Седяй в славе на престоле Божества, во облаце легце, прииде Иисус Пребожественный, нетленною дланию, и спасе зовущыя: слава Христе силе Твоей

Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Крепко на противнаго подвизастеся Софие и Ирино, кровными страдании: сего ради вашу память верою почитаем.

Уязвившеся желанием, претерпевшаго нас ради крест и смерть, Сего стопам последоваша святыя жены, плотскую немощь забывше.

Египетстии жертвища, и бесовская ополчения, оружием страдания низвергосте, и принесостеся в Церковь Небесную, всесожжения одушевленная, Софие и Ирино пречестныя.

Богородичен: Укрепившеся благодатию возсиявшаго Пренепорочная, из ложесн Твоих, святыя жены приразишася к болезнем мучения, и приведошася во след Тебе радующеся.

Катавасия: Крест начертав.

Песнь 3. Ирмос:

Лук сильных изнеможе, и немощствующии препоясашася силою: сего ради утвердися в Господе сердце мое.

Силою крепкою от Бога укрепляеми, противнаго борца попраша силу: и сего ради яко победоносицы непобедимии прославишася.

Мудростию и благодатию просвещься ум ваш, мучителей прещения не устрашистеся страстотерпицы Софие и Ирино, Божиею силою укрепляеми.

Богородичен: Разумевше благоверно, проповедаем Тебе истинную Божию МатерьВсенепорочную: Тобою бо с нами Зиждитель совокупитися изволи.

Кондак и икос праздника.

Седален, глас 1.

Чудес вас источники стяжавше, почерпаем здравие обильно, прехвальнии Софие и Ирино, поюще болезни ваша, и ревность Божественную, и язвы доблественныя и подвиги: и совершаем вашу досточудную память, в славу Бога нашего.

Слава, и ныне: праздника.

Песнь 4. Ирмос:

Седяй в славе на престоле Божества, во облаце легце, прииде Иисус Пребожественный, нетленною дланию, и спасе зовущыя: слава Христе силе Твоей.

Претерпевше мучения телесныя жены честныя София и Ирино: Небесныя селения наследовасте, наслаждшеся древа животнаго.

Мучениц Божественных подвигу удивишася небесныя силы, како врага победиша в женстем естестве, укрепляеми силою от Девы возсиявшаго.

Отвергше мирскую всю суету, Богу Единому всею душе прилепистеся. Темже страдания претерпесте, Софие и Ирино невесты Христовы терпеливыя.

Богородичен: Сниде во чрево Твое Пренепорочная Господь, яко дождь на руно, якоже рече пророк древле: Егоже во двою существу родила еси, Емуже зовем: слава Христе силе Твоей.

Песнь 5. Ирмос: