Матэрыяльныя сродкі навучання і методыка іх выкарыстання на занятках па айчыннай і сусветнай мастацкай культуры

Сродкі навучання – гэта аб'екты, створаныя чалавекам, а таксама прадметы натуральнай прыроды, якія выкарыстоўваюцца ў адукацыйным працэсе ў якасці носьбітаў вучэбнай інфармацыі і прылад дзейнасці педагога і вучняў для дасягнення пастаўленых мэт навучання, развіцця і выхавання.

Агульнапрынятая сучасная тыпалогія падзяляе сродкі навучання на наступныя віды:

1. Аб'ёмныя дапаможнікі (мадэлі, калекцыі, натуральныя аб’екты і г.д.);

2. Друкаваныя дапаможнікі (рэпрадукцыі, плакаты, графікі, табліцы, падручнікі і г.д.);

3. Тэхнічныя сродкі навучання (кінафільмы, відэафільмы, праекцыйны матэрыял і г.д.).

Сродкі навучання нараўне з жывым словам педагога з'яўляюцца важным кампанентам адукацыйнага працэсу і элементам вучэбна-матэрыяльнай базы любой адукацыйнай установы. Сродкі навучання аказваюць вялікі ўплыў на ўсё іншыя яго кампаненты – мэты, змест, формы, метады.

Прынцыпы выкарыстання сродкаў навучання:

— улік узроставых і псіхалагічных асаблівасцяў вучняў;

— гарманічнае выкарыстанне разнастайных сродкаў навучання: традыцыйных і сучасных для комплекснага, мэтанакіраванага ўздзеяння на эмоцыі, свядомасць, паводзіны дзіцяці праз візуальную, аудзіальную, кінестэтычную сістэмы ўспрымання ў адукацыйных мэтах;

— улік дыдактычных мэт і прынцыпаў дыдактыкі (прынцыпу нагляднасці, даступнасці і г.д.);

— пастаноўка праблемнага пытання перад дэманстрацыяй сродка навучання;

— сатворчасць педагога і вучня;

— прыярытэт правіл бяспекі ў выкарыстанні сродкаў навучання.

Развіццё сродкаў навучання ў сучаснай школе (сярэдняй агульнай і прафесійнай) вызначаецца агульным развіццём вучэбнай тэхнікі. З'яўленне інтэрактыўных дошак, кадаскопаў (графапраектараў), кампьютэрнай тэхнікі, найноўшых сродкаў прайгравання лічбавых носьбітаў, развіццё сеткі Інтэрнэт у адукацыйных установах моцна змяніла і патрабаванні да распрацоўкі сродкаў навучання. Тэндэнцыя падключэння агульнаадукацыйных устаноў да сеткі Інтэрнэт запатрабавала паскорыць папаўненне адукацыйных інтэрнэт-рэсурсаў і актуалізаваць увесь арсенал сродкаў навучання.