ИЗÆРÆЙ

Хъæдмæ мæ тагъддæр фæцæуын фæнды —

Зараг цъиу диссаджы зарæг кæны

Хъæды изæрæй

Бæласы сæрæй...

Булæмæргъ, булæмæргъ, ма фæтæх дард,

Ма фæтæрс, ма фæтæрс, бæласыл бад.

Азар мын, цæй,

Ма тæрс мæнæй...

Зæрдæ æнцадæй ныр — хъæлдзæг, æнкъард,

Диссаджы зардæй мæ зæрдæ æрцард.

Хъусын, лæууын,

Худын, кæуын...

Азар мын, азар мын, булæмæргъ, цæй!..

Райдыдта, райдыдта тагъддæр, хъæрæй.

Ма уадз дæ зард,

Ма бад æнцад.

Дидинæг, дидинæг, ракал дæ тæф,

Диссаджы тæфæй ды дзаг кæн уæлдæф.

Рæз мын ды дæр,

Тæф кæн фылдæр.

Хæхтæй фæтулы, фæтулы нæ хур...

Азар-ма, азар-ма, цæй, ды, мæ хур,

Уæ, цъиу, мæ бон.

Æз ныр кæуон...

Хæхтæй нæ хур дæр бынтондæр ныттылд.

Мигъ ма сырх-сырхид йæ сæрмæ фæзынд.

Тулын æз дæр

Хъæды дæлдæр.

ЦЪИТИ

Уалдзæджы цъити

Дардыл æхситтæй

Халы йæ рон.

Худгæ, ызгъоргæ,

Размæ уый тонгæ

Хъазы йæ дон.

Цъитийæн сæрды

Цин и йæ зæрды...

Тайы йæ тæф.

Райсомæй дауы,

Розæйыл тауы

Хуры уæлдæф.

Фæззæджы цъити

Баззади джихæй,

Тарæй кæсы.

Баци зæронддæр,

Зæххыл æсонтдæр

Донмæ... лæсы.

Цъити зымæгæй

Тарæй, тызмæгæй

Зæхмæ кæсы.

Цъити бæрзондæй,

Сау зæхмæ сонтæй,

Уазал хæссы.