Тэма 13. Езус выганяе злых духаў

Дыдактычная мэта:

пазнаёміць вучняў з біблійнымі гісторыямі пра тое, як Езус выганяў злых духаў; дапамагчы вучням зразумець, што Езус Хрыстус робіць гэта моцаю Божаю, што з Езусам можна перамагчы зло.

Выхаваўчая мэта:

фарміраваць у вучняў імкненне пазбягаць зла і адракацца ад любых яго праяваў.

Матэрыялы:

Біблія: Мк 1, 23–27; Мц 12, 28; Мк 5, 1–15; Мк 9, 17–29

Ілюстрацыя: «Езус выганяе злога духа», а таксама надпісы: «Што Табе да нас, Езус Назаранін? Ты прыйшоў загубіць нас? Я ведаю Цябе, хто Ты: Святы Божы» (Мк 1, 24); «Але Езус забараніў яму, кажучы: „Змоўкні і выйдзі з яго!“ (Мк 1, 25); «А калі Я выганяю злых духаў Божым Духам, то настала для вас Валадарства Божае» (Мц 12, 28).

Метады катэхезы:

малітва, аналіз біблійнага тэксту, медытацыя над абразом, завучванне ключавога верша на памяць, слуханне аўдыёзапісу Бібліі, прагляд фрагмента з фільма, дыялог, праца ў групах, пісьмовая праца на аснове тэксту, прэзентацыя, творчая майстэрня — пантаміма.

Ход занятку

Малітва

Тваёй абароне

Праверка хатняга задання

Катэхет прапаноўвае вучням падзяліцца сваім вопытам малітвы за хворых, а таксама распавесці, ці атрымалася ў іх наведаць хворых.

Пры паўтарэнні хатняга задання можна карыстацца крыжаванкамі, змешчанымі ў канцы сшытка (крыжаванка № 12).

Чалавек пытаецца

Катэхет ставіць з вучнямі пантаміму «Банты».

Бог стварае чалавека, паказвае яму ўсё створанае і сыходзіць. Нейкі час чалавек разглядае навакольны свет, пускае птушак і г. д. З’яўляецца дзяўчына, якая нясціпла сябе паводзіць. Яна зацікаўлівае чалавека. Той дазваляе ёй апрануць яму на руку акову — стужку ці бант. Другі канец яна трымае ў сабе. Потым уваходзіць персанаж, які ўвасабляе другую спакусу — грошы. Трэці прапануе наркотыкі, чацвёрты — алкаголь. Кожны з гэтых персанажаў апранае чалавеку на руку сваю павязку і адыходзіць убок. Такім чынам, чалавек застаецца пасярод сцэны, а гэтыя чацвёра стаяць па двое з розных бакоў. Яны пачынаюць кіраваць ім, як марыянеткай. Чалавек спрабуе кудысьці ісці, рабіць нейкія рухі, але тыя чацвёра кантралююць яго. Чалавек, змучыўчшыся, нізка схіляецца. Уваходзіць Хрыстус. Ён падыходзіць ззаду і ўкладвае свае рукі ў банты. Чацвёра ўкрыжоўваюць Яго, але Хрыстус уваскрасае і пазбаўляецца ад бантоў. Усе чацвёра падаюць, церпячы паражэнне. Хрыстус пераможна ўзвышаецца над імі, а чалавек становіцца перад Ім на калені. Гучыць урачыстая музыка.

Катэхет задае вучням пытанні:

— Як гэта — быць марыянеткай? Чаму?

— Што вы зразумелі з гэтай пантамімы?

Бог адказвае

Катэхет вешае на дошку ілюстрацыю: «Езус выганяе злога духа», а таксама надпісы: «Што Табе да нас, Езус Назаранін? Ты прыйшоў загубіць нас? Я ведаю Цябе, хто Ты: Святы Божы» (Мк 1, 24); «Але Езус забараніў яму, кажучы: „Змоўкні і выйдзі з яго!“ (Мк 1, 25); «А калі Я выганяю злых духаў Божым Духам, то настала для вас Валадарства Божае» (Мц 12, 28).

Катэхет дае вучням магчымасць праслухаць чатыры фрагменты з аўдыёзапісу Бібліі: Мк 1, 23–27; Мц 12, 28; Мк 5, 1–15; Марк 9, 17–29.

Катэхет дзеліць вучняў на 3 групы і раздае карткі з фрагментамі Бібліі (у сшытку заданне № 1):

1) Мк 1, 23–27; Мц 12, 28;

2) Мк 5, 1–15;

3) Мк 9, 17–29.

I группа: Мк 1, 23–27; Мц 12, 28.

Прачытай біблійныя тэксты і адкажы на пытанні:

— Дзе Езус сустрэў апанаванага злым духам?

— Што крычаў злы дух?

— Як адрэагаваў на гэта Езус?

— Што Езус сказаў злому духу?

— Што злы дух зрабіў?

— Якая была рэакцыя ў людзей на цуд?

— Якою моцаю Езус выганяў злых духаў?

ІІ група: Мк 5, 1–15.

Прачытай біблійныя тэксты і адкажы на пытанні:

— Дзе Езус сустрэў апанаванага злым духам?

— Дзе жыў апанаваны?

— Як да яго ставіліся людзі? Чаму?

— Як апанаваны сустрэў Езуса? Што ён сказаў Езусу?

— Што Езус адказаў апанаванаму?

— Пра што прасілі Езуса злыя духі?

— Што здарылася са свіннямі, калі злыя духі ўвайшлі ў іх?

— Якую праўду пра злых духаў адкрываюць нам свінні, што патанулі ў моры?

— Як сябе паводзіў і адчуваў вызвалены ад злых духаў чалавек?

— Якая была рэакцыя ў людзей на гэты цуд?

ІІІ група: Мк 9, 17–29.

Прачытай біблійныя тэксты і адкажы на пытанні:

— Хто прыйшоў да Езуса і з якой просьбай?

— Па якіх прыкметах можна пазнаць чалавека, апанаванага злым духам?

— Калі злы дух убачыў Езуса, што ён зрабіў з апанаваным?

— Як ты разумееш словы Езуса: «Усё магчыма для таго, хто верыць»?

— Што Езусу адказаў бацька апанаванага?

— Якімі словамі Езус выгнаў злога духа?

— Чаму вучні не маглі выгнаць злога духа?

Вучні дзеляцца сваімі адказамі.

Катэхет прапаноўвае вучням зрабіць пісьмовае заданне ў сшытку.

На падставе біблійных тэкстаў (Мк 5, 1–15; Мк 9, 17–29) запоўні табліцу (у сшытку заданне № 2).

Катэхет:

Выгнанне злога духа — першы цуд, апісаны св. Маркам. Ён глыбока сімвалічны. Езус рашуча супрацьстаіць злу. У прысутнасці Пана злыя духі трацяць сваю моц. Там, дзе гучыць Яго слова, няма месца цемры.

Праз грэх зло і смерць увайшлі ў жыццё чалавека. І пакуль у злых духаў ёсць права жыць на зямлі, імі кіруе імкненне авалодаць душамі людзей, у якіх яны атрымліваюць спакой і прытулак, а таксама выратаванне ад таго, каб быць раней часу адпраўленымі ў пекла. Часцей за ўсё адным чалавекам авалодвае адзін дэман, але часам у яго могуць усяліцца адразу некалькі злых духаў. Злы дух авалодвае чалавекам з мэтай парушыць сувязь апанаванага з Богам і падштурхнуць яго да дрэнных учынкаў; спакусіць да бязвер’я; прымусіць чалавека ілгаць; апаганіць яго душу. Дэманы няспынна мучаюць апанаванага чалавека і могуць нават выклікаць хваробы: псіхічнае расстройства (Мк 5, 1), эпілепсію (Мк 9, 18), скрыўленне пазваночніка (Лк 13, 11), або зрабіць чалавека нямым (Мц 9, 32), адначасова нямым і сляпым (Мц 12, 22). Злыя духі, якія прыносяць чалавеку такія пакуты, адрозніваюцца па ступені жорсткасці (Мц 12, 45). Але іх нязменная мэта — загубіць чалавека, каб потым адправіць яго ў валадарства свайго пана (Мк 9, 22).

ПРЫКМЕТЫ АПАНАВАНАСЦІ: выкрыкі, якія вырываюцца ў чалавека не па яго волі, кароткачасовыя неспакойныя паводзіны: скрыгатанне зубамі, прыпадкі, незвычайная фізічная сіла, якая кідаецца ў вочы; рэзкае супрацьстаянне любому боскаму ўплыву; эпілептычныя прыпадкі, сутаргі, якімі суправаджаецца выхад злога духа з апанаванага.

ПРЫЧЫНЫ АПАНАВАНАСЦІ могуць быць самымі разнастайнымі. Свядомае ўтойванне цяжкага граху, звычка брыдкасловіць і блюзнерыць, ілжывая клятва і іншыя дрэнныя ўчынкі могуць даць злому духу нагоду ўсяліцца ў чалавека. Часта апанаванасць чалавека – гэта вынік заняткаў акультызмам: чараўніцтва, выклікання духаў, наведвання празорцаў або спірытычных сходаў. Нашэнне амулетаў, слуханне сатанінскай музыкі, лячэнне гамеапатычнымі лекамі і г. д. — усё гэта можа быць прычынаю для таго, каб д’ябал авалодаў душой чалавека.

ВЫЗВАЛЕННЯ АД ЗЛЫХ ДУХАЎ можна дасягнуць толькі шчырым пакаяннем і адрачэннем ад сатаны, заснаваным на веры ў перамогу, якую Езус Хрыстус дзякуючы свайму крыжу атрымаў над д’яблам. Езус прыйшоў, каб разбурыць справы д’ябла. Ён аздараўляў апанаваных, выганяючы з іх дэманаў. Моцаю выганяць злых духаў Ён надзяліў і сваіх Апосталаў. У касцёле ёсць святары-экзарцысты. Яны прызначаюцца мясцовым біскупам для таго, каб іменем Езуса Хрыста і моцаю Божаю выганяць злых духаў.

Чым больш апанаваны напаўняецца Духам Божым, тым хутчэй слабее ўлада д’ябла над ім, і ў рэшце рэшт ворагу даводзіцца — часта пасля ўпартай барацьбы — выйсці з чалавека. Таму пакорымся Богу і будзем супрацьстаяць д’яблу, тады ён уцячэ ад нас.