На утрени

На Бог Господь: тропарь праздника, дважды.

Слава, святыя. И ныне, праздника.

По 1-м стихословии седален, глас 2:

Житием праведным ныне обнищах/ и грехи многими ураних душу мою,/ но ты, мученице честная,/ богатством милосердия и лечбою молитв твоих/ исцели мене, немощнаго,/ яко да воспою славныя твоя подвиги.

Слава, и ныне, праздника.

По 2-м стихословии седален, глас 3:

Яко разбойницы, обыдоша мя страсти моя,/ световидную одежду души моея совлекоша/ и ту ранами греховными уязвиша,/ но ведый тя милостивую помощницу,/ из глубины сердца моего взываю:/ пролей елей милосердия на мя/ и еле жива суща, возстави,/ Татиано, мученице честная.

Слава и ныне, праздника.

Величание:

Величаем тя,/ святая мученице Татиано,/ и чтим честная страдания твоя,/ яже за Христа/ претерпела еси.

Псалом избранный: Бог нам Прибежище и Сила:

По полиелеи седален, глас 6:

В багряницу от кровей твоих одеявшися/ и порфирою славы украсившися,/ взошла еси в чертог Христов, Татиано богомудрая,/ идеже святии новомученицы и исповедницы земли нашея/ престолу божественныя славы предстоят./ Сего ради молим тя:/ вознеси с ними молитвы о нас,/ любовию память твою празднующих.

Слава, и ныне, праздника.

Таже степенна, 1-й антифон. Прокимен, глас 4: Дивен Бог во святых Своих,/ Бог Израилев. Стих: В церквах благословите Бога, Господа от источник Израилевых. Всякое дыхание: Евангелие от Матфея, зачало 104.

По 50-м псалме стихира, глас 6:

Днесь восхвалим, вернии,/ дивнаго во святых Своих Бога/ и воспоим Ему благодарственно,/ яко яви нам Татиану пречудную,/ чистотою и милосердием украшенную/ и благодать Святаго Духа стяжавшую,/ и тако возопиим:/ Господи, молитвами Твоея мученицы,/ не помяни беззаконий наших,/ но спаси души наша.

Канон, глас 8.

Песнь 1

Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Днесь память мученицы преславныя Татианы на трапезу духовную нас созва,/ предлагающи добродетели и труды тоя,/ имиже духовне напитаимся, вернии,/ прославляюще Избавителя и Бога нашего.

Благочестиваго корене отрасль всечестная, мученице славная,/ всяцей добродетели от юности навыкла еси/ и, наставления закона Божия никогдаже оставльши,/ яко древо плодоносное, при исходищах вод явилася еси.

Глаголы Христовы, яко блажени милостивии, от младенчества в сердце твоем слагающи,/ доброю стезею в жизни шествовала еси, всечестная Татиано,/ страждущим угождающи и больным недуги облегчающи.

Богородичен: Тя, благословенную в женах, архангельским гласом величаем:/ радуйся, Благодатная, Господь с Тобою.

Песнь 3

Ирмос: Небеснаго круга Верхотворче Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ едине Человеколюбче.

Старца Саровскаго почитающи,/ во обитель Дивеевскую вселитися возжелала еси, святая,/ обаче, волю Господню о себе познавши,/ на смерть и страдания востекла еси, поющи:/ утверди мене в любви Твоей, едине Человеколюбче.

Наставника ко спасению, добродетельми украшена,/ преподобнаго Гавриила обрела еси, блаженная Татиано,/ иже, к подвигом божественным тя наставляя,/ поучаше утверждатися в любви Господней.

Святей Анастасии Узорешительнице в милосердии подражающи,/ во узах и заточении сущим усердно послужила еси, богозванная невесто Татиано, поющи:/ утверди мене в любви Твоей, едине Человеколюбче.

Богородичен: Рождеством Твоим, Дево Пречистая,/ род человеческий избавила еси служения вражия/ и женское естество Тобою почтено бысть.

Седален, глас 8:

Кая темница не име тя юзницу,/ кий град не имать тя заступницу,/ не токмо земля Московская о тебе хвалится,/ но и Зырянская с нами ликовствует,/ и Казахстанская о тебе радуется,/ и многия ины грады и веси свеселятся с нами в торжестве твоем,/ поминающе изгнания и прославляюще страдания твоя,/ Татиано, мученице христоименитая.

Слава, и ныне, праздника или сей:

Боголюбивая Владычице, ангелов украшение и мучеников славо,/ с ними молися обрести нам милость и разрешение от беззаконий наших,/ помози течение жизни нашея добре совершити/ и Царствия Небеснаго наследники явитися.

Песнь 4

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Нрав сестер благих Марфы и Марии стяжавши,/ алчущих питательница, странных утешительница/ и больных посетительница явилася еси, мученице славная,/ и тако прослави Отца, Иже есть на Небесех.

Добродетелем бессеребренников и чудотворцев подражающи,/ на служение сущим в болезнех устремилася еси,/ желающи немощи их понести, Татиано терпеливодушная./ Темже и наша телесныя и душевныя недуги исцели/ и лукаваго соблазны отгони благоприятными твоими молитвами.

Милосердие в спутницу жития твоего избравши,/ вся имения твоя в руце нищих влагала еси/ и тако Богу угодила еси./ Темже молим тя:/ богача немилосердаго части нас избави/ и со всеми святыми в недрех Авраамовых вселитися Господа умоли.

Богородичен: Родила еси Сына Божия плотию, девство сохраньши,/ темже притекают к Тебе, Пречистая Владычице, отроковицы, девство носяще,/ и яве побеждают невидимыя враги.

Песнь 5

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче.

Девический лик о тебе, невесто Христова, ныне радуется,/ собор мучеников веселится/ и множество благочестивых в храме взывают:/ Твой мир подаждь нам, Человеколюбче.

От тесноты темничныя и смраднаго заточения, мученице честная,/ к пространней широте рая сладости прешла еси/ и святых светлость узрела еси./ Ныне прилежно с ними молися, даровати нам мир и веры утверждение.

О, мученице добропобедная, ластовице красная,/ голубице кроткая, горлице миролюбивая!/ Душу мою плодоносну покажи и нрав жестокосердый премени,/ и мир душевный ниспосли молитвами твоими.

Богородичен: Ныне род человеческий возрадовася,/ печаль преста и радость процвете,/ яко Бог вселися во утробу Твою, Пречистая,/ и виден бысть Тобою.

Песнь 6

Ирмос: Молитву пролию ко Господу,/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.

Истинною любовию, милосердием и кротостию,/ терпением и целомудрием украсившися,/ обитель Духа Святаго себе соделала еси, святая,/ нас же, грехами отягченныя, посети/ и надеждою на милость Божию ободри, молитвами твоими.

Плоды добродетелей в души твоей возрастивши,/ Небеснаго пристанища непреткновенно достигла еси, избраннице Христова,/ и покой обрела еси от страданий и гонений безбожных.

Исповедники Христовы в темницах утешающи,/ нищетою вольною себе украсила еси, святая Татиано,/ и, мучения нивочтоже вменивши,/ смертию твоею мученическою в Небесный чертог взошла еси.

Богородичен: Тя, Дево, яко Матерь Божию,/ лицы мученичестии велегласно прославляют,/ темже и святая Татиана, во след Сына Твоего последовавши,/ купно с ними ублажает Тя, Пречистая.

Кондак, глас 2:

Слово Божие сердцем твоим восприемши,/ миру распялася еси,/ святая мученице Татиано,/ и, в служении страждущим Богу угодивши,/ плод добродетелей обилен пожала еси./ Сего ради буди нам ходатаица/ и умоли Создателя всех,/ бесплодие сердец наших исцелити,/ да принесем Ему плоды покаяния,/ любовь, милосердие и смирение.

Икос:

Приидите, вернии, духовне возвеселимся в памяти святыя мученицы Татианы,/ и, прославляюще подвиги ея, воспоим тако:/ радуйся, града Томска благое прозябение;/ радуйся всея земли Российския украшение./ Радуйся, Церкве Божия плод благоприятный;/ радуйся, лика новомучеников наших цвет благоуханный./ Радуйся, женам мироносицам в милосердии подражавшая;/ радуйся, многия добродетели стяжавшая./ Радуйся, Татиано, мученице преславная, образ милосердия нам показавшая.

Песнь 7

Ирмос: От Иудеи дошедше отроцы/ в Вавилоне иногда/ верою Троическою пламень пещный попраша, поюще:/ отцев Боже, благословен еси.

Обуреваема лютым неистовством мучителей безбожных,/ яко юзница от места на место заключения часто преходила еси, страдалице терпеливодушная./ Сего ради, смирением власть духа злобы победивши,/ в радости ныне поеши:/ отцев Боже, благословен еси.

Святых юзников, ко вратом смерти приближающихся,/ благими словесы утешала еси, достохвальная Татиано,/ имже поревновавши, пострадати за Христа возжелела еси./ Ныне же, лику мученическому совокупльшися, поеши:/ отцев Боже, благословен еси.

Мироносицы вземши чин, всечестная страдалице,/ Христу, нас ради волею обнищавшему, усердно послужила еси,/ егда, вместо мира, елеем милосердия страждущих и недужных умастила еси./ Ныне же, Господа зрящи, поеши:/ Боже, благословен еси.

Богородичен: Вся жены богомудрыя/ с веселием прославляют Деву Пречистую, истинную Матерь Божию,/ и, благоговейно предстояще, Христа восхваляют во веки.

Песнь 8

Ирмос: Царя Небеснаго,/ Егоже поют вои ангельстии,/ хвалите и превозносите во вся веки.

Сластьми мира сего не прельстившися,/ яко цвет красный, процвела еси в девстве, Татиано богомудрая,/ и, сугубый подвиг на земли совершивши,/ венец от руки Вседержителя прияла еси./ Ныне же с лики ангельскими Его прославляеши.

Христу, Егоже всем сердцем возлюбивши,/ себе в жертву непорочну принесла еси, честная,/ и, яко голубица, крилома добродетелей скверны греховныя избегши,/ в Небесный чертог возлетела еси,/ идеже песнь победную воспеваеши.

Добродетельми и подвиги твоими Богу угодила еси, Татиано мученице достохвальная,/ сего ради Той прослави тя/ и дерзновение велие дарова,/ молитися присно с лики Небесными о почитаю­щих тя.

Богородичен: Ты Бога едина родила еси, Дево, преславно;/ Ты естество обновила еси Рождеством Твоим, Богородительнице Чистая.

Песнь 9

Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с бесплотными лики Тя величающе.

Светильник девства твоего во мраце беззакония сохраньши,/ мудрым девам сопричислилася еси, всечестная,/ лик же мученический возвеселися в славней кончине твоей,/ призывая всех восхваляти Господа,/ крепость и силу тебе даровавшаго.

Течение жизни твоея в чистоте и целомудрии совершающи,/ наипаче же ум выну от земных к небесному упованию вперяющи,/ райскаго блаженства и Небеснаго Царствия наследница явилася еси, мученице честная,/ идеже с бесплотными силами Христа величаеши.

Приими, Триипостасный Боже, недостойную песнь сию,/ в память святыя Татианы, добропобедныя мученицы Твоея, составленную,/ еяже молитвами веру Православную в земли нашей утверди,/ нас же вкупе с нею и всеми святыми Тебе во веки прославляти сподоби.

Богородичен: Приими, о, Богомати, яко миро,/ от любве приносимую песнь сию,/ и принеси Сыну Твоему, яко дар,/ во оставление грехов наших.

Светилен:

Яко мудрая дева, светильник души твоея елеем украсивши,/ во след Христа устремилася еси, Татиано достоблаженная,/ и, Чертога Небеснаго достигши,/ Свет Невечерний лицезрети сподобилася еси./ Укрепи и нас, мати всехвальная,/ во свете заповедей Господних ходити/ и делы своими Бога прославляти.

Слава и ныне, праздника.

На хвалитех стихиры, глас 8.

Подобен: О, преславнаго чудесе:

О, преславнаго чудесе!/ Голубица нескверная, Татиана всеблаженная,/ девство и милосердие возлюбивши,/ сими, яко крилы духовными,/ возлете превыше видимыя твари,/ в Царство благодати и нескончаемыя радости,/ идеже, со всеми святыми пребывающи,/ молит Бога грехов оставление даровати,/ светло празднующим святую память ея.

О, преславнаго чудесе!/ Девства благое процветение,/ Татиана мученица Христова/ во дни гонений на Церковь русскую/ в законе Господни непорочно хождаше,/ страдания мужественне претерпевающи,/ темже, нетленным венцем увенчавшися/ и обретши дерзновение у Бога,/ подает людем верным велию милость.

О, преславнаго чудесе!/ О, Божественнаго произволения!/ Христова мученица Татиана,/ жена немощная сущи,/ демонов коварствия победи/ и, лютыя смерти не убоявшися,/ истину пред беззаконники исповеда./ Ныне же с бесплотными силами/ Триипостаснаго Бога прославляет.

Слава, глас 6:

Мира соблазны презревши/ и любовию Божественною возгоревшися,/ прилежно в темницах сущим послужила еси,/ любострадалице всечестная Татиано,/ раны юзников слезами омывающи,/ к мужеству сих словесы твоими укрепляла еси./ Ныне же, во славе вечной пребывающи,/ благодать духовную нам ниспосли,/ светло чествующим святую память твою,/ благоприятными твоими молитвами.

И ныне, праздника.

Славословие великое и отпуст.

На Литургии

Блаженны от канона, песни 3-я и 6-я. Прокимен, глас 6: Тебе ради умерщвляемся весь день,/ вменихомся яко овцы заколения. Стих: О Бозе похвалимся весь день и о имени Твоем исповемыся во век. Апостол Коринфяном, зачало 181. Аллилуия, глас 1: Терпя потерпех Господа, и внят ми. Стих: И услыша молитву мою. Евангелие от Матфея, зачало 39. Причастен: Веселитеся, праведнии, о Господе, и исповедайте память святыни Его.

Молитва

О, святая мученице Христова, Татиано! Агнца Божия непорочная агнице, целомудрия голубице, невесто Христа, Жениха твоего!

Ты, во дни жития твоего мирския похоти презревши, паче земных благ Господа возлюбила еси и во страданиих обрела еси небесный покой. Призри ныне с Небесе и виждь, яко погибаем во обстояниих и скорбех наших. К тебе прибегаем и твоея милости просим, не отвержи нас, убогих чад твоих, не имущих елея добрых дел, и на путь покаяния настави. Помяни старцы и юныя, сироты и вдовицы, нищия и убогия, в темницах и заточении сущия, недугующия и скорбящия, изряднее же, гонимыя веры ради Православныя. Нас же, юзами греха связанныя, разреши и ко спасению скоро направи, тебе бо дадеся благодать молитися за ны. Да, твоим предстательством ограждаеми, достигнем Царствия Небеснаго, идеже вси святии пребывают, прославляюще Имя Пресвятыя Троицы, Отца и Сына и Святаго Духа во веки веков. Аминь.