Хор: И ду́хови твоему́.

Иере́й: От … Свята́го Ева́нгелия чте́ние.

Хор: Сла́ва, Тебе́, Го́споди, сла́ва Тебе́.

Диа́кон: В о́нмем.

Ирмосы Воскресного канона, глас 8:

Песнь 1: Колесницегони́теля фарао́ня погрузи́/ чудотворя́й иногда́/
Моисе́йский жезл, крестообра́зно порази́в,/ и раздели́в мо́ре,/
Изра́иля же беглеца́, пешехо́дца спасе́,// песнь Бо́гови воспева́юща.

Песнь 3: Утвержде́й в нача́ле Небеса́ ра́зумом,/ и зе́млю на вода́х основа́вый,/
на ка́мени мя, Христе́, за́поведей Твои́х утверди́,/ я́ко несть свят, па́че Тебе́// Еди́не Человеколю́бче.

Ектения́ ма́лая:

Песнь 4: Ты моя́ кре́пость Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./
Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Песнь 5: Вску́ю мя отри́нул еси́/ от лица́ Твоего́, Све́те Незаходи́-мый,/ и покры́ла мя есть чужда́я тьма, окая́ннаго;/ но обрати́ мя,/ и к све́ту за́поведей Твои́х// пути́ моя́ напра́ви, молю́ся.

Песнь 6: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х,/ и услы́ши мя,// Бо́же спасе́ния моего́.

Ектения́ ма́лая:

Конда́к все́х святы́х, глас 8:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики,/ тех моли́твами в ми́ре глубо́це// Це́рковь Твою́, жи́тельство Твое́, Богоро́дицею соблюди́, Многоми́лостиве.

Песнь 7: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще поя́ху://
благослове́н еси́, Бо́же оте́ц на́ших.

Песнь 8: Седмери́цею пещь халде́йский мучи́тель/ Богочести́вым неи́стовно
разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю
вопия́ше:/ о́троцы, благослови́те,/ свяще́нницы, воспо́йте,//
лю́дие, превозноси́те во вся ве́ки.

Песнь 9: Ужасе́ся о сем Не́бо,/ и земли́ удиви́шася концы́,/ я́ко Бог яви́ся
челове́ком пло́тски,/ и чре́во Твое́ бысть простра́ннейшее Небе́с./
Тем Тя, Богоро́дицу,// А́нгелов и челове́к чинонача́лия велича́ют.

Катавасия «Отверзу уста моя», глас 4 (киевский распев):

По 1 песне: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.

По 3 песне: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.

Ектения́ ма́лая:

По 4 песне: Седя́й в Сла́ве/ на Престо́ле Божества́ во о́блаце ле́гце,/ прии́ди Иису́с Пребоже́ственный,/ Нетле́нною Дла́нию и спасе́ зову́щия:// сла́ва, Христе́, си́ле Твое́й.

По 5 песне: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

По 6 песне: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,//
от Нея́ ро́ждшагося Бо́га сла́вим.

Ектения́ ма́лая:

По 7 песне: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.