Нечестивии не узрат славы Твоея Христе: но мы Тя Единородне, Отеческия славы сияние Божества, от нощи утренююще, воспеваем Тя Человеколюбче

Яко агницы непорочныя, и яко жертвы приятныя, Христу истинному Пастырю Софие и Ирино принесостеся, приношения совершенна, и приятна всесожжения.

Умертвившеся телом, ожисте душею, Умертвившему крепость смертную мученицы подобящеся, Крест, и смерть вольную Претерпевшему.

Един имуще разум в телесех своих, и мечем усекаеми, Единаго всех Господа Иисуса исповедаху Софие и Ирино богомудрыя.

Богородичен: Воздвигни мя падшаго в рове страстей, и управи мя, яже Бога и Правителя рождшая едина всенепорочная, совокупившаго благодатию разстоящыяся первее.

Песнь 6. Ирмос:

Пожру Ти со гласом хваления Господи, Церковь вопиет Ти, от бесовския крове очищшися, ради милости от ребр Твоих истекшею кровию.

Разражена и ногами женскими змия попираема, зрящи прамати божественно радуется, тую лестию из рая изгнавшаго первее. Жениху душевному ныне нетленно приложистеся Софие и Ирино, и в чертозе Небеснем веселою душею водворяетеся.

Возвышаемыя мучительныя волны, мученическая корабли погрузити не возмогоша: крепкою бо Рукою к Божественному пристанищу достигоша.

Богородичен: Глагол Твоих сбытия зрящее, величаем Тя вящше Богомати, и Тебе возвеличившаго: родове бо вси Тебе воистинну ныне ублажают.

Кондак, глас 4.

Подобен: Явился еси:

Страстотерпиц Христовых Софии и Ирины память празднуим, и верою просяще помощи, избавитися всем от всякия скорби, зовуще: Бог наш с нами, иже сих прославивый, якоже изволи.

Икос: Чудес вас источники стяжавше, почерпаем здравие обильно мученицы Христовы Софие и Ирино, почитающе болезни ваша, и ревность Божественную, и язвы доблественныя и подвиги, и совершаем вашу досточудную память, зовуще: Бог наш с нами, иже сих прославивый, якоже изволи.

Песнь 7. Ирмос: