D Dialogtekst 2

PÄRAUDTESTANCIJAS

Timoi: San-ik veda sinun matklipaz? Pidab rigehtida. Muštad-ik, konz lähteb sinun jonuz?

Nastoi: Muštan, päliči poles časud.

Timoi: Oled-ik varmed? Kackam aigplanha… Ka, sinun informacii om oiged.

Nastoi: Minä olen varmed. A sinä ed uskond!

Timoi: Jonuz lähteb kümne časud koumanden platformannopäi i tuleb Pskovha vižtoštkümne časud kaks’kümne minutad. Nügüd’ mö ostam sinei biletan. Naku om kass. (kassirale) Olgat hüvät, antkat minei üks’ bilet Pskovhasai.

Kassir. Koumesadad rubläd. Otkat teiden bilet.

Timoi: Kitän. Nastoi, mängam jonusennoks. Oho, kacu, sinun jonusen vedab uz’ lokomotiv!

Nastoi: Ka… No se ei veda hotkemba.

Timoi: Tahtoid-ik lugeda midä-ni matkan aigan? Naku om pressan kiosk.

Nastoi: En teda… Osta minei aiglehtez.

Timoi: Mitte aiglehtez ostta?

Nastoi: Osta „Burda moden“.

Timoi: OK. (ostab aiglehtesen) Naku, ota.

Nastoi: Kitän, minun kalliž. Anda minei matklipaz, minä mänen vagonha jo.

Timoi: Konz-ak tuled tagaze?

Nastoi: Konferencijan jäl’ghe minä tahtoin völ elähtada pordon aigad Mašanno… En ole nähnu händast amu jo. Tulen päliči kahtes nedališ. Ed-ik surdu minun päle?

Timoi: En, en, mikš?.. Vaiše kellota minei, konz tuled Pskovha. Toivotad-ik?

Nastoi: Tetpas, armaz. Nägemižhesai!

Timoi: Čomad matkad! Nägemoi!

varmed – здесь: уверенный; oled-ik varmed – ты уверен(а)

aigplan – расписание

aiglehtez – журнал

matklipaz – чемодан

elähtada – пожить (некоторое время)

Küzundad i harjoitused.

1. Käkat tekst venäkel’he. Ümbristarinoikat se.

2. Antkat vastused küzundoihe:

Kuna ajab Nastoi? Äjak maksab bilet Pskovhasai? Mikš Timoi tahtoib kacta aigplanha? Konz Nastoin jonuz lähteb pästancijaspäi i konz se tuleb Pskovha? Miččen aiglehtesen osti Timoi kioskas? Konz Nastoi takaib ajada tagaze?

3. Tehkat sanutez (dialogata): minä olen raudtestancijas i takain lähtta toižhe lidnha.

Tarbhaižed virkehed (полезные выражения):

Ole punktualine!

Ala möhästu! – не опаздывай!

Algat unohtagoi – не забывайте

Osta bilet Petroskoihesai!

Kodvgat aigplanan mödhe, konz lähteb jäl’geline jonuz Mosvahasai.

Ostan aiglehtesen: matk om hätkeline.

Pakitoitan biled aigvodhe. – Закажу билет заранее.

Ühesanz’toštkümnenz’ urok