убо сам пресвятый Владыка наш Iсус Христос пречистыми своими усты рече [Ин. зач. 10]: Тако бо возлюби Бог мир, яко и Сына своего единороднаго дал есть, да всяк веруяй вонь не погибнет, но имать живот вечныи. И паки [зач. 11]: Веруяй в Сына, имать живот вечныи, а иже не верует в Сына, не узрит живота. Зде рече Владыка наш Господь Iсус Христос о иже верующих вонь. Где убо глаголет о творящих Его пресвятыя заповеди, и како? Глаголет бо у тогожде святаго евангелиста Иоанна сице [Ин. зач. 48]: Имеяй заповеди Моя, и соблюдай их, той есть любяй Мя, а любяй Мя, возлюблен будет Отцем Моим, и Аз возлюблю его. Таже навед рече [ниже]: и к нему приидева, и обитель у него сотворива. Зри, первее рече: всяк веруяй вонь, сиречь, в Сына, не погибнет, но имать живот вечныи, таже: имеяй заповеди Моя, и соблюдаяй их, той есть любяй Мя, а любяй Мя, возлюблен будет Отцем Моим, и Аз возлюблю его, и к нему приидева, и обитель у него сотворива. И аще всяк веруяй праве в Сыне, и заповеди Его божественныя соблюдаяй, не погибнет, но имать живот вечный, к нему же Отец и Сын приидета, и обитель у него сотворита. То како не имать таковый спасения получити? всяко получит. Понеже бо аще к имущему веру правую, и соблюдающему заповеди божественныя, Отец и Сын приходита, и обитель у него сотворяета, всякому проявлено, яко и вселяется. Аще же вселяется, безпрекословно, яко той есть сосуд Святаго Духа, избран честен и свят. Понеже и священник повелевает к святым, святым приступати. Сице бо возглашая глаголет: Святая святым. Якоже и святый Иоанн Златоустый глаголет [в толкован. на Мф.]: Святая святым, сиречь. Аще кто несть свят, да не приступает. не просто бо рече, от грех чист, но свят. И аще свят освящаем сыи верою правою, и делы благими, прежде даже приступит ко святым, есть яве, яко таковыи и прежде приятия есть наследник царствия небеснаго, аще же есть наследник царствия небеснаго, убо и спасен. Откуду богоявленно, яко, аще кто, иже имать веру праву и дела богоприятная, и не сподобится причаститися животворящия плоти Христовы, и пречистыя крове Его, не за ино что, но благословных ради вин, каковых ради и ныне невозможно есть, может спасение получити, и наследником царствия небеснаго быти.