Премнози древлежительствующии по пустыням, не причащахуся святых таин, овии чрез многая лета, овии же чрез всю свою жизнь, обаче спасошася

Воззри токмо в древняя времена, посмотри в прешедшая лета, и абие не неимаши уразумети, колиции преподобнии мужие, колицы пустынножителие, в самое цветение благочестия, в самое сияние православия, ни единому гонению належащу, ниже кому от еретик церквами святыми обладающу, во удалении от всея вселенныя жительствующе в пустынях, не причащахуся чювственне животворящия плоти и крове Христовы, обаче святи и богоугодни суть, и ныне на небесех насыщаются лицезрения Божия, какови быша:

Преподобный Марк Фряческий, иже 95 лет в пустыни живый, отнюд человека не виде, и святыя евхаристии устнами не вкуси, обаче чрез добродетелное житие свое выну насыщаяся благодати Божия, свят и любезен Богу паче всех живущих в мире явися.

Сицев бе и преподобный Петр Афонский, иже 53 лета в пустыни жития своего препроводив, человека не виде, и божественныя плоти и крове Христовы причаститися не име, обаче чрез высокое жития своего святаго, сосуд вожделен Богу, святейший паче всего мира бысть [июня 12 дня].

Сицев бе святый Феофан, иже во Антиохии, иже сам себе крести, и блудницу от идолопоклонения обратив крести, яже оба благочестно пожиша, не имуще святых таин устнама причаститися: обаче чрез богоугодная дела присно благодати Божия причащастася, и к Богу благоугодне преставися [Пролог, июня в 10 день].

Сицев бе преподобный Павел Фивейский, его же обрете преподобный Антоний Великий, иже чрез все свое пребывание в пустыни, не вкуси устнами божественнаго причащения: обаче чрез богоугодное жития своего выну насыщаяся благодати Божия, паче тем живущих в мире и причащающихся устнами, святейший Богу и любезнейший явися [Пролог, октября в 30 день].

Сицев бе некий епископ, иже не стерпев мук иже пожре идолом, последи же бежа в пустыню, и поживе в хиже, 39 лет, в покаянии, сей чрез толь долговременное жития не име где причаститися: обаче неусыпных ради трудов своих и слез, прия от Бога прощение, и чрез высокое жития своего причащаяся благодати Божия, явися свят и Богу любезен паче многих причащающихся его же обрете епископ града Сухейска, во мнишестве суща, по смерти же его финик, от него же питашеся, усше, и хижа падеся [Пролог, октября в 3 день].

Сицев бе некий отшелник, о нем же повествуется в житии святаго Савы Освященнаго, сице: ходя святыи Сава со учеником Агапитом по пустыни, обрете отшельника прозорлива, иже блаженнаго именем нарече, и известив о себе, яко пребывая ту лет 38, ни единаго виде человека, потом паки в пустыню отъиде. и егда возвратився хотя еще его видети, обрете его скончавшася, и погребе его в той же пещере. Кий прозорливый отец, чрез толикое время пребывая в пустыни, и ни единою причастися божественных таин, обаче благодати Божия непрестанно, чрез богоугодное жития своего насыщаяся, яко и прозорливства сподобися, свят и богоугоден явися [декабря в 5 день].

Такова бяше преподобная Мария Египетская, яже 47 лет в пустыни живущи, и святых таин усты не причащающися: обаче чрез добрая дела присно благодати Божия причащашеся, и Христа внутрь себе имеяше, небеснаго царствия сподобися [Пролог, апреля в 1 день]. Такова бяше Феоктиста, иже 30 лет во острове живущи, устнама плоти и крове Христовы не вкуси: обаче высокаго ради жития своего, благодать Божию присно в себе имущи, в небесныя кровы свято преселися. Такова бяше святая мученица Дросида, яже сама себе крестила, и никогда же животворящих таин Христовых устнама вкусила: обаче чрез веру и усердие, имущи в себе благодать Божию, ко Господу отъиде [Пролог, октября в 30 день].

Такова бяше некая старица, юже обретоша два старца, в час скончания ея в пещере, яже не имущи где вкусити устнама божественныя плоти и крове Христовы, удаления ради церковнаго, без причащения преставися: обаче выну имущи в себе благодать Божию, в райская селения святопреселися [Пролог, октября в 30 день].

Такова бяше некая преподобная жена яже в пустыни 60 лет живущи, ни единаго от человек виде, юже обрете некий мних на камени седящу, яже такожде не имущи где причастися животворящих таин Христовых, без причащения преставися: обаче высокаго ради жития своего непрестанно насыщаяся благодати Божия, от пустыннаго жития преселилася в царствие небесное, юже егда погребе старец он в пещере ея, в ней же жительствоваше, абие от святаго тела ея прозре слепым оком [Пролог, ноября в 1 день].

Сии святии, и инии множайшии пустынножителнии мужие и жены, удалившеся от вселенныя, в самое то время, егда благочестие аки солнце в поднебесней сияше, егда православие во всех концех вселенныя процветаше егда благочестивии архиереи во всем мире апостольския престолы украшаху, егда православнии иереи всюду в Божиих церквах безкровныя жертвы приношаху, не сподобишася усты вкусити пречистых и животворящих таин Христовых, за неимением близ себе священника. обаче не воспротивишася тем своим непричащением, словесем Господним, ниже умалиша своего спасения: но чрез веру и желание и житие добродетелное, присно благодати Божия причащахуся на земли отчасти, на небесех же лицем к лицу божественнаго светолития совершенно наслаждаются. О них же преподобный Ефрем вопиет глаголя: [Славу юже поют в горах же и в вертепах жертва благоприятна приносится Богови. Сами суть священницы себе, и исцеляют наши недуги молитвами своими]. слово 111. Что убо еще ли возглаголеши, яко невозможно есть не причастившуся животворящих таин Христовых, спасение получити, яко сам Господь рече [Ин. зач. 23]: Аще не снесте плоти Сына Человеческаго и пиете кровь Его, живота не имате в себе? И како толици и таковии святии пустынници иже в пустынях жительствующе, никогдаже устнами вкусиша божественныя плоти и крови Христовы, спасошася: Их же святая церковь памяти торжественне воспрославляет. Аще бы невозможно непричастившуся плоти и крови Христовы спастися: не бы и сии вышеименованнии преподобнии пустынници спаслися. Но понеже толици и таковии, и инии множайшии преподобни пустынножителницы тогда егда престолонаместници апостольстии всюду по вселенней благочестивии быша, егда священници во всех странах поднебесныя православни быша, [им же бы возможно от пустынных своих жителств изшедшим причаститися, от православных священников, и паки возвратитися, но сего не сотвориша, от пустынных своих жителств не изыдоша, и от православных священников не причастишася, о них же явственно от повествований житийных показуется] не вкусиша устнами животворящия плоти и крове Христовы, обаче чрез веру и усердие и житие добродетелное присно оных благодати насыщахуся, ныне же святопресельшася в ликовствующей церкви на небеси лицезрения Божия непрестанно насыщаются. Чесо ради ныне в толикое нужды время, егда благочестием сияющых архиереов ни во единой от стран вселенныя не слышится, егда православнаго священника, от него же бы подобало было причаститися, нигде в подсолнечней не видится и несть, невозможно имущему веру правую и дела добрая, не вкусившу усты божественныя плоти и крове Христовы, присно огнепальне желающему, но не имущему где получити, наследником царствия небеснаго быти? поистинне возможно и будет.