Электр тартылымдарын таңдау және монтаждау

Ғимаратты жылыту жүйесиндегі электр тартылымдарына ең қолайлы және көп қолданылатыны мыс сымдары.

Жалпы электр тартылымдарына тоқталып кетсек, Электр тартылым – бұл тартылған сымдар мен кабельдердің жиындығы, оларды бекітетін, ұстап тұратын және қорғайтын конструкциялар мен бөлшектер.

Электр тартылымға күштік, жарықтандыру және оқшауланған орнату сымдарының барлық қимасының қолданылуымен айнымалы және тұрақты токтың екінші реттік тораптары, сондай-ақ, фазалық тарам қимасы 16мм² дейінгі металл, резина немесе пластмасса қабықшадағы резиналы немесе пластмассалы оқшауламасымен брондалмаған күштік кабельдер жатады.

Электр тартылым мынадай түрлерге бөлінеді: ашық, жабық және сыртқы.

Ашық – бұл қабырғалардың, төбелердің бетімен, ферма, сырық, колонна және үйжайдың басқа құрылыс элементтерінің бойымен тартылатын электр тартылым.

Жабық – үйжайлар мен ғимараттардың конструкциялық элементтерінің ішімен тартылатын электр тартылым.

Сыртқы – үйжайлар мен ғимараттардың сыртқы қабырғаларымен, бастырма астыларымен, сондай-ақ, көшелер мен жолдардан тыс (құрылыс алаңдарына, аулаларға, үй алдындағы бақшаларға және с.с.) үйжайлардың арасында бағаналарда (4 тартылымнан артық емес, әрқайсысының ұзындығы 25 м-ге дейін) электр тартылым.

Жылыту жүйесінде қолданылатын сымдар: Ток өткізгіш тарамдар, мыс талсымдардан бұралған, 0,2…4мм² қимасымен, поливинилхлоридтік оқшауламасымен (В) және қабықшасымен (В), жалпақ параллельді қойылған тарамдармен (П), резеңкелік оқшауламасымен және резеңкелік қабықшасымен (Р), бұралған тарамдарымен (С), иілгіштер.

ШВВ – поливинилхлоридтік оқшауламасымен және қабықшасымен баусым (шнур).

ШВП – поливинилхлоридтік оқшауламасымен, жалпақ параллельді қойылған тарамдармен (П) баусым (шнур).

ШРС – резеңкелік оқшауламасымен және резеңкелік қабықшасымен, бұралған тарамдарымен (С).

Сымдардың қимасын рұқсат етілген кернеу шығыны бойынша, жүктеме тоғымен сымдардың рұқсат етілген қызуы бойынша және механикалық беріктілігінің жағдайы бойынша таңдап алынады. Жарықтандыру тораптарында рұқсат етілген кернеу шығындары номиналь кернеуден 2,5%, ал 0,4кВ күштік тораптарда - 6% (7,5%) құрайды. Рұқсат етілген ток тығыздығы сымның тарам материалына, оқшаулама түріне, төсеу тәсіліне, тарамның қимасына тәуелді. Мыс тарамдар үшін – 2…17А/мм² құрайды. Ток тығыздығының үлкен мәндері сымдардың кіші қималары үшін –1,5; 2,5; 4мм² рұқсат етіледі.