Крынин Степан Михайлович. Крынин Степан Михайлович 1920 җил мґрн сарин 14-д Әәдрхнә губерньд Никольское селәнд төрсмн

(1920-1988 љљ.)

Крынин Степан Михайлович 1920 җил мґрн сарин 14-д Әәдрхнә губерньд Никольское селәнд төрсмн. Дәәнә өмн эн Үстин района «Сарпа» совхозд көдлҗ йовсмн. Тиигхд бичкн цагтан хальмг көвүдтә үүрләд, эднлә хамдан теегт аду хәрүлҗ йовсн билә.

1940-ч җил хальмг үүрмүдтәһән әәрмд церглснә хөөн удан боллго дән эклв. Энүнә церглҗ йовсн Улан Тугин Орловск дивизь Белоруссин һазрт, нигт ө-шуһу модн заагт дәәллдәд хортнас сулдхла.

1944-ч җилин мөчн сард дивизь Друть гидг һол һатлсн кемд С. М. Крынин эврә бичкн плацдарм деер батрад авчкв. Немшнр эдниг медчкәд, ки авхуллго хаһад кевтүлчкәд, ормаснь көндрүллго кесгтән бәрв. Крынин һазрла наалдҗ одсн әмтиг үзчкәд, тер дарунь босад хәәкрәд, хортна позиц тал дәврәд гүүв, энүг дахад ардаснь цуһар босад дәврцхәв. Степан Михайлович немшнрин траншейд һәрәдҗ орад, һар бәрлдәд, эдниг үүмүләд тарачксн кемд, генткн хаҗуһаснь пулеметәс хаһад, хәрү мана салдснриг һазрт кевтүлчкв. Тиигхлә Крынин гранат атхад, пулемет тал мөлкв. Тиигәрән өөрдх дутман немшин пулеметин сумн энүнә өөр һазриг шуучад тусад бәәнә. Кедү әәмшгтә болвчн, өөрдҗ ирәд, гранат хаяд орксн хөөн пулеметын дунь тасрв.

Түүнә хөөн мана церг Волковыск гидг балһснд өөрдҗ ирцхәв. Тиигхд, немшнрт тасрхан уга фронтын меҗә тогтахд күнд билә. Крынинә баг энүг олзлад, эднә заагарнь тылд орад бүсләд, эдниг тус-тустнь уга кедг бәәсмн. Белоруссьт бальчгта һазр ик аһу эзлҗәнә, эн тал немшнрт амр болад, мана цергин дәврлһнд боомтг тогтаһад техникиг төрүц йовулдмн биш.

Тегәд эн тоотыг учртан авад, мана цергә подразделеньсин штаб ик чидләрн өргн фронтар дәврлго, бичкн отрядмудар дәәллддг болв. Нег дәкҗ Крынин эврә салдсмудтаһан дәәллдән болх гиҗ күләгдҗәсн шоссен хаҗуһарнь өвсн заагар бултҗ күләв. Өр цәәҗ йовх кемд утдан күсдүндүр дуунад йовсн немшнрин колонн үзгдв. Энүнәс даву әәмшглә харһҗ йовсн Крынин түрүн авгтан алмацад:

- Эдн мана багиг дарунь әм таслх гиҗ санв.

Болв бийән төвкнүнләд арв шаху гранат һарһад өмнән тәвв. Немшнриг өөрдүлчкәд Крынин һарарн дайлсн кемд автоматчикүд немшнриг хаһад, түрүн шеренгд йовсн хөр һар хортнла салдсиг унһачкхла, немшнр техникән хайн тарад зулцхав.

Зогсалго көөхм гиһәд Крынин һурвн автоматчикән ардан үлдәчкәд гүүлгҗ халдад, орман соляд немшнриг көөлдҗ йовхла, эднә дивизин подразделеньс дәврәд дөң ирв.

1944-ч җил така сарин 22-т 5-ч Улан Тугин Орловск дивизин командир деед командованьд өгүлсн цааснд иигҗ бичҗәнә: «Волковыск гидг балһс дәврҗ авлһнд сержант С. М. Крынинә подразделень хамгин түрүн болҗ балһснд орад, зөргтәһәр дәәлдәд. Деед Советин Президиумин Зәрлгәр Степан Михайлович Крынинд Советск Союзин Геройин өөдән нерн зүүлһгдв».

Дән төгсхлә Сергей Михайлович Крынин Әәдрхн балһснд ирәд, энд заһсна комбинатд удан көдлв.