Бэдынокъуэ къызэралъхуар

(къэбэрдей тхьалъэусэ)¹¹

Бэдынокъуэ нарт лъэпкъым къыхэкIащ. И анэри нарт лъэпкъщ, и адэри нарт лъэпкъщ.

Нартхэм биижь бзаджэ яIэу, куэдрэ зауэ къращIылIэу щытащ. Зы зэман гуэрым

хъыбар ирагъэщIащ нартхэм я бийм я деж кIуэуэ езэуэну гурылъ зэращIамкIэ.

Зы тэлай дэкIри, нартхэм хъыбар зэры-рагъэщIам хуэдэу, хъыбари кърамыгъащIэу,

жэуапи кърамытыжу, биижьыдзэр нартхэм зэрымыщIэу къатеуащ.

Нартыжьхэм хабзэу яхэлът зэзэуэну бийм пIалъэ ирату, хъыбари ирагъащIэу

«дывэзэуэну дынэкIуэнущ мыпхуэдэ зэманым»,- жаIэрэ. АрщхьэкIэ бийм хабзэр

икъутэри: «Нартыжьыпкъ ткъутэнщ, нарт хэку тхъунщIэнщ»,- жаIэри нарт хэкум

къихьащ. Бийр залымт, гущIэгъуншэт, щIыхьыншэт, хэкум гузэвэгъуэ къыралъхьащ.

Нартхэр зы махуэрэ зы жэщрэ бийм езэуауэ, пщэдджыжь пшэкIэплъыр къыщищIым:

И хьэ самырыр бгъурыдзэу,

И бгъэ гъэсахэр щхьэрыдзагъэхэу,

ТхъуэкъарапцIэу, блапцIэ щхьэ гъуру,

Iэ кIуэцIрыжым тесыххэу,

И бжьыпэ уэгъуэр лIы уэгъуищэ пэлъытэу

Зригъэлъэтэхым къашыргъэ пщэхуу,

И афэху джанэр зыщIыпщIу

Езыр гу ищI-бгы ищIу,

Шу ябгэр къолъыс,

Хьэ самырыбэри еутIыпщ,

И джатэ Iэпщэр егъэз,

Биижьыбэдзэри егъэгулэз,

Гузэва нартхэми ягу мэзэгъэж.

Бий гуащIэр гъэру йощIых,

Къахыхьа закъуэр нартхэм ямыщIэ,

ЗэрагъэщIэнри ялъэкIкъым,

Бийр хьэдэ лъэрыщIыкIыу щIыпIэм къренэ,

Псэууэ къина закъуэм нэIурыдзэныр ныхуещI,

«Хъыбар ягьащIэ» жыхуиIэу,

Iэ гупэ уэгъуэри хуещIыжри

КъыздикIа лъахэми иутIыпщыжщ…

Зи щхьэр ямыщIэу,

Зи лIыгъэр къащIа

Гъусэншэ шур къэсри

Хабзэ бащэр и нэIурыту,

Нарт зэхэтхэм къащыхэпсыхэм,

Сосрыкъуэ къыщылъэтри еубзэрабзэу,

Бзэ IэфI и бэщэныр и фэу,

Бгъэдэлъэдащ.

ФIэхъусыр зэфIэкIыу

ФIыщIагъэр щрагъэбэкIым

Нарт дамыгъэм къыIуигъэплъахэщ:

«Сэри сывихэку цIыхущ,

Нарт щауэгъуу къысхуейм сыкъигъуэтынщ.

Псалъэр вгъэгунащIэу

Iэщэр вгъэхьэулейуэ фызэрызэхэтыр

Ди хэку къезмыгъэкIуу,

ДызэкIунуи къысфIэмыщI,

СыкъэвмыщIэу сыкIуэжынри тызогъакIуэ»,-

жиIэри къахэкIыжри къежьэжащ.