Во святей церкви вся службы, праздницы, причащения, и жертвы уставлены, не иного чего ради, точию дабы человек очистился от грехов своих

Рцы убо ми, о возлюбленне! чесо ради во святей православнокафоличестей церкви уставлены службы, праздницы, причащения и жертвы? Не того ли ради, яко да очистится человек от грех своих, и вселится вонь Бог? и в лепоту. Попремногу убо научает ны сему святая древлеправославная церковь, сице глаголющи: [Первая польза во освящении, якоже есть за живых жертвою безкровною, отпущения ради грехов, тако и за умерших. Вторая в причащении, яко Христос в нас живет, и мы в Нем, по реченному: Ядыи Мою плоть, и пияй Мою кровь, во Мне пребывает, и Аз в нем [Ин, глава 6]. Третия полза, живот вечныи наследуем, якоже таможе святое писание свидетельствует: И ядыи Мя, и той жив будет Мене ради. Таможе ниже: Ядыи хлеб, се жив будет вовеки. Четвертая польза, яко свободни бываем от бесовских искушений, понеже егда ощутит в нас живущаго Христа, и не имать наветовати на нас]. Катихисис малый [лист 31]. Обаче и всякая добродетель, есть жертва и поклонение духовно. Ибо всякия ради добродетели, оправдается человек, еже есть из грешника осиянием благодати Божия изменяется в праведника [Стефан Рязанский, лист 1033]. И спасению сподобляется, и небесному царствию наследник бывает. Якоже ясно о сем видим во евангелии учителном, в неделю о самаряныни, идеже тако вещает: [Купно же всяка духовна добродетель, жертва и поклонение духовно есть. Тогда убо изволиши, рече жертву правде. Всякия бо добродетели ради, оправдится человек, и спасению сподобляется, и небесному царствию наследник будет]. Понеже убо творяй заповеди божественныя, есть любяй Бога, любяй же Бога возлюблен будет и самем Отцом небесным, и Сын Его возлюбит его. якоже сам Господь пречистыми своими усты рече [Ин. зач. 48]: Имеяй заповеди Моя, и соблюдай их той есть любяй мя, а любяй Мя возлюблен будет Отцем Моим, и Аз возлюблю его. И к нему придева, и обитель у него сотворива. Егда бо убо будет человек храм одушевлен, и богоздан Божии, и Отец и Сын и Святый Дух живет в нем, отстоит та душа богоносива,от всякия любве, церквей зданных, и жертв видимых, собор множества, и праздник человеческих, ниже в горе оной, ни во Иеросалиме желает поклонитися. Внутрь бо имать в себе Отца, внутрь же Сына Архиерея, внутрь Дух истинный огнь, внутрь Жертвенник, чистую совесть, внутрь очистилище грехов, духовную слезу, внутрь вышнии Иеросалим, радостную душю. И сие не свое си глаголю, но слыши блаженнаго Анастасия, игумена Синайския горы, сице о сем вещающа [в книзе своей, глава 2. И патерик Иеросалимский, слово 17]: [Вопрос: Кто суть истиннии поклонницы, иже ниже в горе, ниже во Иеросалимех поклонятся Богу и Отцу, идеже во Иеросалимех не поклонятся благоразумно яко ни во ином месте на земли ничтоже бо Иеросалима зде честнейши? Ответ: Страшно убо воистинну, и дивна слышания вопрошения, и сего ради ответа и разрешения явленнейша не ведыи, зане не всем вмещати божественных таин слышания, обаче от показания некоего священна муж священных, ихже ныне в плоти сущих, яко явственно реченное сотворим. Шед некто от здешних, мужу отшелнику молчальствующу, и рече ему: Дивлюся отче, како сице терпиши отлучен быти от святыя церкве, и от тоя причащения, и святых собрании? К нему же отвеща человек Божии, и рече: Вся собрания и службы, и праздницы, и причащения, и жертвы, о человече, сего ради быша, яко да очистится человек от грех своих, и вселится Бог вонь, по иже от Христа реченному: Яко приидем Аз и Отец Мой, и обитель в нем сотворим, и вселюся в них и похожду. Егда убо человек храм одушевлен и богоздан будет Божии, и Отец и Сын и Святыи Дух и живет и ходит в нем, отстоит та душа богоносивая от всякия любве церквей зданных, и жертв видимых, собор множества, и праздник человеческих, и ниже в горе сей, и ни во Иеросалимех желает поклонитися Богу. Внутрь бо имать в себе Отца, внутрь же Сына Архиерея, внутрь Дух истинныи огнь, внутрь жертвенник чистую совесть, внутрь очистилище грехом духовную слезу, внутрь вышнии Иеросалим радостную душю. Прочее яко духовен духовныма очима, духовныя жертвы приносит. Дух бо есть Бог, и покланяющиися Ему в Дусе истинною достоит покланятися. Вся бо видимая временна суть, якоже рече Павел, аще жертвы, аще приношения. Невидима же вечна, иже суть в Дусе истинно в сердцы бывающи, ихже око не виде, и ухо не слыша, и на сердце человеку прежде пришествия Христова не взыде, яже уготова и откры нам. Сия же вся сподобишася стяжати, яко обожився вселением Божиим, и той прочее в нем. Паче же и себе чтет, зря свою плоть обитель Божию, и дом, и жертвеник, и святилище Богу сущь. Сицевый же ни небеса, ни аггели, ни жертвенник видимыи, ни ино что в мире, или паче мира чтет, множае своего тела церкве, в нем же зрит исполнение Святую Троицу живущу]. глава 2. Виждь убо, аще сего ради во святей церкви уставлены службы, праздницы, причащения, и жертвы, яко да человек очистится от грех своих, и вселится вонь Бог. Но и всяка же добродетель духовна, есть жертва и поклонение духовно, еяже ради оправдается человек, сиесть изменяется из грешника осиянием благодати Божия в праведника. И спасению сподобляется и небесному царствию наследник бывает. Тем благоявленно, яко творения ради добродетелей, сиречь исполнения заповедей божественных, вселяется вонь Бог. И такова душа имущая в себе Бога, нарицается церкви свята и честна, и божественныя тайны совершаются в ней. Явственно о сем засвидетельствует преподобный Ефрем Сирин сице глаголя: [Душа бо имеющи Бога в себе, церкви наричется свята и честна, и божественныя тайны служатся в ней. И тщатся присно силы небесныя посетити ю, понеже Господь вселился есть в душю. И аггели и небеса веселятся о ней, и тщатся почтити душю, понеже церкви наричется Владыки их]. слово 83. И понеже убо добродетелнаго ради жития вселяется в человека Бог, и бывает таковаго душа церкви свята и честна, и божественныя тайны в ней служатся. Яко внутрь имать в себе Отца, по сказанию блаженнаго Анастасия [глава 2], внутрь же Архиерея Сына, внутрь же Дух истинныи огнь, внутрь же жертвенник, чистую совесть, внутрь очистилище грехом, духовную слезу. Сего ради таковый человек, иже имать житие свое украшено. яко бисерием многоценным, духовными добродетельми, аще и не сподобится некия ради вины благословныя, яко не имать православнаго священника, от него же бы возмогл прияти божественныя тайны, причаститися пречистаго и животворящаго тела и крови Христовы, не имый священства, не разоряет закона, по реченному преподобным Ефремом: Не закон разоряют. не приемлюще священства держати, не лишится наследия горняго Иеросалима [слово 111]. Зане имея в себе Бога, добродетелнаго ради своего жития, по мере добродетелей своих, непрестанно причащается без причащения благодати Божия, и спасению сподобляется, и наследник царствия небеснаго бывает.

Тем благоявленно, яко и ныне сущии христиане, иже имут веру православную, и дела богоугодная, аще и не могут причаститися устнами тела и крове Христовы, яко не имут православнаго священника, но могут по мере веры, и добродетелей своих, и кроме причащения причащатися благодати божественныя, и сподобится спасению, и наследниками царствия небеснаго быти.