Орус-япон урушда

Тау эллеге уруш къагытла келген кюн

Джарлы джашланы правленнге джыялла,

Аракъы ичириб кёллерин джарыкъ этерге,

Атла джегелле, Арисейге кетерге.

Алгъы бурун Узун Къалагъа баргъанек,

Инбашларыбызгъа кёк пагонла салгъанек.

Андан сора Армавирге баргъанек,

Армавирде ай бла джарым тургъанек.

Къазауат къуллукъну кёлюбюзден билгъенек,

Андан сора мешиналагъа миннъенекъ.

Мешинала бла эки джыйырма сутка баргъанек,

Бара-барыб бир уллу шахарда атылыб къалгъанек.

Эртден, инъир япон таулагъа къараек,

Японлуланы кийикъленича марайек.

Марасакъ да, биз аланы кёрмеек,

Ол кюнледе кесибизни билмеек.

Бир кече джатыб тургъанлай,

Бир заманда бир ачы къуугъун къычырды:

«Кавказдан келген тау къушла!

Бюгюн болгъанд къанлы согъуш урушда

Инъирде полкну япон аскер алгъанды,

Мухаммадияны дууасы къабыл болгъанды».

Атларыбызгъа чабышдыкъ,

Къысха-къысха атларыбызны табышдыкъ.

Дженъил-джугу атларыбызны джерледик,

Биз анда чаба-джорта тебредик.

Танъ атаргъа япон таулагъа ёрледик,

Кюн аллына къызыл къанла тёгюб тебредик.

Тоб тютюнледен бир-бирибизни кёрмедик,

Джунчумадыкъ бирден залпны сермедик

.

Тамадабыз Тохчукъланы Наныуды,

Япон тобну кючлю болгъанын таныды.

Бир заманда ол алай айтыб сёлешди:

«Бизден келген, джаным, джашла, джигитле!

Джан чыкъгъынчы сауут-саба къоймайыкъ!

Чыкъгъан элибизни бетин джоймайыкъ.

Бизден келген, джаным, джашла, ай джигитле!

Биз барыбыз да бир джерчикде турайыкъ,

Къазауатда бираз тири ойнайыкъ,

Ёлгенибизге джаназы, намаз къурайыкъ».

Суу табмайбыз джаназы намаз къылыргъа,

Япон тобла къоймадыла бизни бир джерчикде турургъа.

Маджалларыбыз ауур джаралы болгъанды

Юс кийимлерибиз къызыл къандан толгъанды.

Гогуйланы ол тулпар Харун, джаш Харун

Бу дунияда сен бек кёб умут этгененъ.

Бирине да джеталмай кетдинг, джалтырай

Джан беребиз Япон таулада, къалтырай.

Эресейден бир аман хапарла келелле:

Ёлген ёлюклени гетен бокълауучха салалла.

Аны къараб кёрген заманда

Санла бла джанла башха-башха болалла.

Источники: «Къарачай поэзияны антологиясы» (С. 70-71), «Къарачай-малкъар халкъ жырла» (С. 59-61.)