Арсар сав келһнә туск келвр.

Хальмг улс кезәнәс нааран дөрвн зүсн малмудла оралдата. Эднә шим-шүүсинь эдләд, арднь дахад, өскәд йовдгинь цуһар меднәвидн.

Ода эн деер келгдсн малмудын арсар ю кеҗ, яһҗ эдлҗ йовсна тускар келҗ селвцхәр бәәнәв. Эн деер келгдсн хөөнә, ямана, баһ наста бод малмудын арсмудар булһар, бокс, сатья кеһәд, һос, башмг, олн зүсн түңгрцгүд, утхин гер, ик дерин толһан бүрәс кеҗ эдлҗ йовҗ.

Эднәс талдан мөрнә эмәлин сур цуцад булһар, көвчг, тохмин һадр, җову, цолвурин цацгуд, хомутын бүрәс кеҗ, кеерүлҗ эдлҗ йовла.

Бод малын зузан арсар: һосна ул, архд, бортх, бөрв, булхач, даальң кеҗ эдлҗ йовла. Эн тадна меддг бортхсиг темәнә арсар кедг билә.

Темәнә арсиг модн кадушкд кечксн сәвәснд орулад, ноосинь җулһлад авчкад, һарһад, аһарт эвр-эвр хагсачкад, омунар үлгүрнь эс гиҗ завгуринь тәвәд, ишкәд, хойр хәврһинь зөрүләд, «эмгн уяһар» уяд, дотрнь үмс цацад, чиигтә шавр чикәд, бортхин дүринь һарһчкад, һаза кирпичин кизәрмүд, үүрмг чолудар зуна бешин бәәдлтә гарнюшк кеһәд, түрүләд арһс түләд шатачкад, үмкә буурлда, камб шарлҗ нигтәр хаяд, өткн ута һарад ирсн цагт, одак уйчксн чиигтә бортхин матьхр төмр ухвар дарад, эрә, тамһ һарһна. Дотран шаврта арснд эн эрәлдг төмр шигдәд орад йовна. Эрәлҗәх күн ю сансан эрәлнә. Хамтхасна бүчр, әәмгинь тамһ, зег зурад, ямаран җилд кегдсинь зурад, бешәс һарчах өткн утанд бортхс, бәрвс зерглүләд өлгчкәд, дөрвн, тавн хонгтан утна. Бортх хагсад, минчиһәд,күрң өңг һарад ирнә. Тер цагтнь бортх кедг күн һарһҗ авад, яһҗ хатҗахинь төгәлүләд цокҗ үзәд, дотрнь чикчксн чиигтә шавр йосндан хагсад, хату шавр болсинь медхләрн, бортхиг утанас татҗ авад, бууһин шомплар, эс гиҗ үзүртә төмрәр хучлад, хагсу шавриг үүләд, һазаһаснь нудрмарн цокад асхна. Дәкәд һаза нарн-салькнд өлгәд, хойр, һурвн хонулхла, бортх яг болад хатҗ одна. Бөглә, бүч кеһәд, ус, әрк, чигә, чиидмг кеһәд эдлҗ йовсмн. Һанзһлад йовсн цагт хамхрдго, халу тәвдго сав.

Дәкәд бөрв гиҗ бәәнә. Темәнә бөрвин арсиг бүтүһәр суһлҗ авад, тер бортхла хамднь шавр чикәд,утад һарһчкна, тер учрар бөрвд уйдл, зүүдл уга болна.

Булхач гиснь эн йосн бортх. Зуг бичкн, эндән келхд четушк. Бортхт болхла, ик хойр, һурвн литр орна. Бортхд әркәс талдан шиңгн юм чигн кенә. Зунар хадлһ шалһар хаддг цагт өрүн киитәр кечксн чиидмг, эс гиҗ цә үдин халу ивтрәл уга асхн күртл киитәр бәрдг бәәсмн. Өрүн ирәд, ковньг өвсн дор тәвчкнә. Авад йовхд гиигн, мөрнд һанзһлхла, хамхрдго, мөр хатхдго, ә уга сав болҗ эдлгдҗ йовсмн.