Сельгиков Михаил Арыкович. Михаил Арыкович Сельгиков 1920 җилд бар сарин 17-д Хальмг АССР-ин Кетченеровск района Кегульта селәнд төрҗ һарсмн

(1920-1985 љљ.)

Михаил Арыкович Сельгиков 1920 җилд бар сарин 17-д Хальмг АССР-ин Кетченеровск района Кегульта селәнд төрҗ һарсмн. Михаил Арыкович арвн тавн настаһасн авн эврәннь күч-көлснә үүлдврән эклсмн. 1939 җиләс авн 1941 җил күртл Әәдрхнә хаалһна болн пулеметн училищд сурһуль сурсмн.

Төрскән харсгч Алдр дәәнә цагла зөрмг кевәр дәәллдҗ йовла. 1941 җилин декабрь сарас авн Орловск (ода Брянск) областин Погарск района партизанск отрядын зергләнд билә. Дән эклснә түрүн өдрәс авн хортнла ноолдҗ зөрмг дәәч болҗ нерән туурулсмн.

1942 җилин апрель сарас авн – партизанск отрядын взводын командир, дарунь Степан Разинә нертә партизанск отрядын штабин начальник. Михаил Арыкович немшнрин гарнизонмуд, цергә техник күүчлһнә болн хортыг бәрҗ авлһна операцст, кесг дәәллдәнд эврән орлцсмн. 1942 җилин хөн сарас авн ноха сар күртл эн баһ цагин кемҗәнд Погарск районд партизанмуд 46 күүтр болн селә немшнрәс сулдхсмн, тенд хортна тылд, Советск йосн тогтсмн.

1942 җилин үкр сарла Чапаевин нертә партизанск бригадын һардвр зөрмг командирин арһинь учрт авад, Фурмановин нертә партизанск отрядын командирин дарукин үүлд орулв. Чапаевин нертә партизанск бригад партизанск дәәллдәнә цагин эргцд немшнрин 46 цергә эшелонмуд болн техник эвдв, тер дотр 6 цергә эшелониг М. А. Сельгиковин һардҗасн бригад эвдсмн.

1943 җил Михаил Арыкович һардврт бәәх партизанск отряд Трубчевск района Новоселки селәнә өөр болсн күнд дәәллдәнд орлцсмн. Эдн немшнрин харслтын линий таслсмн. Эн дәәллдәнд эн 19 немш хаһад алв.

Орловск областин Погарск района партизанск отрядт дәәллдсн саамд әмән, чидлән әрвллго зөрмг кевәр немшнрлә ноолдад, баатр йовдлмуд һарһсн учрар 1965 җилин майин 8-д һарсн СССР-ин Деед Советин Президиумин Зәрлгәр Михаил Арыкович Сельгиковд Советск Союзин Геройин нерн зүүлһгдсмн.

1943 җилин үкр сарас авн 1957 җилин хөн сар күртл Орловск болн Новосибирск областьд, Красноярск крайд советин болн эдл-ахун органмудт олн зүсн үүлд көдлҗ йовсмн.

1957 җилин хөн сарас авн Элстд бәәҗ көдлсмн., горисполкомин МПВО-н штабин начальникин үүл дааҗасмн, селәнә эдл-ахун эдл-ууш белдлһәр райод хоорндк инспекцин инспектор, оргнаборин уполномочен, Хальмг АССР-ин Министрмүдин Советин олна әңгин заведующ, 1968 җиләс авн сүл өдрмүд күртл – заһсна харулын Хальмг АССР-ин Госинспекцин ах инспектор болҗ көдлсмн.

1985-гч җил хөн сарин 16-д Советск Союзин Герой Михаил Арыкович Сельгиков өңгрв.