Апреля 1592 г

От царя и великого князя Федора Ивановича всеа Русии на Двину выборному земскому судье Ивану Порфирьеву сыну Безбородово с товарыши. Бил нам челом з Двины Николы чюдотворца Корелского монастыря игумен Варлам з братьею Николского ж монастыря на крестьян, которые из-за мона­стыря выбежали, а живут на Двине: на Парфенка Яковлева да на Вешнячка Иванова сына Латухина, а сказал: жили деи те крестьяне за Николским монастырем в деревнях; и как деи писал писец наш князь Василей Звенигородцкой с товарыши всю Двину и Двинской уезд и их Николскую вотчину, и тех деи их крестьян Парфенка да Вешнячка написал за Корелским монастырем.

И в нынешнем де в 100 году [1592 г.], в Филипов пост[48], о Николине дни[49] выбежал деи тот их крестьянин Вешнячко из их из Николские вотчины без отказу, безпошлинно со всеми своими животы и статки[50]; а пришел деи тот крестья­нин Вешнячко к николскому крестьянину к Исачку к Терентееву да и женился деи он у того Исачка на дочери. А Парфенко де выбежал из Николские волости нынешнего ж 100 году в Великой пост[51], о зборном воскресенье[52], со всеми своими животы и статки, а пошлин деи монастырских на ны­нешней 100 год не платил никаких. И нынеча деи те их кре­стьянские деревни, в которых они жили, пустеют; а те деи крестьяне их Николские вотчины искони вечные. И вперед деи их Николской вотчины, от отпусков наших служб и от дани и от оброку оплачиваючи за те деревни, запустети: а ста­нет деи с тех з дву деревень в нынешней весне в отпускех и во всяких наших податех болши 20 рублев и в том, что те деревни залегли не паханы. И будет так, как нам Николы Корелского монастыря игу­мен Варлам з братьею бил челом. И как к вам ся наша гра­мота прийдет, и вы б про тех крестьян сыскали всякими сы­ски накрепко и обыском обыскали тутошними и околними людми[53], что те крестьяне наперед того за Корелским монасты­рем живали ли и в нынешнем в 100 году из-за Николского монастыря без отпуску выбежали ли. Да будет в обыску ска­жут, что те крестьяне Парфенко да Вешнячко наперед сего за Николским монастырем жили и выбежали в нынешнем в 100 году без отпуску, и вы б тех крестьян Парфенка да Вешнячка вывезли и опять за Николской монастырь з же­нами и з детми и со всеми их животы и посажали их в Ни­колской вотчине Корелского монастыря в старые их в деревни и дворы, где они жили наперед того.

Да и вперед бы есте из Николские вотчины крестьян в заповедные лета до нашего указу в наши в черные деревни не вывозили, тем их Никол­ские вотчины не пустошили. А прочет сю нашу грамоту и списав в нее противень слово в слово, отдали николскому игумену Варламу з братьею, и он ее держит у себя для иных выборных судей и данных зборщиков. Писан на Москве лета 7100, апреля в 14 день.