Координация һәм регуляция

Тере организмнар һәм аларның әйләнә-тирәлеге үзара тыгыз бәйләнештә. Әйләнә-тирәлектәге теләсә нинди үзгәреш шунда ук тере организмнарга тәэсир итә, һәм алар үзләренең эшчәнлеге белән җавап бирәләр. Көзен яктылык көненең кыскаруы — кошларга күчеп китү, җәнлекләргә һәм кышлаучы кошларга мамык­ларын (йоннарын) алыштыру һәм май туплау өчен сигнал. Температура күтәрелгәндә, чүлдә яшәүче күпчелек хайваннар ояларына качалар, хәтта йокыга талалар.

Организмнарның теге яки бу рәвешле әйләнә-тирәлек тәэсиренә җавап бирүе ярсынучанлык яки сизүчәнлек (сизгерлек) дип атала. Барлык тере организмнарга да ярсынучанлык хас.

Әгәр амебалы су тамчысына аш тозының кечкенә генә кристалын салсаң, амебаның тәне йомарлана, җыела (1), ә хәрәкәтчән инфузория-башмакчыклар суның тоз концентрациясе әзрәк булган өлешенә күчәләр (2).

Амебада аның эшчәнлеге белән җитәкчелек итә торган махсус структуралар юк, ә катлаулырак төзелешле инфузория-башмакчыкта, аның бөтен тәненә таралган үзенә бер төрле җепселләр була. Алар керфекчекләр эшен үзара яраштыралар. Әгәр бу җепселләрне зарарласаң керфекчекләрнең дулкынсыман хәрәкәте бозыла һәм инфузориянең хәрәкәте буталчыклана.

Сез инде беләсез, катлаулы төзелешле хайваннарда барлык органнарның эшен, аларның әйләнә-тирәлек белән бәйләнешен нерв һәм эндокрин системалар регуляцияли. Специальләшкән нерв күзәнәкләре беренче булып эчәккуышлыларда барлыкка килә. Болар безнең буаларда яшәүче — төче су гидралары, шулай ук медузалар, мәрҗәннәр. Бу хайваннарның нерв күзәнәкләре, үзара бер-берсе белән орынып челтәрсыман нерв системасын барлыкка китерәләр. Бу — нерв системасының иң гади тибы. Әгәр гидраның кармавычына энә белән кагылсаң, ул йомарлана. Бу — организмның ярсытуга җавабы. Нерв күзәнәкләре тынычсызлауларны тоюга сәләтле. Гидрага энә белән кагылганда, алар ярсыну халәтенә килә һәм, ярсыну бөтен нерв челтәре буенча таралып, мускул күзәнәкләренә тапшырыла. Нәтиҗәдә мускул җепселләре кыскара һәм кармавычлар җыела башлый. Организмның нерв системасы катнашында ярсыткычларга җавап реакциясе рефлекс (латинча «рефлексус» — кире кайтару) дип атала.

Күп күзәнәкле хайваннар арасында катлаулы нерв системасы яңгыр суалчанында барлыкка килә. Аның нерв күзәнәкләре бөтен тәненә таралмаган, ә нерв төеннәренә тупланган. Аларның иң зурысы йоткылык өстендә урнашкан, аның исеме: йоткылык өсте төене — шуннан алынган. Аннан төрле органнарга күп санда нервлар китә, шуңа күрә суалчанның алгы өлеше ныграк сизүчән, йоткылык өсте төене «баш мие» кебек булып тора. Әгәр аны җәрәхәтләсәң, суалчан хәрәкәтләнүен дәвам итәргә мөмкин, ләкин юлында очраган каршылыкны үтеп китә алмый.

Йоткылык өсте төене, йоткылык асты төене белән кушылып, йоткылык яны нерв боҗрасын барлыкка китерә. Йоткылык асты нерв төененнән корсак нерв чылбыры китә. Ул бөтен тән буйлап сузыла һәм һәр сегментта үзара тоташкан нерв төеннәреннән тора. Бу нерв төеннәреннән суалчанның барлык өлешләренә — мускулларга, эчке органнарга күп санлы нервлар китә. Суалчанның барлык органнарының эше нерв системасы контрольлегендә башкарыла.

Буынтыгаяклы хайваннарның нерв системасы охшаш төзелешле, ләкин бөҗәкләрдә йоткылык өсте төене ныграк үсеш алган. Бу сизү органнарының көчле үсеш алуы һәм үз-үзләрен тотышлары катлаулы булу белән аңлатыла. Исегезгә төшерегез әле, кырмыскалар нинди зур «өйләр» төзиләр! Аларның семьяларында «хезмәтне бүлү» куелган: кайберләре ауга йөри, икенчеләре өйләрен көтелмәгән кунаклардан саклый, «төзү материалларын» — ылысларны киптерәләр һәм җилләтәләр.

Ә бал кортлары? Аларның үзара мөнәсәбәтләренең, үз-үзләрен тотышларының катлаулылыгы гаҗәпләндерә. Аларның «биюләре» генә нәрсә тора! Күрше кортлар бу хәрәкәтләр буенча нектарга бай чәчәкләргә юл табалар.

Бал кортларының архитектура һәм төзү сәләтләренә хайваннар дөньясында тиңдәшләр юк. Аларның балавыздан ясаган алты кырлы күп күзәнәкле кәрәзләре хәйран калдыра!

Умырткалы хайваннарның нерв системасы буынтыгаяклылар һәм боҗралы суалчаннардагы кебек корсак өлешендә түгел, ә арка өлешендә урнашкан. Ул баш миеннән, арка миеннән һәм нервлардан тора. Арка мие озын тәҗ формасында умырткалыкта урнашкан. Баш мие баш сөягендә урнашкан. Ул алгы, урта, арткы миләрдән һәм башка өлешләрдән тора.

Төрле хайваннарда баш миенең бу өлешләре төрлечә үсеш алган. Бу аларның төзелеш дәрәҗәсе һәм яшәү рәвеше белән бәйләнгән. Мәсәлән, барлык балыкларның да — арткы һәм урта өлешләре, ә үтә күренмәле чиста суда тереклек итүче хариусның — урта миенең күрү өлешләре, ә болганчык сулы буаларда яшәүче кара балыкның һәм табан балыкның сизү белән бәйләнгән арткы ми структуралары үсеш алган. Балыкларның суда хәрәкәте бик катлаулы һәм күп төрле. Шуңа күрә аларның арткы миенең, хәрәкәтләрне үзара яраштыручы һәм тәннең пространствода юнәлешен билгеләүче өлеше — кечкенә ми үсеш алган.

Балыкларга үз-үзләрен тотышының катлаулы формалары хас. Мәсәлән, үрчү вакытында төче суларда яшәүче еланбалыклар уылдык чәчү урынына барып җитү өчен меңләгән км юл үтәләр. Ә сөләйман балыклар уылдык чәчү вакытында, зур-зур көтүләргә җыелып, елга һәм елгачыкларга юнәләләр, чиктән тыш авырлыкларны: каршы агымны, бусагаларны һәм хәтта зур булмаган шарлавыкларны җиңәләр.

Балыкларны үрчү инстинкты булачак үрчемнең үсеше өчен уңайлырак урыннарга күчерә. Инстинкт ул — үз-үзеңне тотышның тумыштан килгән формасы. Алар тышкы һәм эчке тирәлек ярсыткычларына җавап формасында барлыкка киләләр һәм яшәү дәверендә даими сакланалар. Инстинктлар рефлекслардан катлаулылык дәрәҗәсе белән аерыла.

Кошларның үз-үзләрен тотышлары, балыклар, хәтта җир-су хайваннары һәм сөйрәлүчеләрнең үз-үзләрен тотышлары белән чагыштырганда шактый катлаулы. Алар оя коралар, күкәйдә утыралар һәм балаларын үстерәләр, аларны дошманнарыннан саклыйлар, очарга өйрәтәләр. Күп кенә кошлар берничә елга, кайвакыт озак елларга парлашалар. Күчмә кошлар кышлау урыннарына һәм кире туган илләренә озын юл узалар.

Кошлар очарга сәләтле булулары һәм яхшы күрүләре нәтиҗәсендә, башка хайваннарга караганда азыкны җиңелрәк табалар, якынлашып килүче ерткычны ерактан күрәләр. Кошларның үз-үзләрен тотышлары һәм яшәү рәвешләре катлаулы булу аларның алгы мие, кечкенә мие һәм урта миенең күрү өлешләре үсешенә китерә.

Нерв системасы имезүчеләрдә иң югары үсешкә җитә. Ул башка умырткалыларныкы кебек үк өлешләрдән тора, ләкин аларда баш мие көчлерәк үсеш алган. Аның иң зур өлеше — баш миенең зур ярымшарлары. Аларның өслеге миллиардлаган нерв күзәнәкләре — кабык белән капланган. Күпчелек хайваннарның ми кабыгының өслеге шома түгел, ул буразналар һәм җыерчыклардан тора. Ярымшарлар кабыгы барлык органнарның эшен регуляцияли. Кешенең аңы да, аның хәтере дә, фикер йөртүе дә, хезмәт эшчәнлеге дә зур ярымшарларның кабыгына бәйле.

Эндокрин система, нерв системасы кебек үк, бөтен организмның эшен регуляцияли. Ләкин монда регуляция механизмы башкача, бу — химик регуляция. Аның нигезендә эчке секреция бизләре эшләп чыгарган, үзенә бертөрле актив химик матдәләр — гормоннарның тәэсире ята.

Умырткасыз хайваннарның, мәсәлән, бөҗәкләрнең туклануы һәм матдәләр алмашы, үсүе һәм үсеше, личинканың курчакка әйләнүе һәм аның кабыгын алмаштыруы һәм башка процесслар гормоннар тәэсире белән бәйләнгән. Нәкъ менә гормоннар тәэсиреннән умырткасызларның яшәү тирәлегенә бәйле рәвештә тәннәренең төсе үзгәрә: мәсәлән, крабның тәне якты грунтта ачыграк төстә һәм, киресенчә, караңгы су төбендә караңгырак төстә була.

Югары төзелешле умырткалыларның берничә эчке секреция бизләре бар. Аларның эшчәнлеге хайван организмына ничек тәэсир итүен калкансыман биз мисалында карыйк. Организмның үсүе һәм үсеше шушы бизгә бәйле. Сез рәсемдә чукмарбашның ничек бакага әверелүен күрәсез. Бу үзгәрешләр калкансыман биздән бүленеп чыккан гормоннар тәэсирендә бара. Әгәр чук­марбашка ясалма рәвештә калкансыман бизнең кисәкләрен ашатсаң, ул кечкенә бакага тизрәк әйләнер. Калкансыман бизне алу организмның үсүе кинәт акрынаюга китерә.

Гипофиз — баш миендә урнашкан кечкенә биз. Биредә матдәләр алмашына йогынты ясаучы дистәләгән гормоннар эшләнә. Шуларның берсе үсүгә тәэсир итә. Бу гормон бала чакта җитәрлек күләмдә эшләнеп чыкмаса, үсү туктала яки бик акрын бара. Андый кешеләрнең буе 70—80 см дан артмый. Ә бу гормонның кирәгеннән артык булуы, киресенчә, артык озын булып үсүгә китерә (2 м га кадәр һәм аннан да озынрак).

Гормональ регуляция, нерв регуляциясенә караганда акрынрак бара.

Үсемлекләрнең нерв системасы юк, һәм аларның тереклек эшчәнлеген регуляцияләү үзләрендә ясалучы химик матдәләр ярдәмендә бара. Гадәттә, аларны үсү матдәләре дип йөртәләр, чөнки күпчелек очракта аларның тәэсире үсемлекнең яки аның аерым өлешләренең үсүенә китерә.

Хайваннарның гормоннары кебек, үсемлекләрнең дә үсү матдәләре — катлаулы органик кушылмалар, хәтта аларның бик аз гына микъдары да матдәләр алмашына төрлечә тәэсир итәргә, күзәнәкләрнең үсүен һәм үсешен көчәйтергә яки әкренәйтергә, бөреләрнең ясалуына һәм үсешенә, яңа тамырларның ясалуына, камбий күзәнәк­ләренең бүленү тизлегенә тәэсир итәргә мөмкин. Үсү матдәләре аеруча үсүче тукымаларда — тамыр һәм бәбәк очларында күп ясала. Үсү матдәләре үсемлекнең очыннан кабыкның үткәргеч системасы аша тамырларына күчәләр.

Үсү матдәләрен бәбәкнең очы (оч бөресе) бүлеп чыгарганын белү өчен, рәсемдә (1) күрсәтелгән тәҗрибәне эшләп карау җитә. Сез үсемлекнең үсүе тукталганын күрерсез.

Икенче рәсемдә (2) катлаулырак тәҗрибә күрсәтелгән. Төп сабакны озынлыкка үстергәндә үсү матдәләре ян бәбәкләрнең үсүен тоткарлый. Оч бөрене кискәч, ян бөреләрнең үсүен тоткарлаучы тәэсир бетә, алар бик тиз үсә башлыйлар.

Нерв эшчәнлегенең нигезендә рефлекслар ята. Шартлы һәм шартсыз рефлекслар була. Шартсыз рефлекслар нәселдән бирелә, шуңа күрә аларны тумыштан килгән рефлекслар дип тә атыйлар. Мәсәлән, кайнар үтүккә тигәч, без кинәт, уйлап та тормыйча, хәтта авыртуны да сизмичә, кулны тартып алабыз. Бу шартсыз рефлекс мисалы.

Шартлы рефлекслар — бу тормыш тәҗрибәсе нәтиҗәсендә булдырылган рефлекслар. Мәсәлән, аквариум балыкларында шартлы рефлекслар барлыкка китерергә була. Әгәр аларны ашаткан саен аквариум стенасын шакылдатсаң яки звонок бирсәң, шулай берничә тапкыр кабатлаганнан соң, балыклар звонок тавышына яки шакылдатуга азык бирмичә дә йөзеп килә башлаячаклар.

Хайваннарда шартлы рефлекслар барлыкка китерүгә нигезләнеп аларны төрле кәмитләр күрсәтергә өйрәтеп була.

Кешенең нерв системасы 25 млрд нейроннан тора, аларның күпчелеге баш миенә туры килә.

Нерв импульсы — нерв буенча таралучы ярсыну дулкыны. Нерв импульслары 0,5—120 м/с тизлек белән таралалар.

100 000 изоляцияләнгән (организмнан алынган) бака йөрәгенең эшчәнлеген көчәйтү өчен 1 г адреналин (бөер өсте бизләре гормоны) җитә. 125 000 йорт куянының канындагы шикәр дәрәҗәсен киметү өчен 1 г инсулин (ашказаны асты бизенең гормоны) җитә.

Организмнарның тереклек эшчәнлеген нерв һәм эндокрин системалар координацияли һәм регуляцияли. Нерв системасының эшчәнлеге нигезендә рефлекслар ята. Шартлы һәм шартсыз рефлекслар була. Рефлекс ул — организмның нерв системасы ярдәмендә ярсыткычларга җавап реакциясе. Эндокрин системаның эше нигезендә химик матдәләр — гормоннарның тәэсире ята.

18. Җенессез үрчү

Үрчү ул — барлык тере организмнарга да хас үзлек. Үрчү нәтиҗәсендә тормыш буыннан буынга дәвам итә. Бу — тереклек эшчәнлегенең иң катлаулы процессларыннан берсе. Табигатьтә үрчү ысуллары күп төрле, ләкин аларны ике типка берләштерергә мөмкин: җенессез һәм җенси үрчү.

Җенессез үрчүдә ата-ана организмының берсе генә катнаша, аннан ике (яки күбрәк) яңа, тиңдәш, ягъни үзара охшаш организмнар барлыкка килә. Җенессез үрчү җенес күзәнәкләре яралуыннан һәм аларның кушылуыннан башка гына бара.

Җенессез үрчүнең иң гади формасы — бүленү, бу вакытта ана организмның тәне ике бертөрле кисәккә аерыла. Мондый юл белән бактерияләр, иң гади төзелешлеләр, күп кенә бер күзәнәкле суүсемнәр үрчиләр. Рәсемгә карагыз, сезнең күрүегезчә бүленү процессы төштән башлана. Ул сузыла, озынча формага керә, аннан бүленә. Ике яңа төш барлыкка килә һәм алар бер-берсеннән ераклашалар. Цитоплазмада аркылы тарткы яки бүлге ясала, ул әкренләп тирәнәя һәм ана заттан ике яшь организм барлыкка килә.

Җенессез бүленүнең икенче формасы — бөреләнү. Ул бер күзәнәкле организмнарда да, күп күзәнәкле организмнарда да очрый. Мондый юл белән, мәсәлән, чүпрә — бер күзәнәкле гөмбәләр үрчи. Башта ана күзәнәктә калкым — бөре ясала. Ул үсә һәм зурая. Ана күзәнәкнең төше бүленә һәм яңа барлыкка килгән төшләрнең берсе бөрегә күчә. Шулай итеп, яңа күзәнәк ясала. Ул ана күзәнәктән аерылып китәргә яки аерылмыйча бергә яшәргә дә мөмкин.

Шундый ук юл белән кайбер күпкүзәнәклеләр, мәсәлән, гидралар үрчи. Җәй көне гидраның тән өслегендә бүленүче күзәнәкләр җыелмасы — бөреләр барлыкка килә. Алар әкренләп зурая, сузыла, очларында кармавычлар барлыкка килә. Кармавычлар арасында авыз ясала. Еш кына кармавычлар авыз тишеменнән алдан барлыкка килә, бу очракта яшь гидраның кармавычлар белән тоткан табышын йота алмавын күзәтү бик кызык.

Үсемлекләрдә җенессез үрчүне каланхоеда күзәтергә була. Аның яфракларында үзенә бер төрле зур күзәнәкләр була, шулардан кечкенә үсемлек ясала.

Табигатьтә җенессез үрчүнең башка формасы — споралар ясалу да киң таралган. Спора ул — бик тыгыз тышчалы махсус күзәнәк тибы. Споралар озак вакытлар тынлык халәтендә була алалар. Шул хәлдә алар тирәлекнең уңайсыз шартларын (салкынны, эссене, кибүне, кирәгеннән артык дымны) үткәреп җибәрәләр.

Уңайлы шартлар булу белән, алар шыталар, бүленәләр һәм алардан яңа затлар барлыкка килә. Бу юл белән кайбер хайваннар, гөмбәләр һәм бик күп үсемлекләр үрчи.

Күп күзәнәкле суүсемнәр, мүкләр, абагалар, югары төзелешле гөмбәләр кебек күп күзәнәкле үсемлекләрнең споралары махсус органнарда — спорангийларда ясала.

Яссы суалчаннарның тәне йөзләгән кисәкләргә бүленеп, аларның һәрберсе үзләрен «төзи» (тулыландыра) ала һәм яңа хайванга әверелә. Җепсыман суүсем спирогира да теләсә кайсы урыныннан өзелергә һәм яңа зат булганчы төзелергә сәләтле.

Үсемлекләрдә вегетатив үрчү киң таралган. Бу ысул белән үрчегәндә, яңа яшь үсемлек ана үсемлекнең кисәкләреннән (бәбәктән, тамырдан) барлыкка килә һәм аның нәселдәнлек билгеләрен ала. Кайбер үсемлекләрнең моның өчен махсус үзгәргән органнары: суганчалары, бүлбе-суганчалары, бүлбеләре, тамырчалары була. Аларның күбесендә үсемлеккә авыр периодны — кышны, корылыкны үткәреп җибәрү өчен кирәкле туклыклы матдәләр туплана, шуңа күрә туплау органнары булып исәпләнәләр.

Җимеш агачларын ялгау юлы белән үрчетәләр. Аның өчен үрчетә торган агачтан чыбыкчалар яки кабыгы белән бөреләр (күзчәләр) кисеп алалар. Бу ялгам дип атала. Ялгамны ялганмага — тамыры булган икенче үсемлеккә — сабакларын бер-берсенә туры китереп тоташтыралар һәм киселгән урынны махсус материал белән тыгыз итеп бәйләп куялар. Шуннан соң ялганманың ботагын ялгаган урыннан өстәрәк кисеп алалар. Нәтиҗәдә яңа агачның кәүсәсе һәм ябалдашы — ялгамнан, ә тамыр системасы һәм кәүсәнең төп өлеше ялганмадан үсеп китә.

Үрчү — тере организмнарның характерлы үзлеге. Җенессез һәм җенси үрчү була. Җенессез үрчүдә бер генә зат катнаша, бу вакытта үзенә охшаш бала затлар барлыкка килә. Җенессез үрчү формалары: күзәнәкләр бүленү, бөреләнү, споралар ясалу, вегетатив үрчү.

Date: 2015-09-05; view: 464; Нарушение авторских прав