Egzamenan aigan

Tämbei, nellänz’päivän, ezmäižen openduzvoden üläopenikoil linneb vepsän kelen egzamen. Kaik üläopenikad oma jo auditorijas i varastadas. Tuleb opendai. Hän tob egzamenbiletoid. Hän om andnu kaikile küzundoid aigvodhe jo, i hänen südäimentundištuz om tün’. Hän om amu ranu kelen opendajan meiden universitetas. No üläopenikad holdudas... Pagištas, nece egzamen om jüged.

Otkat biletad! – muhadab opendai. – Heitkat holed! Tö kaik tedat!

Üläopenikad üksin ottas egzamenbiletad.

Teil om üks’ čas, miše augotada vastused, sanub opendai i avaidab mel’hetartujan sanktan kirjan.

Päliči kahteskümnes minutas üks’ neižne küzub:

Sab-ik minei antta vastust?

Tetpas, sab! – sanub opendai. – Tulgat tänna!

Neižne lugeb biletan küzundad:

Ezmäine küzund – südäisijakändod. Toine küzund – oiktoiden verboiden kändluz prezensas.

Olgat hüväd, antkat vastused.

Neižne starinoičeb vepsän kelen südäisijakändoiden polhe – inessivas, illativas da elativas. Hänen tedod oma hüväd.

Starinoikat verboiden kändlusen polhe, pakičeb opendai.

Neižne andab vastust toižhe küzundha petusita.

Hüvä om, ihastub opendai, minä voin panda teile vaiše vižnik!

Üläopenikan lähtendan jäl’ghe hän varastab pordon aigad i küzub:

Om-ik naku toižid ičetahtnikoid?

Om, om! – saneltas auditorijas.

aigvodhe – заранее

augot|ada (-ab, -i) – подготовить

iče||tahtnik (-an, -oid) – доброволец

kändlu|z (-sen, -st, -sid) – склонение; спряжение

lähtend (-an, -oid) – уход, выход

openduz||voz’ – учебный год

petusita – без ошибок

sanel|ta (-eb, -i) – говорить (многократно)

südäimen||tundištu|z (-sen, -st, -sid) – совесть

tetpas – конечно

vižnik (-an, -oid) – пятёрка

Harjoitused.

1. Käkat tekst venäkel’he i ümbristarinoikat se.

2. Löukat tekstaspäi kaik sanad essiv-instruktivan formas. Sanugat, mitte znamoičend om kakuččel ningoižel sanal.

3. Löukat tekstaspäi kaik verboiden impersonalformad.

Seičemenz’toštkümnenz’ urok