Эски аскерчиле

Джангурла джауадыла, кекде булутла къаралыб,

Аскер чыкъганды, Уллу Къарачайдан саналыб.

Джашла барадыла джолланы толтуруб, сагъайыб,

Анала къалдыла ой, ызларындан таралыб.

Джашла барадыла, атлагъа миниб, атылыб,

Отоула къалдыла, ой, эшиклери тартылыб.

Ала баралла, ой, не кюлмей, не ышармай,

Къалмады адам, тилек тилемей, ашырмай

Джашла барадыла Къобан ёзенде къаралыб,

Келинле къалдыла, ой, ау тюбюнде аралыб.

Ой, бара, бара, биз Акъ-Къала джетгенек,

Уллу Акъ-Къалада тууар къурманлыкъла этгенек.

Ой, Гаппушланы Алхаз-Хаджиге джетгенди,

Сау къурманлыкъдан джанъыз тууар санъылчакъ,

Учкулан сотняны сора бетин джоюб къойгъанды

Шайлыланы Хасан ма атха салгъан анъырчакъ.

Ай, Акъ-Къалада уа, ой, къурулдула шатырла,

Къайтыб а барадыла сюдюле деген къатынла.

Ой, Акъ-Къалада бизге аскер кийим кийирдиле,

Андан да барыб, мешиналагъа миндирдиле.

Тюрлю да чыгъады ой, мешинаны тютюню.

Ай, бузулгъанды таулу джашланы тюрсюню.

Белегибиз андан Уллу Славагъа баргъанек

Биз анда сатыб тишлик тууар алгъанек.

Ол тууар тюлдю, экиджашар ууанык,

Джашла къайтсынла ой, къууанч этиб, джубаныб.

Къайыш этгенбиз тишлик тууарны терисин,

Сууда къоймагыз джарлы Хаджи-Алини ёлюсюн.

Хаджи-Али кетди, Къара тенгизге кёмюлдю,

Сууда ташайгъынчы, джарыкъ дуниядан тюнгюлдю.

Мындан баргъан энъ Учкулан сотнягъа баш болуб,

Сууда къалгъанса, ой, чабакълагъа аш болуб.

Сени юсюнг бла орус джюзюучюле джюзелле.

Бут этлеринги ыргъай чабакъла юзелле.

Кийимлеринъ къалды сени чабакълагъа ау болуб

Ёлюнг сууда къалмаз Адемей мында сау болуб.

Ауруу табханбыз темир мешинаны ууундан,

Ауруу табханбыз Славаны балчыкъ суундан.

Къоркъмай атлайбыз,кезюне къараб аджалдан,

Айырылгъанбыз ичибизден белек маджалдан.

Джан а беребиз ёрлеб биз таулагъа.

Джашауубуз къалсын ызыбыздан келген саулагъа.

Дебош джан береди да ой, Ыслава да термилиб,

Хаджи-Али барады Къара тенгизге кемюлюб.

Шамайыл батырча, етгюрле хазна туумайды,

Бюгюн не болгъанды джаугъа нек къаршчы турмайды?

Къаракётланы, джаным а Зауурбек уста болгъанды

Ёлген джашлагъа бычакъ бла кебин бичерге.

Къабырны, индекни адыгей тенгле да къазалла

Хапарыбызны орус тенглерибиз джазалла.

Ой, мешинаны ара багъанасы къанджалдан,

Айырылыб барабыз ичибизден белек маджалдан,

Ой, мешинаны къабыргъалары къанъадан,

Аллах сакъласын къалгъан джашланы аджалдан.

Ой, элигизге игилик келсин таймайын

Джандетли болсунла къарачай джашла

Уллу Къарачайда кёгет терекле куу болду,

Эй, ау тюбюнде уа ариу келинчикле тул болду.