Дәрігерлер адамның тәнін, әруақтар нәзік денелерін емдейді

Алла қиямет күні айтады: «Ей, адам баласы! Ауру болдым, маған келіп көңілімді сұрамадың». Адам айтады: «Уа, раббым, Сен бүкіл әлемнің пәруәрдігәрі болсаң, менің қалай көруім мүмкін еді? Алла айтады: «Пәленше деген адамға ауырып жатқан кезінде барып көңілін сұрамадың, егер барғаныңда оның қасынан мені көрген болар едің». «Ей, адам баласы! Өзің тамақтандың, бірақ мені жоқтамадың». Адам айтады: «Уа, раббым, Сен бүкіл әлемнің патшасы болсаң, мен Сені қалай тамақтандыруым мүмкін?» Алла айтады: «Пәлен пендем мұқтаж болып алдыңа барғанда, сен оның қажетін өтемедің. Егер соның мұқтажын өтегеніңде, сол жерден мені тапқан болар едің». Пайғамбарымыз Мұхаммед (с.ғ.с.)

Әруақтардың көмегімен қанша адамдар бұрын айырылысқан жұбайларын қайта тауып, отбасын жөндеді! Қанша адам өзінің темекі, арақ тәрізді жаман қылықтарынан арылып, дұрыс жолға түсті! Көп адамдар дәрігерлердің қолынан келмей, «жазылмайды» деп түңілген ауруларынан арылып, зардапсыз өмірге көшті. Өздерінің өмірдегі қателіктерін түсініп, енді оны қайталамуға берік бел буып, имандылық жолына түскендер де бар. Ең бастысы – бұл адамдар өмірдің осымен аяқталмайтынын, алда да келесі өмір барын түсініп, енді сол өмірге аман өтуді ойлай бастайды. Келесі өмірің дұрыс болу үшін – осы өміріңді дұрыста! Осылай ол имандылық жолға түседі. Қарапайым адам үшін, міне, осыдан артық не керек? Әруақтар Құдайға қайту жолына осылай түсіреді.

Нәзік болмыс заңдылықтарын біліп, оларды дұрыс ұстану фәни әлемде дұрыс өмір сүруге мүмкіндік береді. Нәзік болмыс заңдылықтары адамның психикасы, ой-өрісі, мінез-құлқы тәрізді оның нәзік болмысына әсер етеді. Осылай жоғарыда көрсетілген бақытты өмір формуласымен өмір сүруге мүмкіндік туады.

Адамның үш болмысын үш түрлі әдіс жөнге келтіріп, емдей алады. Дәрігерлер адамның физикалық тәнін емдесе, ал әруақтар оның нәзік тәнін емдейді. Адамның рухани болмысын тек рухани тәжірибе, рухани жол ғана емдей алады. Осы үш әдіс тоғысқанда салауатты өмірдің шыңына жетуге болады. Басқа жол жоқ! Осының өзі әруақтардың, спиритуализмнің қандай үлкен маңызы бар екенін көрсетпей ме? Жаны таза адам «жүрегі таза адам» деп аталады. Қазіргі материалдық даму (прогресс) өршіп, өмір жылдамдығы өскен кезде адамдардың ой-өрісі былғанып, жан дүниесі дертке шалдығып жатыр.