Ajamine lidnantransportas

Minä takain ajada sebranikannoks, kudamb eläb toižes lidnanpoles. Küzun vellel:

Tedad-ik, kut voib putta Vihandale irdale? Pidab-ik ajada mil-ni?

A voi, tedan. Sinnä mäneb videnz’ trolleibus vai koumanz’ tramvai.

Kitän!

I minä lähten trolleibusan azotandale. Varastan hätken. Jäl’gmäi tuleb videnz’ trolleibus, no siš om sagedan rahvast. Varastan völ... Päliči kahteskümnes minutas tuleb völ üks’ videnz’ trolleibus, i siloi minä töndun matkha.

Konduktor sanub:

Hüväd passažirad, olgat hüväd, mängat trolleibusan ezipol’he! Ostkat biletad, voib tulda kontrolör.

Äjak maksab bilet?

Trolleibusbilet maksab vižtoštkümne rubläd. Otkat bilet! Kel ei ole völ biletad? Vaumikat henoid rahoid!

Lähtet-ik jäl’ghižel azotandal?

En, minä ajan edemba.

Pästkat mindai lähtendannoks. Kitän!

Naku om čoma Vihand ird. Nece nimi om oiged: naku om leved bul’var (vai puird). Minä lähten trolleibusaspäi i ecin tarbhašt pertid. Fateran uksenno nägen kellon kingitimen i kellotan. Ei ole nimittušt vastust... Minä kellotan völ kerdan; ozaks, toižes fateraspäi lähteb minun sebranikan sused.

Hüväd päiväd! – sanun minä hänele. – Et-ik tekoi statjaks, kus voib olda ižand Raud?

Hän ajoi eglai Oranienbaumha: sigä om hänen lidnantagaine pert’. Minai om hänen mobil’telefonnomer; ku tö tahtoit, san antta sen teile.

O, antkat sen minei, olgat hüväd!

Kirjutagat: plüs seičeme, ühesasadad nell’, koum’-nell’-uks’, kuz’kümne, nell’kümne kaks’. Kirjutit-ik?

Toštkat völ kerdan...

Sused toštab.

Kitän! Nägemižhesai!

Nägemižhesai! Čomad päiväd.

ezipol’ – передняя часть

henod rahad – мелкие деньги

jäl’ghine = jäl’geline – следующий

kell – звонок

kellotada – звонить

kingitim – кнопка

lidnanpol’ – часть города

lidnantagaine – загородный

lähtend – выход

ozaks – к счастью

sagedan rahvast – полно народу

azotand – остановка

statjaks – случайно

äjak maksab – сколько стоит

Harjoitused.

1. Käkat tekast venäkel’he. Ümbristarinoikat se.

2. Antkat vastused küzundoihe:

Kuna minä takain ajada? Kut pidab ajada Vihandale irdale? Äjak maksab trolleibusbilet? Mikš Vihand ird om oiged nimi necen irdan täht? Om-ik sebranik kodiš? Kuna hän ajoi? Mikš?

3. Mitte kundaline transport om teiden lidnas?

4. Tehkat sanutesed: „Minä ajan lidnadme kundaližel transportal“, „Meiden lidnan kundaline (общественный) transport: problemad da perspektivad“.