Глава 16. Фарисейяс да саддукейяс локтiсны Исус дiнö да Сiйöс кыйöм могысь корисны петкöдлыны енэжсянь индысьпас

Фарисейяс да саддукейяс локтiсны Исус дiнö да Сiйöс кыйöм могысь корисны петкöдлыны енэжсянь индысьпас. 2 Исус шуис налы: «Рытнас тi шуанныд: "Енэжыс гöрд – аски лоö мича". 3 Асывводзнас шуанныд: "Енэжыс пемыдгöрд – кыптас бушков". Кык бана шаньгаяс! Енэжлысь чужöмбансö кужанныд тöдмавны, а кадлысь пасъяссö онö. 4 Лёк да пежас ылалöм йöз кöсйöны аддзывны индысьпас, но Иона пророк пасысь кындзи оз ло налы мöдыс». Сэсся Исус колис найöс да мунiс сэтысь. 5 Ты мöдлапöлö вуджиганыс велöдчысьяс казялiсны, мый вунöдöмаöсь босьтны няньсö. 6 Исус шуис налы: «Видзчысьöй фарисей да саддукей няньшомысь». 7 Велöдчысьяс ас костаныс сёрнитiсны: «Няньтö тай босьтны вунöдiм». 8 Тайöс казялöмöн Исус шуис налы: «Этша эскысьяс! Мый нö сёрнитанныд нянь абутöм йывсьыд? 9 Онö öмöй гöгöрвоöй? Вунöдiнныд öмöй вит сюрс мортöс вит няньöн вердöм йылысь? Кымын куд тыр сэки коляссö чукöртiнныд? 10 А нёль сюрс мортöс сизим няньöн вердiгöн, кымын куд тыр чукöртiнныд? 11 Кыдзи тi онö гöгöрвоöй, эг öд нянь йылысь Ме тiянлы висьтав, мися, видзчысьöй фарисей да саддукей няньшомысь!» 12 Сэки найö гöгöрвоисны, мый Исус тшöктiс видзчысьны налы фарисейяслöн да саддукейяслöн велöдöмысь, эз няньшомысь. 13 Исус воис Филиплöн Кесария муö да юалiс велöдчысьясыслысь: «Код туйö йöзыс пуктöны Менö, Морт Пиöс?» 14 Найö вочавидзисны: «Öтияс шуöны, Пыртысь Иоан пö, мöдъяс шуöны, Илля пö, кодсюрö шуöны, Еремей пö, а гашкö, нöшта на мöд пророк». 15 Исус юалiс: «Код туйö тi Менö пуктанныд?» 16 Симон-Петыр вочавидзис: «Тэ – Кристос, ловъя Енлöн Пи». 17 Исус шуис Петырлы: «Тэ шуда, Симон, Ионалöн пи. Öд тайöс тэныд эз морт висьтав, но Менам енэжвыв Батьöй восьтiс тэныд. 18 Ме шуа тэныд: Тэ – Петыр, из. Тайö из вылас Ме лэпта Ассьым Вичко, да сiйöс адлöн выныс оз вермы. 19 Ме сета тэныд Енэжвыв Юраланiнысь восьтанъяс. Мый кöрталан му вылын, сiйö кöрталöма лоö енэжын. Мый разян му вылын, сiйö разьöма лоö енэжын». 20 Исус öлöдiс велöдчысьяссö, медым некодлы эз висьтавны, мый Сiйö – Кристос. 21 Тайö кадсянь Исус кутiс висьтавлыны велöдчысьясыслы, мый Сылы ковмас мунны Ерусалимö да уна сьöкыд сэнi нуны пöрысьяссянь, аркирейяссянь да Индöдö велöдысьяссянь. Сiйöс виасны, но коймöд луннас Сiйö ловзяс. 22 Исусöс бокö корöмöн Петыр шуис: «Ен мед видзас Тэнö, Господьöй. Мед оз ло тайö!» 23 Бергöдчöмöн Исус шуис Петырлы: «Вешйы Ме дiнысь, сöтана! Тэ Менö крукöдан, öд тэнад мöвпъясыд мортсянь, абу Енсянь». 24 Исус шуис велöдчысьясыслы: «Кодi кöсйö мунны Ме бöрся, мед вунöдас асьсö, мед босьтас ассьыс крестсö да локтас Ме бöрся. 25 Кодi кöсйö видзны ассьыс олöмсö, воштас сiйöс. Ме вöсна олöмсö воштысь аддзас сiйöс. 26 Лоас-ö мортыслы бур, босьтас кö аслыс став муюгыдсö, а олöмсö воштас? Вермас-ö бöр ньöбны ассьыс олöмсö? 27 Морт Пи локтас Батьыслöн дзирдлунöн Сылöн анделъяскöд да быдöнлы уджъяс сертиыс мынтас. 28 Веськыда висьтала тiянлы: кодсюрö танi сулалысьяс пиысь кувтöдзныс на аддзасны юравны локтысь Морт Пиöс».