Чәчәкле үсемлекләрнең органнары

Күп күзәнәкле организмнарның тәннәре органнардан тора. Мәсәлән, умырткалы хайваннарда — йөрәк, бөер, үпкә, ашказаны; ә чәчәкле үсемлекләрдә — бәбәк, тамыр, чәчәкләр, орлыклы җимешләр. Орган (грекча «органон» — корал, инструмент) ул — тәннең билгеле бер функцияләр башкара торган өлеше. Организмда һәрбер органның аерым төзелеше, формасы һәм урнашкан урыны була.

Сезгә таныш булган үсемлекләрдән ала миләүшәне карап китик. Җир йөзендә иң киң таралган һәм иң күп сандагы (250 мең төр) яшел үсемлекләр төркеме — чәчәкле үсемлекләргә чәчәк атканнан соң орлыклар белән җимешләр барлыкка китерүче үсемлекләр керә.

Үсемлек туфракка тамыр ярдәмендә берегә. Ул үсемлекне якорь шикелле нык тотып тора, бик сирәк очракларда гына давыл аны аударырга яки тамыры белән куптарырга мөмкин. Тамырның күп санлы тармаклары тамыр системасын барлыкка китерә. Анда төп, өстәмә һәм ян тамырлар була. Тамыр системалары, төп тамыры яхшы үсеш алган, үзәк тамыр (казаяк, фасоль, тузганак) һәм төп тамырлары үсеш алмаган, чук тамыр системаларына (дөге, бодай, суган) бүленә. Яхшы үсеш алган тамыр системасы үсемлекне туфракка беректерү белән бергә, туфрактан су һәм анда эрегән туклыклы матдәләрне дә суыра. Кайбер үсемлекләрдә, мәсәлән, редис, кишер, чөгендердә төп тамыр һәм бәбәк нигезе туклыклы матдәләрне туплау урыны булып тора, ә дәлиянең туклыклы матдәләре өстәмә тамырларда туплана.

Кислородка ярлы туфракта үсүче үсемлекләр (мәсә­лән, тропик мангр агачы) сулыш тамырлары барлыкка китерә. Алар, җир астында ян тамырлардан башланып, җир яки су өстенә чыгалар һәм үсемлекнең җир асты өлешләрен һава белән тәэмин итеп торалар. Башка үсемлекләрнең (мәсәлән, тропик баньянның) терәк тамырлары була. Йомшак сабаклы үсемлекләр эләктермә тамырлар ярдәмендә стеналар, күрше үсемлекләрнең кәүсәләре буенча өскә күтәреләләр.

Үсемлекнең икенче әһәмиятле органы — бәбәк. Ул сабактан, яфраклардан һәм бөреләрдән тора.

Сабак яфракларны яктыга чыгара, анда бәбәк бөреләре, чәчәкләр һәм җимешләр урнаша. Сабак терәк ролен үти, үсемлекнең барлык өлешләрен тоташтырып тора; сабак буйлап су, минераль һәм органик матдәләр хәрәкәтләнә. Сабак шулай ук туклыклы матдәләрне туплау урыны да булып тора — бу, мәсәлән, бәрәңге бүлбесе, сусын (ирис) тамырчасы.

Яфрак сабакта ян урын алып тора, гадәттә, ул яфрак җәймәсеннән һәм яфрак сабыннан тора. Күп кенә үсемлекләрнең яфрак сабы булмый — мондый яфраклар утырма яфрак дип атала. Яфракның түбәнге өлеше — төп, яфрак сабындагы үсентеләре төпчек яфраклар дип атала. Ләкин кайбер үсемлекләрдә төпчек яфраклар (сирень, энҗе чәчәк) һәм яфрак саплары (җитен, элодея, канәфер чәчәк) булмаска мөмкин.

Яфраклар яфрак сабындагы яфрак җәймәсенең саны белән дә аерылалар. Юкә, каен яфракларының яфрак сабында бер генә яфрак җәймәсе — болар гади яфраклар. Миләш, гөләп, акациянең (сәрвинең) яфрак сабында берничә яфрак җәймәсе — болар катлаулы яфраклар.

Яфракта сулау, туклыклы матдәләр ясалу, суның парга әйләнү процесслары бара. Кайбер үсемлекләрнең яфраклары үзгәрә һәм үзләренә хас булмаган функцияләр башкара: кактусның чәнечкеләре — саклагыч, борчакның мыекчалары терәк функциясен үтиләр, алар нечкә, йомшак сабакны вертикаль торышта тоталар.

хәрәкәтләнә. Сабак шулай ук туклыклы матдәләрне туплау урыны да булып тора — бу, мәсәлән, бәрәңге бүлбесе, сусын (ирис) тамырчасы.

чәчәкләр яки чәчәк төркемнәре дә урнашкан була. Яз көне, көннәр җылыну белән бөреләр бүртәләр һәм ачылалар, яшь бәбәкнең яшел яфраклары, чәчәк бутоннары күренә, бәбәкнең үсүе башлана.

Күпчелек үсемлекләрнең иң матур өлеше — аның чәчәге. Гадәттә, ул таҗ яфракчыкларыннан ясалган таҗдан тора. Таҗ яфракчыклары бергә тоташып үскән — тоташ (хуш исле тәмәке, күгәрчен күзе) яки аерым-аерым — аерчалы (алма, чия) булырга мөмкин. Күпчелек үсемлекләрдә таҗны кәсә әйләндереп ала, ул шулай ук аерчалы яки тоташ булырга мөмкин. Чәчәкләр җенси үрчү функциясен үтиләр.

Чәчәкнең төп өлешләре — җимешлек һәм аларны әйләндереп алган серкәчләр. Җимешлек җимшәннән, баганачыктан һәм җимешлек авызчыгыннан тора. Серкәләнгәннән һәм аталанганнан соң җимшәннән җимеш һәм орлыклар үсә. Серкәчләрдә серкә ясала. Җимешлек һәм серкәчләрнең саны төрле үсемлектә төрлечә, ләкин серкәчләр һәрвакыт күбрәк була. Чәчәкнең барлык өлешләре, күпчелек үсемлекләрдә чәчәк сабының киңәйгән өлеше булган чәчәк түшәгендә урнашалар.

Чәчәкләр, казаяк яки нәркиздәге кебек, бәбәктә бик сирәк берәмләп урнашалар. Гадәттә, алар тукранбаш, груша, кашкарый, кукуруздагы кебек чәчәк төркемнәренә тупланалар.

Үсемлекләрнең җимешләре чәчәкләре шикелле үк формалары һәм зурлыклары, төсләре, орлыклар саны һәм башка билгеләре белән аерылалар. Җимешнең стенкасы — җимешлек тирәлеге кушылып үскән һәм үзгәргән җимшән стенкасыннан ясала. Җимеш эчендәге орлыклар җимшән эчендәге орлыкбөредән үсәләр. Җимешнең төп функциясе — орлыкларны саклау һәм аларны тарату.

Әйдәгез, хәзер орлыкның төзелеше белән танышыйк. Теләсә нинди чәчәкле үсемлекнең — кечкенә генә бака тәңкәсенең дә, безнең урманнарның гиганты булган имәннең дә тереклеге орлыктан башлана. Тышкы яктан ул калын орлык кабыгы белән капланган. Кабык орлыкның эчке өлешләрен кибүдән һәм механик зарарланудан саклый. Кабык астында булачак кечкенә үсемлек — яралгы урнашкан. Ул яралгы тамырчыктан, сабакчыктан, бөречектән һәм орлык өлешләреннән тора. Орлык өлешләре — яралгының беренче яфрак­лары. Безнең барыбызга да билгеле булган фасольнең орлык өлешләре — ике, аларда туклыклы матдәләр тупланган. Орлык яралгысында ике орлык өлеше булган үсемлекләрне ике өлешлеләр дип атыйлар. Мәсәлән, помидор, имән, алма һәм башка бик күп үсемлекләр — ике өлешлеләр.

Суган, сусын, дөге, бодайның орлыклары бөтенләй башкача. Аларның яралгысында бер генә орлык өлеше. Мондый үсемлекләрне бер өлешлеләр дип атыйлар. Аларга пальма, камыш, күрән, орхидея, шулай ук безнең урманнарда сирәк очраучы үсемлекләр — сәхләб (төертамыр), төңге миләүшә, башмак-чәчәк керә.

Ләкин барлык ике өлешле үсемлекләрнең дә тук­лыклы матдәләре орлык өлешендә тупланмый. Күпчелегенең (мәк, юкә, сирень) орлыкларында эндосперм (грекча «эндо» — эчтә, «сперма» — орлык) була. Бу — үзенә бертөрле запаска туплау тукымасы. Ул бодай бөртекчәсе төшерелгән рәсемдә яхшы күренә.

Бәбәкләрне һәм тамырларны — вегетатив органнар дип (латинча «вегетативус» —үсемлек), ә чәчәкләрне, җимешләрне һәм орлыкларны репродуктив (латинча «репродуктио» — яңарту) дип йөртәләр.

Тамырның очы тамыр каплагы белән капланган, ул япма тукымадан тора, һәм бүленү зонасындагы күзәнәк­ләрне механик зарарланудан саклый. Бүленү зонасының күзәнәкләре, тамырның барлык күзәнәкләренә башлангыч биреп, бертуктаусыз бүленәләр. Үсү зонасында күзәнәкләр бүленүләрен дәвам итәләр, шулай ук тамырның үсүен тәэмин итеп үсәләр. Суыру зонасында тышкы катлау күзәнәкләре үсентеләр — тамыр төкчәләрен барлыкка китерәләр. Алар туфрактан су һәм минераль тозлар суыралар. Тамыр төкчәләре тамырның суыру өслеген йөзләрчә тапкыр арттыра. Тамырның үзәгендә үзагачның үткәргеч тукымалары һәм юкәр урнашкан. Үткәргеч тукымалар аша — су һәм анда эрегән матдәләр, ә юкәр буенча органик матдәләр хәрәкәтләнә.

Юкәнең берьеллык сабаклары тышкы яктан тиречек белән капланган, вакыт узу белән ул бөкенең үле күзәнәкләре белән алмашына. Тиречек һәм бөке япма тукымага керә. Бөкедән соң кабык урнаша. Кабыкның эчке катлавы юкәр дип атала, аның составына органик матдәләр хәрәкәтләнә торган һәм сабакка ныклык бирүче күзәнәкләр керә. Камбий — ясалгы тукыманың тере күзәнәкләр катлавы, камбийның бүленүче күзәнәкләре юкәргә һәм үзагачка башлангыч бирәләр. Үзагач — сабакның төп өлеше, аның составына каналлар һәм җепселләр керә. Сабакның нәкъ уртасында үзәк урнашкан. Ул төп тукыма күзәнәкләреннән тора, анда туклыклы матдәләр туплана.

Җимешлеге дә, серкәчләре дә булган чәчәкләр ике җенесле дип атала. Андый чәчәкләр күпчелек үсемлекләрдә, мәсәлән, алмада, чиядә, сиреньдә. Җимешлекләр яки серкәчләр генә булган чәчәкләр аерым җенесле дип атала. Аерым җенесле чәчәкләр (серкәчле һәм җимешлекле) бер үсемлектә булса (кыяр, кабак) — бер өйле, әгәр серкәчле чәчәкләр бер үсемлектә, җимешлекле чәчәкләр икенче үсемлектә булса (тал, тополь), ике өйле үсемлекләр дип атала.

Орган — тәннең билгеле бер функцияне башкаручы өлеше. Һәрбер органның билгеле бер төзелеше, формасы һәм организмда аерым урыны була. Бәбәк, тамыр, чәчәкләр, ор­лыклар белән җимешләр — чәчәкле үсемлекнең органнары. Бәбәк — катлаулы орган, ул сабактан, яфраклардан һәм бөреләрдән тора. Тамыр үсемлекне туфракта тотып тора, аны су һәм минераль тозлар белән тәэмин итә, туклыклы матдәләрне туплау урыны булып тора. Яфракларның төп функциясе — фотосинтез процессында органик туклыклы матдәләр барлыкка китерү. Сабак яфракларны яктылыкка чыгара, үсемлекнең барлык өлешләре өчен терәк булып тора, аларны үзара бәйли, кайбер үсемлекләрдә туплау функциясен дә үти.

Date: 2015-09-05; view: 489; Нарушение авторских прав