Глава 2. Исус чужис Юдея муын, Виплием карын, Ирöд öксы веськöдлан кадö

Исус чужис Юдея муын, Виплием карын, Ирöд öксы веськöдлан кадö. Исуслöн чужöм мысти асыввылысь Ерусалим карö воисны кодзув тöдысьяс. 2 Найö юалiсны: «Кöнi юдейяслöн пузчужöм öксыыс? Асыввылысь ми аддзылiм Сылысь кодзувсö да локтiм Сылы копыртчывны». 3 Тайöс кылöмысь Ирöд öксы инас эз кут öшйыны, шызис тшöтш дзоньнас Ерусалим карыс. 4 Ирöд корис аркирейясöс Индöдö велöдысьяскöд да юалiс налысь: «Кöнi Кристос чужас?» 5 Найö вочавидзисны: «Юдея муын, Виплием карын. Тадзи пророклöн гижöма: 6 – Тэ, Иуда муын Виплием кар, Иудалöн мукöд юрнуöдан каръясысь абу ичöтджык. Тэнад карысь буретш юралысь петас, Менсьым ыжъясöс, Израиль войтырöс, Сiйö видзны кутас». 7 Тöдысьясöс ас дiнас гусьöн корöмöн Ирöд юалiс налысь кодзув петан кадсö. 8 Сэсся мöдöдiс найöс Виплиемö да шуис: «Ветлöй, кага йывсьыс ставсö тöдмалöй. Кагасö аддзöм бöрын юöртöй меным, ме тшöтш вола копыртчывны Сылы». 9 Öксылöн шуöм бöрын тöдысьяс петiсны туйö. Асыввылысь аддзылöм кодзулыс кывтiс на водзвылын. Сэсся сiйö сувтiс буретш сэтчö, кöнi вöлi кагаыс. 10 Кодзув аддзöмысь тöдысьяслы лои зэв нимкодь. 11 Керкаö пырöм бöрын найö аддзисны кагаöс Мария мамыскöд. Пидзöс выланыс уськöдчöмöн найö копыртчылiсны кагалы да сетiсны Сылы дона козинъяс: зарни, ладан да смирна. 12 Узиганыс Ен öлöдiс тöдысьясöс Ирöд дiнö бöр мунöмысь, та вöсна найö мöдiсны ас муаныс мöд туйöд. 13 Тöдысьяслöн мунöм бöрын Господьлöн андел петкöдчис Öсиплы вöтас да шуис: «Чеччы, босьт кагатö мамыскöд да пышйы Египет муö, ов сэнi менам шутöдз. Ирöд кутас корсьны кагатö, мед вины Сiйöс». 14 Öсип садьмис, босьтiс кагасö мамыскöд да войнас мöдöдчис Египет муö. 15 Сэнi сiйö олiс Ирöд кувтöдз. Тадзи инiс пророк пыр Господьлöн шуöмыс: «Египет муысь Ме кори Пиöс». 16 Ирöд тöдмалiс тöдысьяслысь ылöдлöмсö да ёна скöрмис таысь. Сiйö мöдöдiс шыпуртаясöс, тшöктiс вины Виплием карысь да сы гöгöрысь кык арöса да ичöтджык став пи кагасö, тöдысьяссянь тöдмалöм кадö чужöмаясöс. 17 Тадзи инiс Еремей пророклöн шуöмыс: 18 – Рама карын ырзöм-бöрдöм кылö. Ракель аслас ныв-пи вöсна бöрдö, оз кöсйы ланьтны бöрдöмсьыс, öд найö абуöсь нин. 19 Ирöд кулöм бöрын Египет муын Господьлöн андел петкöдчис Öсиплы вöтас 20 да шуис: «Чеччы, босьт кагатö мамыскöд да бöр мун Израиль муö. Кагатö вины кöсйысьяс абу нин ловъяöсь». 21 Öсип чеччис, босьтiс кагасö мамыскöд да мунiс Израиль муö. 22 Сэки Юдея муын веськöдлiс Ирöд öксылöн Аркелай пиыс. Тайöс кывлöм бöрын Öсип повзис сэтчö мунöмысь. Сэки вöтас сылы вöлi шуöма мунны Галилея муö. 23 Сэтчö воöм бöрын Öсип овмöдчис Назарет карö. Тадзи инiс пророкъяс пыр шуöмыс: «Назаретсаöн Сiйöс шуасны».