Хохы цард

— Нæ фыдæлтæ, нæ сæрæнтæ,

Æрыгонæй — фыд-зæрæдтæ,

Цæй гуыбыр стут сымах?

— Нæ хох у дзаг ныр ахæмтæй,

Фæкъахтам хæхтæ къахæнтæй,

Æккойæ хастам мах.

— Цæуыл кæут, цæ, устытæ?

Цы мын ысты уæ куыстытæ?

Цæмæн ыстут æнкъард?

— Нæ уынæм мах нæ хæстæджы,

Фыдкуырм ыстæм нæ фæздæджы —

Æлгъыст у хохы цард.

— Цæй тар ыстут, нæ фæсивæд?

Цæмæ кæсут уæ фæди-вæд?

Цы уæ ферох сымах?

— Нæ зæрдæ гъеныр — сау мæты:

Ирæдыл зæрдæ банæты,

Ирæд хъæуы ныр мах.

— Цæй фыдхуыз стут, нæ чызджытæ?

Цы ран фестут фыдсыджыты?

Цæуылнæ стут сæрæн?

— Уыдыстæм мах хæрз сæрæнтæ,

Ныйистæм ныр фыд зæрæдтæ.

Ысчынди нын кæлæн.

— Уæ, сабитæ, цæуыл кæут?

Фыдгæмттæй мын кæдæм цæут?

Цы уæ хъæуы сымах?

— Æрцауыгътой нæ дадаты,

Нынныгæдтой нæ нанаты,

Сыдæй мæлæм ныр мах.

САУ АЗ

Дагъы байтыдтон хъæдур

Уалдзæджы.

Загътон: араздзæн, мæ хур,

Уазæджы.

Кодтон хохрæбын æз хуым.

Байтыдтон.

Хохæй иу гага дæр уым

Нал уыдтон.

Хуымыл акалдтон мæ туг

Къахыныл.

Амбырд сау халæтты дзуг

Сау хуымыл.

Уидзынц мыггаджы бынтон

Халæттæ...

Фидын, фидын уыд зындон

Хъалæттæ.

Рауад дагъы хуымыл зæй —

Бабынæй.

Загътон: бацæрон ныр, цæй,

Давынæй.

Къуымтæй сабитæ кæуынц

Сау куыдæй.

Гæмттæй курынмæ цæуынц

Тарф зыдæй.

Нал и, нал мын и гæнæн,

Бавналон.

Нал и афтæмæй цæрæн,

Бавзарон.

Нал уыд, нал уыди фæрæз —

Радавтон.

Давын райдыдтон уæд æз,

Батавтон.

Иу хатт радавтон хъæдур

Хъавгæйæ.

Цæнгтæй рахиз цонг фæмур

Давгæйæ.

Иннæ — радавтон кæрдзын

Галгæстæй...

Уыд мæнæн мæ зын хæрз зын

Ахæстæй.

Даудтон ахæстоны æз

Сонт асы.

Афтæ ахицæн мæ хæс —

Фондз азы.

Уым мын фелвæста мæ цонг

Сау рæхыс.

Уым мæ бахордта ыстонг —

Сау сæг-хыз.

Фесæф, фесæф, хох, мæ хох,

Бабын у.

Цард — фыдцард. Мæ хохы тох

Давын у.