ХÆХТÆ СУДЗЫНЦ

Судзынц, судзынц, судзынц хæхтæ.

Арт нытътъанг æмæ ныппырх.

Пиллон калынц дæгътæ, дæгътæ,

Сау хох талынджы ныссырх.

Дымгæ арты суры размæ,

Дымгæ дымгæйы тæры.

Арт ызгъоры цъассæй цъасмæ,

Сырх арт фæсалы хæры.

Сауæй зайы хох йæ фæстæ,

Пиллон калы разæй арт.

Сауыл зайы рухс гæбæзтæ,

Рухс æрттивынц зæхмæ дард.

Арвау дардмæ хох æрттивы,

Хохæй стъалытæ кæсы.

Дымгæ размæ арты ссивы,

Арт та фæсалы хæссы.

Арты бандзæрста уый тохæй

Абон сахъхъ фыййау æцæг.

Уый нæ ныууагыа, нæ, рохæй

Хохыл бур фæсал хæцæг.

Кодта уый йæхицæй над хос,

Афтæмæй бынтон фæхъал.

Нал хъæуы фыййауы фадхос,

Нал хъæуы зæронд фæсал...

Хох ныр баззади сæнтсауæй,

Федта уый цыма зындон...

Нæ, уый 'рæмбæрздзæни тауæй,

Уалдзæг цъæх уыдзæн бынтон.

Уым та хиздзæни нæ фыййау —

Тагъд у уалдзæгæн йæ дуг.

Уым хæлиу кæндзæн зыд зæйау

Фыстæ, уæрыччытæй дзуг.

ДЫМГÆ

Дымгæ згъоры,

Тымыгъ калы,

Ниуы, ниуы,

Бæстæ халы:

«Дымгæ, дымгæ дæн æз,

Тауын, тауын пæлæз.

Бакæ рудзынг!

Дæн æз сур зынг,

Мигътæ мемæ æз хæссын.

Тымыгъ калын,

Бæстæ халын,

Цæй, дæумæ, дæумæ кæсын!

Хæст мысын...

Æз бырсын».

«Рацу, уæ, дымгæ, ды рацу.

Зонын, зонын дæу.

Алы хуынчъытæй æрбацу,

Тох мæ бон нæу, нæу.

Цæй, æркæ, æркæ дæ хъæццул

Ды мæныл.

Æз æрхуысдзынæн дæ хæдцур

Мадкъæлыл.

Уæ, дымгæ!

Рацу, цæй,

Хъаз мæнæй...

Æз хуыссын, хуыссын.

Фенон зын.

Зын, зын, зын.

Зын...

Мæлын».

«Тауын, тауын дыл хъæццул,

У бæмбæгæй.

Тауын, тауын æз фæлтæргай.

Æз кæнын, кæнын хъæбыс, хъæбыс.

Ыс-с.

Æнцад ды хуысс...

Зилын, зилын, зилын бæстыл,

Исын хæстæ.

Цæй, хæрзбон.

Æз кæм уон,

Футт, футт, футт,

Уым — гаффутт».