Сылгоймаг

Хæйрæгæн йæ цæстæнгас райста,

Хæцаг калм ын радта æвзаг.

Йæ дзæбæх уынд зæдæн уый байста,

Йæ къахайст та радта йын саг.

Гæдыйæн уый райста йæ митæ,

Сывæллонæй — мидбылты худт.

Йæ зæрдæйы — бирæ фыдхинтæ...

Йæ цæссыг йæхи мидæг уыд.

Рæсугъдæй фыд-зæрдæтæ исы,

Йæ фыдæвзаг маргæй у дзаг.

Лæгæн уый йæ зæрдæмæ хизы,

Мæстыйæ уый — калмау хæцаг.

Йæ зæрдæ хæйрæгау фæливы:

Куы уары, куы хурау кæсы.

Мæлæтау йæхимæ ыссивы,

Уый зæрдæтæ ласы, хæссы.

Фыруарзтæй æцæг уый фæкæуы,

Мæстыйæ фæхуды æргом...

Кæй нæ уæ, кæй нæ уæ нæ хъæуы?!

Йæ ном у... Сылгоймаг — йæ ном.

ФЫЦЦАГ ФÆКАСТЫ УАРЗТ

Фыццаг фæкасты уарзт —

Æнæтæригъæд маст,

Лыстæгмур хуры тын,

Дзæнæты царды фын,

Æнæ дуар, æхгæд,

Æнæ фæд-фæды фæд,

Тыхджын арвы гæрах,

Æнæхуысгæ цырагъ,

Æнæмæлгæ мæлæт,

Зæрдæуынгæ дзæнæт.

АРВЫ ЦÆФ

Арв ныццавта тулдз бæласы, арв,

Ахызт цæф, йæ цъуппæй уидæгтæм уый ахызт.

Арвы зынг йæ зæрдæйы бынтондæр бахызт —

Тулдз æвиппайды ризгæ судзы тарф.

Уæ, æвиппайды æнæ ныхасæй уарзт,

Афтæ зæрдæ ды æвиппайды ныццæвыс,

Цинæй тагъд дзæнæты ризгæ, судзгæ сæфыс,

Дæу нæ уромы мæлæты маст.