Уарзоны фын

Æрбалæууыд райсомæй раджы уый, раджы,

Уый сæрды.

Мæ зæрдæ фырцинæй фыхти цыма аджы,

Мæ зæрдæ...

Ныррухс и мæ цæсгом. Йæ фæстæ фырцинæй

Æз кастæн.

Мæ уарзон, дæ иу уынд бæллæхдæр фыдхинæй

У мастæн.

Уый буцгомау фелвæста, мидбылты худгæ,

Йæ худ ма...

Йæ уарзт та æнæдзырдæй бахызти дудгæ

Мæ удмæ.

Уæ, уарзон!

Дæу уарзын

У карз зын.

Ды разын,

Цæй, тагъд,

Мæ зæрдæйы

Фат

Ныссагъд!

***

Бауарзтой, бауарзтой тынг

Лæппу 'мæ чызг.

Уарзтæй сæ зæрдæты зынг

Сыгъд.

Чызг ныр æнхъæлцау уыди.

Марынæй тарст.

Афтæ хъуыди уый, хъуыди

Уарзт.

Чызджы æвзонынц, хæрынц.

Фенад ын цард.

Хионтæ чызджы тæрынц

Дард.

Лæппу сæ хæрæфырт у —

Баци хæрзсæфт.

Ахаста цæсгомыл туг —

Цæф.

Чызг та ма аринаг уыд...

Фесæфт йæ цард.

Ауыгъдæй кауыл лæууыд

Мард.

Хъавыд зæгъын ма цыдæр —

Гом уыд йæ дзых...

Баныгæдтой сæ кæмдæр

Сых.

УАД

Кодта нæ цъитийæ уад,

Марзта уый бæстæ 'мæ хаста.

Хæдзæрттæ калдысты уæд,

Уад цыма иста йæ хæстæ.

Фалгæрон кодта бынтон,

Сау комы хъæутæ сыгъдысты.

Уыд цыма зæххыл зындон, —

Лæгæттæм адæм лыгъдысты.

Иууылдæр бæстæ уыд тарст.

Ниудтой-иу куыйтæ 'мæ ниудтой.

Нал уыди иу дæр æдас.

Алырдæм адæм ысхъиудтой.

Иу æмгар мемæ лыгъди,

Иумæ лыгъдыстæм нæ хохмæ.

Хæдзар кæронæй сыгъди.

Батахти æмгар йæ тохмæ.

Арты ысмидæг æцæг,

Батæррæтт ласта уый уатмæ.

Артмæ уый бацыд хæцæг...

Радавта уарзоны артмæ.

Уарзонæн батæ кæны,

Уарзон йæ хъæбысы хаста.

Арт сæ бынтондæр хæры...

Уад сæ кæдæмдæр фæхаста...

Нал уыди арвыл къæм дæр,

Банцади уад дæр йæ куыстæй.

Мардæй ыссардтой кæмдæр

Уарзæтты багонд хъæбыстæй.

ЦАРД

Сау хохы лæгæт — мæ цæрæн,

Уазал дымгæ мæм цæуы.

Афтæмæй нал дæн мæ сæрæн,

Афтæ мæ зæрдæ кæуы.

Цъæх ихы тæрхæг — мæ бадæн,

Миты хъæпæны хуыссын.

Ницыуал зонын мæ цардæн,

Мигъы хæтæны тыхсын.

М' алыварс тымыгъ ныккæуы,

Лæгæт ныхъхъæртæ кæны.

Зæйы лæсæн мыл æрцæуы,

Уазал мæ зæрдæ хæры.

Æрттивгæ хур мæм æркæсы,

Рухс тынтæ калы бæргæ.

Сау мигъ та хуры æмбæрзы,

Æврагъ æй фæкæны тæргæ.

Бирæ дæр нал уыди бонæй,

Талынггæрæттæ æрцис.

Чидæр мæм дзуры мæ номæй:

«Цæй-ма, цы фæдæ! Фæдис!»

Бакатай кодта мæ зæрдæ,

Ныддыз-дыз кодта мæ туг.

Чидæр ныккуыдта мæ сæрмæ:

«Бабын мын кодтой мæ дзуг!»

Базмæлыдысты мæ уæнгтæ,

Фæгæпп ма ластон бæргæ.

Салдысты ихыл мæ къæхтæ,

Æрхаудтæн ихыл кæугæ...

Дæндагæй хордтон мæ къухтæ,

М' амондмæ мардтæн мæстæй.

Хъæртæ ма кодтон, фыдкъултæ:

«Сафынц кæйдæр та рæстæй!»

Мæхи æддæмæ рæдывтон.

Цъæх их ныффидар мæныл.

Æмæ та тынгдæр ныккуыдтон:

«Уæууæй, сæфы, мæгуыр!»

Цæстытæ аисты сау тар,

Фестадтæн мæ мады уæлхъус.

Мæ мад та райста йæ саудар,

Рагæй мæ мæтæй ныххус.

Йæ цæссыг калди мæ мадæн,

Хъарджытæ кодта мæныл.

Афтидæй уызта мæ авдæн,

Зæрдæтæ 'вæрдта, мæгуыр.

……………………………

Иуырдыгæй стай нынниуы.

Саугуырм уыг ныууасы кæмдæр...

Бацыдис уазал мæ риуы.

Тарф зымæг, куы фæуис дæлдæр!

Зыгъарæг йæ дæндаг ысхъауы,

Бирæгъæн ныззынг ис йæ цæст.

Удхæссæг сау цæвæг дауы —

Мемæ уыдзæни сæ хæст...

Мæй та мæм ферттывта мигъæй,

Фæлæ та йыл сау мигъ ыссыд.

Зæй та ныл рауади тигъæй,

Тигъæй ма иу хъæр фæцыд...