Дополнительные статьи

О КОНЕ. А кто конь купить княж, боярин, или купеч, или сирота, а будеть в коне червь или проесть, а то поидеть к осподарю, у кого будеть купил, а тому свое серебро взяти опять взад. (ПР, Т. I, с. 289).

А се бещестие. А за бещестную гривну золота, аще будеть баба была в золоте и мати, взяти ему 50 гривен за гривну зо­лота; аще будеть баба не ⁹⁰ была в золоте, а по матери ему не взяти золота, взяти ему гривна серебра; а за гривну сребра пол осме гривне. (ПР, т. I, с 316).

О ковании мужем. Аще ли скуеть муж мужа или кого ни есть в вине, или колико седитъ, взяти железного 5 кун, а кормить своим хлебом, ино ему взяти гривна да 5 кун. (ПР, т. I, с. 316, вар. 12).

А судным кунам ростов нету. (ПР, т. I, с. 330, 348).

О СИРОТЬЕМ ВЫРЯТЬКЕ. А женка с дчерию, тем стра­ды на 12 лет, по гривне на лето, 20 гривен и 4 гривны куна­ми. (ПР, т. I, с. 354).

О муке. Аже утяжю(ть) в мукы, а поседи(ть) у дворянина, 8 ногат за ту муку. А у колоколниии бьют(ь) кнутом, за ту муку 80 гривен. (ПР, т. I, с 341, 362, 390).

О человеце. Аже человек полгав куны у людей, а побежитъ в чюжю землю, веры ему не иняти, аки и татю. (ПР, т. I, с. 340, 361, 389).

О МУЖИ КРОВАBE.

Аще приидеть кровав муж на двор или синь, то видока ему не искати, но платити ему продажа за бесчестие, каков будеть; аще ли не будеть на нем знамения, то привести ему видок сло­во противу слова, а кто будеть почал, тому платити куны в что и объложать; аще же и кровав приидеть, или будеть сам почял, а вылезуть послуси, то то ему за платеж, оже и били.

Аще же ударить мечем или ножем, а не утъне(ть) на смерть, то князю вины 9 гривен, а истьцу за рану судять, а оже лечебное; потнеть ли на смерть, то вира платити.

Аще ль пьхнеть муж мужа любо к себе, любо от себя, ли по лицу ударить, или жръдию ударить, а без зънамения, а ви­док будеть, бещестие ему платити; аже будеть болярин великых боляр или менших боляр, или людин городскыи, или се­лянин, то по его пути платити бесчестие; а оже будеть варяг или колобяг, крещения не имея, а будеть има бои, а ви­док не будеть, ити има роте по своей вере, а любо на жребии, а виноватый в продажи, в что и обложать. (ПР, т. I, с. 231, 262—263).