Инфекциялық ауруларды иммунды алдын алуын ұйымдастыру

Қазақстан Республикасы Үкіметінің «Алдын ала егулерді ұйымдастыру және жүргізу» санитарлық- эпидемиологиялық ережелерді бекіту туралы қаулысына сәйкес халықты тиімді және қауіпсіз иммунизациялау жүргізіледі. Егу жұмысына басшылық ететін дәрігер иммунолог барлық қызметкерлерге егу дәрмектерін сақтау тәртібі, оларды сұйылту әдісі, егу кезінде болуы мүмкін жағымсыз реакциялар мен асқынулар туралы түсініктеме беруге міндетті.

Вакцина бөлмесіне қойылатын талаптар: вакцина арнайы егу бөлмесінде жасалады. Бөлме қабырғасы тегіс, ылғалды жинау және дезинфекция жасауға төзімді болуы керек. Егу бөлмесінде табиға жарық, орталықтандырылған су, канализация, қол жуғыш және жылу жүйесі болуы қажет.

Егу бөлмесінде болуы керек:

• Мұздатқыш;

• Термоконтейнер(электр қуаты сөніп қалғанда вакциналарды сақтау үшін) немесе арнайы сөмке (вакцина тасымалдау үшін);

• Медициналық үстел;

• Жұмыс үстелі, орындықтар;

• Медициналық шкаф;

• Медициналық кушетка, жөргектейтін үстел;

• Бикс;

• Тонометр, термометр, бір рет қолданылатын шприц, шпатель, скарификатор;

• Шокқа қарсы дәрілер: 0,1% адреналин, 1% мезатон, преднизалон, тавегил, супрастин, 2,4% эуфиллин, корглюкон, кордиамин;

• Вакцина қалдықтарын залалсыздауға арналған ыдыс;

• Бір рет қолданылатын шприцтерді жинауға арналған қауіпсіз қатты қорап.

Балаларды алдын ала егулермен толық қамту мақсатында тұратын мекен-жайы бойынша аумақтық балалар емханасының қызметкерлері жылына 2 рет санақ жүргізіп, барлық балаларды тіркеуге алады. Ересек адамдардың тізімі аумақтық емханада жылына 1 рет қайта тексеріледі.

Балаларды егуге алдын-ала шақырады. Вакцина егер алдында дәрігер баланың денсаулығын толық тексереді. Дәрігердің тағайындауы бойынша егу бөлмесінде вакцина егіледі, егу туралы мәліметтер тиісті құжаттарға тіркеледі. Егу құжаттарына вакцинаның егілген уақыты, вакцина сериясы, шығарылған мерзімі, кім дайындағаны, мөлшері, егу әдісі жазылады.

Картотекада егу карталарын 4 топқа бөледі:

• Осы жыл бойы вакцина егілетін балалардың карталарын айлар бойынша қояды.

• Осы жылы егілмейтін балалардың карталары жылдар бойынша қойылады.

• Уақытша кетіп қалған балалардың картасы.

• Медициналық қарсы көрсеткіштері бар балалардың карталары.

Қолданбаған вакцинаны медицина қызметкері келесі әдістердің бірімен залалсыздандырады:

• 30 минут қайнату (сібір күйдіргісінде 2 сағат).

• Дезинфекциялық ерітіндіге толық батыру.

Қолданған шприц, инелерді қауіпсіз қатты қорапқа жинап, өртеу арқылы жою қажет, оларды болшектеуге, жууға, тазалауға болмайды.