Глава 16. Öнi сёрнитышта вежа войтырлы сьöм чукöртöм йылысь

Öнi сёрнитышта вежа войтырлы сьöм чукöртöм йылысь. Та йылысь ме висьтавлi нин галатияса вичкоясын. Сiдзкö, вöчöй менам висьталöм серти: 2 вежонса медводдза лунö быдöн торйöдöй сьöмнытö мыйта верманныд да видзöй сiйöс ас орданыд. Сэки менам локтiгкежлö тiян лоö чукöртöма нин. 3 Бöрйöй ас пöвстсьыныд некымын мортöс. Кор воа тiянö, сета налы эскöдан гижöд да мöдöда найöс Ерусалимö, медым нуны сэтчö чукöртöм сьöмнытö. 4 Ковмас кö аслым сэтчö муннысö, накöд тшöтш муна. 5 Македония кытшовтöм бöрын локта тiян дiнö, öд ме бöрсö кöсъя локны Македония пыр. 6 Гашкö, мыйтакö олышта тiян дiнын, гашкö, тöвъя весиг. Сэсся водзö менö мöдöданныд. 7 Ме ог кöсйы аддзöдчывны тiянкöд сöмын мунiгмоз. Ен кö сетас, кöсъя дырджык олыштны тiян дiнын. 8 Ефес карö ме кольчча Ветымынöд лунöдз. 9 Öд Енмыс меным паськыда восьтiс öдзöсъяс уджавны. Дерт, паныд мунысьыс уна жö. 10 Локтас кö тiян дiнö Тимофей, тöждысьöй сы вöсна, медым сылы нинöмысь эз ковмы майшасьны, öд сiйö ме моз кесъялö Господьлы. 11 Энö увтыртöй сiйöс! Отсалöй сылы лöнь сьöлöмöн бöр локны ме дiнö. Танi мукöд вокъяскöд ме виччыся сiйöс. 12 Ме ёна кори Аполос вокöс, медым вокъяскöд тшöтш мунiс тiян дiнö, но öнi оз на кöсйы. Вермыны кутас да, локтас. 13 Лоöй дасьöсь да зумыда эскöй! Лоöй вынаöсь да повтöмöсь! 14 Ставсö вöчöй мусапырысь! 15 Вокъяс, тi тöданныд, мый Степан да сылöн гортсаыс лоины Акайяын медводдза эскысьясöн. Найö сетiсны асьнысö кесъявны вежа войтырлы. Кора тiянöс: 16 кывзысьöй налысь, тшöтш накöд öтвыв уджалысьяслысь да кесъялысьяслысь. 17 Степан, Фортунат да Акаик воисны татчö. Меным зэв нимкодь таысь, öд найö öнi тiян пыдди. 18 Найö кыпöдiсны менсьым лолöс, тшöтш тiянлысь. Вылö пуктöй татшöм йöзсö! 19 Тiянлы ыстöны чолöм асияса вичкояс. Господь нимöн сьöлöмсяньныс чолöмалöны тiянöс Акил, Прискилла да на ордö чукöртчысьяс. 20 Тiянлы ыстöны чолöм став вокъяс. Чолöмалöй öта-мöднытö вежа окыштöмöн! 21 Ме, Павел, аслам киöн гижа тiянлы чолöмöс. 22 Кодi оз радейт Господь Исус Кристосöс, сiйöс лоö ёрöма. Маран-афа. 23 Миян Господь Исус Кристослöн буралöмыс тiянкöд. 24 Менам муслунöй ставныдкöд, кодъяс Исус Кристос пытшкынöсь. Аминь.