Бап. Стационарлық көмек

1. Стационарлық көмек – тәулік бойы меди­ци­налық бақылау жасалатын, білікті, мамандан­дырылған және жоғары мамандандырылған медициналық көмек ұсыну нысаны.

2. Стационарлық көмек көрсететін денсаулық сақтау ұйымдары азаматтарға тиісті күтім жасалуын және олардың тамақтануын қамтамасыз етеді.

3. Стационарлық көмек көрсету тәртібін уәкілетті орган белгілейді.

Бап. Стационарды алмастыратын көмек

1. Стационарды алмастыратын көмек – бір күннің ішінде ұзақтығы төрт сағаттан сегіз сағатқа дейін медициналық бақылау жасалатын, дәрігерге дейін­гі, білікті, мамандандырылған және жоғары маман­дандырылған медициналық көмек ұсыну нысаны.

2. Стационарды алмастыратын көмек көрсету тәртібін уәкілетті орган белгілейді.

Бап. Жедел медициналық көмек

1. Жедел медициналық көмек – денсаулыққа келетін елеулі зиянның алдын алу немесе өмірге төнген қатерді жою үшін шұғыл медициналық көмекті талап ететін аурулар мен жай-күй туын­даған кездегі медициналық көмек ұсыну нысаны.

2. Жедел медициналық көмек көрсету үшін Қазақстан Республикасының денсаулық сақтау саласындағы заңнамасында белгілеген тәртіппен жедел медициналық көмектің мамандандырылған ұйымдары мен қызметтері құрылады.

3. Жедел медициналық көмек көрсету тәртібін уәкілетті орган белгілейді.

Бап. Санитариялық авиация

1. Санитариялық авиация – пациенттің тұрған жеріндегі медициналық ұйымда медициналық жабдықтың немесе тиісті біліктілігі бар мамандар­дың болмауы салдарынан медициналық көмек көрсету мүмкін болмаған кезде халыққа шұғыл медициналық көмек ұсыну нысаны. Санитариялық авиация нысанында медициналық көмек ұсыну әртүрлі көлік түрлерімен білікті мамандарды меже­лі жерге жеткізу не науқасты тиісті медицина­лық ұйымға тасымалдау жолымен жүзеге асырылады.

2. Санитариялық авиация нысанында меди­циналық көмек ұсыну тәртібін уәкілетті орган белгілейді.