ХУЫМÆЛЛÆГ

Бур-бурид хуымæллæг —

Бæлæстыл ыздыхст,

Тарбынцъæх — йæ мæцкъор,

Къалиутыл ыстыхст.

Бирæгай сыфтæртæ —

Бæлæстыл дзыгуыр.

Бæлæстæн сæ сæртæ —

Хъулæттæ, дзыгъуыр.

Рог уæлдæфæй цуды

Хуымæллæг æнцад,

Худгæ хурау худы

Балбæласыл — зад.

Бæласæй æрластой

Хуымæллæг бынмæ.

Гæлæбу æрхаста

Рог улæфт мæнмæ.

Хуымæллæг, дæ тæфæй

Расыг у уæлдæф.

Удхосау хæлæфæй

Нуазын æз дæ тæф.

***

I

Сау коммæ тарф тын

Бæрзæндтæй каст,

Н' алыгъд йæ тар фын,

Н' аскъуыд йæ маст.

Арвæй фæхаудта

Зæхмæ цæхæр,

Даудта уый, даудта

Комæн йæ сæр.

Уый йæм æркасти

Æврæгътæй мæй,

Ком та йæ мастæй

Баци фынæй.

Арвæй ыстъалы

Коммæ уый тахт,

Бамынæг тары,

Тары ныссагъд.

II

Чи дæ рæвдауы,

Дæу, уæ, мæ хох?

Чи дыл æфтауы

Йе згæхæрд рох?

Чи худы комы?

Чи кæны хъæр?

Чи та дæ домы,

Уæ, мæгуыр сæр?

Уый йæ рæвдауы

Талынджы тох,

Уый йыл æфтауы

Хæйрæг йæ рох.

Худгæ фæтæхы

Сау коммæ дард,

Комы фæтæхы

Тарæй йæ арт.

Удхæссæг зары

Хохмæ æргом,

Уый йыл æвзары

Цæвæджы ком...

III

Сæй ныр дæ садæй,

Уæ, мæ хох, ды,

Ниугæ æнцадæй,

Хаугæ мæты.

Судзгæ дын зары

Зæрдæ, мæ хур...

Ахуысс уал тары,

Ракæсдзæн хур.