УÆУУÆЙ

Уæууæй, нæуæндаг, кæнæм фыдвæндаг —

Алырдæм куы акæсай дзæбæх:

Къуымых — нæ æвзаг, къуындæг — нæ фæндаг,

Н' алыварс — тархъæд, къæдзæх!

Цæуы кæдæмдæр куырмæй нæ фæлтæр

Иугæйттæй былтæй кæлгæ...

Кæуы нæ сыл дæр, ирæд фæфылдæр...

Кæугæ ды дæр сау куыдæй, кæугæ!

Кæм уа цæрвджындæр, уырдæм нæ хуыздæр

Къах-къухтыл кафгæ цæуы.

Кæм уа нæ зындæр, уым та мæгуырдæр

Сау цæссыг калгæ кæуы...

Цæй, ныр цы кæнæм, куырмæй куыд цæрæм?

Кæй аххос кæнæм нæ зын?

Æмвæнд нæ кæнæм, æнгом нæ цæуæм...

Уастырджи, фæзын нæм, фæзын!..

***

Уазал дæ зæрдæмæ калын,

Уæ, мæ хур, æз.

Зарын дын, зарын дын, зарын,

Айрæз ды, рæз.

Тымыгъ дæ авдæныл тауын,

Ахуысс ды, цæй.

Дæу æз рæвдауын, рæвдауын,

Ау фынæй.

Ризы дæ зæрдæ 'мæ ризы,

Судзын æй æз...

Риссы, æнхъæлдæн, уый риссы.

Айрæз ды, рæз.

Судзын мæхæдæг æз артау,

Ракæс-ма, кæс...

Уарзын дæ, уарзын дæ цардау,

Уæ, мæ хур, æз.

Уарын дыл, калын дыл, калын,

Уæ, хуры хай.

Уый æз мæ цæссыг лæдарын.

Ма кæ тæргай.

Хурау кæндзынæн æз сæрды

Батæ дæуæн.

Афтæ ды, афтæ, мæ зæрдæ, —

Удылæууæн.