Гермашев Иван Васильевич. Иван Васильевич Гермашев угатя крестьянск өрк-бүлд Элстәс өөрхн бәәдг Вознесеновск селәнд 1914-ч җилин

(1914-1979 љљ.)

Иван Васильевич Гермашев угатя крестьянск өрк-бүлд Элстәс өөрхн бәәдг Вознесеновск селәнд 1914-ч җилин ўкр сарин 24-д төрҗ һарла. Гермашевин өрк-бүлд йисн күн билә. Эцкднь һанцаран иим өрк бүл теҗәх чидл күршго болад, ууһн күүкднь баячудт заргддг билә. Зуг иим өнр, ни-негн бәәдг өрк-бүлд ик зовлң учрв - бичкн Ваня шинкән һурвн нас наслхнднь экнь өңгрв. 1923-ч җилд эцкнь әмнәсн ґњгрв.

Эк-эцкнь өңгрснә хөөн невчкн зуур ик экчнрән бәәҗәһәд, йиста Ваня Улан-Эрг гидг селәнд баячудт экләд көдлв.

1927-1928-ч җилмүдт Ваня Гермашев Максим Горькийин нертә Хальмг Таңһчин өнчн бичкдүдин герт бәәһәд, сурһуль сурла. Көвүнлә хамдан эгчнь Наталья бичкдүдин герт бәәлә. Энд давсн җилмүдт, бичкндк цагнь авад хәләхлә, цугтаһаснь сән, хөвтә җилмүд билә, гиҗ хөөннь Иван Васильевич тодлла. Сән аштаһар эклц школан чиләчкәд, Ваня Т. Д. Юркован нертә крестьянск баһчудын школд орв. Шин медрлһ авхдан, сурһуль сурхан баахн көвүн йир дурта билә. 1932-гч җилд крестьянск баһчудын школ сән сурһульчнрин тоод төгсәчкәд, Иван Гермашев медицинск институтын белдврин курст орх зөвшәл авла.

Болв эмчин эрдм күцц авч чадсн уга. Сәәнәр негдгч курс чиләснә хөөн Ваня төрскн һазртан Воснесеновка селәнд ирәд бәәҗәһәд, безг гемәр гемтәд, хамдан сурчасн көвүд-күүкдәс зөвәр ард үлдв. Эдгснә хөөн көвүн “10 лет Октября” гидг колхозд көдлддг болв. Хөөннь эн колхоз “Победа” гидг колхозд көдлдг болв. 1936-ч җилд Троицк улусин комитетин комсомол Иван Гермашевин Вознесеновск күцц биш дундын школд пионерск вожатар көдлх гиһәд илгәв. Эн школд хөөннь багшлхларн, цаһан седклән өгәд көдлҗ.

1939-ч җилин эклцәр Гермашев Иван Хальмг Таңһчин Максим Горькийин нертә өнчн бичкдүдин герин сурһмҗин әңгәр директорин дарук болҗ көдлв, удан боллго директорин үүл даав. Өнчн бичкдүдин герт Иван Васильевич удан көдлсн уга. Баһ наста коммунистиг партийин көдлмшт һарһв. Энд көдлҗәхләнь Төрскн харсгч алдр дән эклв. Дәәнә кесг хаалһ коммунист Гермашев давҗ һарла. Москван өөр дәәллдлә, Сталинградск хортыг цокла. Әрәсән цутхлң райодар дәврәд, Белоруссьд ирлә. Энд Белоруссьд, Советск Әәрм уралан дәврҗәхд, ах лейтенант Гермашев берк зөрмг йовдларн йилһрв.

1944-ч җилин така сарла Рогачев балһсна деед үзгт зөрмгән үзүлв. Тер төләдән Советск Союзин Деед Советин Президиумин Зәрлгәр 1944-ч җил август сарин 23-д Гермашев Иван Васильевичд Советск Союзин Геройин нер зүүгдлә. Хальмг теегин үрнә чееҗднь Ленинә орден болн Алтн одн гилвкв. И. В. Гермашевин геройин нер зүүлһхин туск ачллһна бичгәс: “… 1944-ч җилин июнь сарин 29-д артиллерийск белдвр кеҗәх саамд Гермашевин взвод хортн хаҗасн орминь медҗ авчкад, тенд бәәсн зер-зевинь болн әмд чидлинь уга кецхәв. Дәврхмн гисн докья авчкад ах лейтенант Гермашев эврәннь залу-зөрмг бәәдләрн салдсмудан урмдулад, взводыннь өмн гүүһәд, түрүн болҗ хортна траншейд ирәд, тенд хаҗасн һурвн зер-зевинь хамх цокв.

Ах лейтенант Гермашевин взводын кесн дәврлһн арһ өгв. Түрүн траншейн авлһна саамд ротын командирин даалһвр авад, зогсл уга цааранднь дәврлһ кеһәд кеҗәхлә, немшнрин күнд танкс советск салдсмуд тал дәврв. Үүмәтә бәәдл тогтв. Болв ах лейтенант Гермашев бронебойщикүдиг толһалад, нег саамд пулеметмудар, бууһар хаһулад, эврәннь зөрмг үүлдврәрн үлгүр болад, дәврҗәх хортна танксин зогсав”.

Дән төгсхдән өөрдҗ йовла. Дорд үзгин Пруссьд дәәллдән болҗасмн. Кенигсберг балһсна өөр теңгсүр шахгдсн фашистнр бүслврәс һархар хәәв, эн балһсиг сәәнәр батлсн билә, зуг тиим болвчн манахс тедниг көөҗ һарһв. Немшнр Фриш-Гаф гидг көл усна өөр тоха ард зогсцхав. Энд фашистнриг хамх цокҗах Советск Әәрмин тоод капитан Гермашевин церглҗәсн Хол Дорд үзгин, Новгород-Северис, Ленина орденар ачлгдсмн, Улан-Тугта Суворовин орденар ачлгдсн дивизь йовла. Яһтлан немшнр шүдән хәврв чигн Фриш-Гаф көл усна өөр эдниг хамх цокв. Кенигсберг балһсн тал дәврлһн эклв, энд Хальмгин туурмҗта көвүн капитан Гермашев дәәнә хаалһан төгсәв.

Дән чилснә хөөн Иван Васильевич Гермашев дәкәд чигн кесг җилдән Советск Әәрмд церглв.

1979-ч җилин ноха сарин 15-д өңгрв.