Йовһн Мергн баатр.

Хальмгин у өргн теегәр өрүн-асхнд йовһар йовҗ, аң, шову харвдг Йовһн Мергн гидг баатр бәәҗ. Аң, шовуһан харвн йовҗ, хальмгин харул болад, дәәлх дәәсинь дарад, орн-нутган төвкнүләд бәәдг баатр бәәҗ.

Мергн нер авхларн, саадгин сумндан мергн деерән, тер мет ухан-селвгәрн һавшун, хурц төләдән, Мергн нер авсн болдг.

Ишкәд йовснасн нааран, мөрн – күлг кедү арнзл мет болв чигн, көл дөрәлдҗ мордад уга деерән, теегин гөрәсн кедү хурдн болв чигн алдрҗ эс һардг төләднь Йовһн Мергн гиҗ нер өгсн болдг.

Залу күн кедү мет чиирг болв гиҗ, һар бәрлдәд ирхлә, түүдг[15] мет шивгдәд оддг төләднь баатр буульмҗ нер немҗ өгсн болдг.

Йовһн Мергн баатр гидг нерн делкәд туурч, дәәсндән халта, Хальмгин өргмҗтә нерн болҗ тарв.

Хармин[16] Хату Хар гидг баатрла харһхар кесг седв чигн, саамнь-эвнь болл уга бәәҗ. Нег дәкҗ Хармин Хату Хар баатр Хальмгин захар орад, деермчин йосар дәәлҗ йовсн зәңг соңсгдна. Икәр уурлад, ода харһх цаг ирв, хальмгин асхрсн цусни өшә авдг цаг өөрдв гиҗ санна. Үлдән[17] зүүһәд, саадган өлгчкәд, сән мөрн өдртән гүүх һазрт, арвн хурһ дарх зуур күрәд, үд-түүд күртл, бәәр бәрлдх һазрур орад ирнә.Дәәнә хойр нүр болад, ноолдана гүргү цагла күрнә.

Орҗ ирн, оһтр хар күлгтә Хармин Хату Хар баатр барун, зүн уга ут хар үлдәрн чавчад, орсн һазран оңһалһад, һарсн һазран задһалад йовсинь үзнә.Хармин Хату Хариг тиигҗ йовсиг үзчкәд, ааһин чигә нүднь аврлт угаһар ширтәд, арвн цаһан хурһнь альхн талан үүмлдәд, далдһр өргн ээмнь дәәсндән күрхдән кецәһәд, тавн алд нурһнь тавтан күрхдән белдв. Даңгин белн саадгнь заядар һартнь бәргдәд одв.

«Сүүдр-сүмсн болсн әмтнә цус асхад керг уга, баатрин йосар онцлдад медий!-гиж хадын хар чолун шу тусмар хәәкрәд орҗ ирсн Йовһн Мергниг Хармин Хату Хар баатр үзчкәд, сүрнь[18] даргдад, омгнь[19] шантрад одв. Дахулҗ ирсн цергән толһач уга хаяд, залу нерән һутаҗ йовхан тас мартад, оһтр бор күлгән буру-зөв уга малядад, һарад зулв.

Йовһн Мергн баатр ардаснь хөр алхад, Хармин Хату Хар баатриг мөрнәннь дел деернь оркрулҗ дарад, амн-нурһинь тас цокад, әмд бийинь күлгтәһинь хамднь деегүр шивәд, цергтән хайҗ өгв.