Глава 5. Уна йöзöс аддзöм бöрын Исус кайис керöсö да пуксис

Уна йöзöс аддзöм бöрын Исус кайис керöсö да пуксис. Сы дiнö матыстчисны велöдчысьяс. 2 Исус пондiс велöдны: 3 «Шудаöсь ловныслы корысьяс, öд налöн эм Енэжвыв Юралöм. 4 Шудаöсь шогсьысьяс, öд найöс шогсьыс пальöдасны. 5 Шудаöсь рамъяс, öд налы вуджас кöсйысьöм муыс. 6 Шудаöсь веськыдлуннас пöткöдчыны кöсйысьяс, öд найöс пöткöдасны. 7 Шудаöсь бур сьöлöмаяс, öд налы бур сьöлöмсянь вöчасны. 8 Шудаöсь сöстöм сьöлöмаяс, öд найö Енмöс аддзасны. 9 Шудаöсь йöзöс бурöдысьяс, öд найöс Енлöн ныв-пиöн шуасны. 10 Шудаöсь веськыдлун вöсна вöтлöмаяс, öд налöн эм Енэжвыв Юралöм. 11 Тi шудаöсь, Ме вöсна кö тiянöс лёкöдöны, вöтлöны да быдногыс омöльтöны-суклялöны. 12 Долыда нимкодясьöй, öд ыджыд тырдон виччысьö тiянöс енэжас. Тадзи войдöр тшöтш вöтлiсны пророкъясöс». 13 «Тi муюгыдыслы сов. Солыс кö воштас ассьыс вынсö, кыдзи сiйöс бöр соланас вöчан? Сэки сiйö нинöм вылö оз шогмы, сiйöс сöмын койыштöны ветлысьяс кок улö. 14 Тi йöзыслы югыд. Керöсын сулалысь кар оз вермы саявны. 15 Öзтöм битö оз пуктыны доз улö, сiйöс пуктöны бикок вылö. Сэки керкаын югыдыс быдлаö веськалö. 16 Тадзи мед югдöдас тiян югыдныд, медым йöзыс аддзасны тiянлысь бур вöчöмнытö да ошкасны енэжвыв Батьнытö». 17 «Тi чайтанныд, Ме локтi бырöдны Индöдсö да пророк гижöдъяс? Энö мöвпалöй тадзи. Ме эг лок бырöдны, а локтi олöмö пöртны. 18 Веськыда висьтала тiянлы: енэжыс да муыс быртöдз да ставыс збыльмытöдз весиг öти ичöт шыпас да чуттор оз вош Индöдысь. 19 Кодi торкас Ен тшöктöмъясысь весиг öти ичöттор да велöдас тадзи вöчны мукöдöс, Енэжвыв Юраланiнын сiйöс медiчöтö пуктасны. Кодi олас тшöктöмъясыс серти да велöдас тадзи овны мукöдöс, Енэжвыв Юраланiнын сiйöс ыджыд мортö пуктасны. 20 Висьтала тiянлы: тiян веськыда олöмныд кö оз ло Индöдö велöдысьяслöн да фарисейяслöн дорысь бурджык, Енэжвыв Юраланiнö онö пырöй». 21 «Тi кывлiнныд, важ йöзлы вöлi шуöма: "Эн ви", и нöшта шуöма: "Виысьöс мыждасны". 22 Ме шуа тiянлы: кодi лöгалö вокыс вылö нинöм абусьыс, сiйöс мыждасны. Кодi вокыслы шуас: "Тэ бöб", сiйöс вылыс ёрд мыждас. Кодi йöйöн шуас, сiйö куслытöм биö веськалас. 23 Сетантортö вайигад кö висьпуктанiн дорын тöд вылад усяс, мый вокыд лöгалö тэ вылö, 24 сэки коль висьпуктанiн дорö сетантортö. Мун, водзджык бурась вокыдкöд, сэсся лок да пукты висьпуктанiнö сетантортö. 25 Тэнö мыжалыськöд бурась öдйöджык, ёрдö вотöдз на. Он кö вöч тадзи, сiйö сетас тэнö ёрдысьлы, ёрдысь сетас тэнö видзысьлы, сэсся тэнö йöртасны дзескыдiнö. 26 Веськыда висьтала тэныд: бöръя сьöмтö сеттöдз он пет сэтысь». 27 «Тi кывлiнныд, важ йöзлы вöлi шуöма: "Гозъя олöмтö эн пежав!" 28 Ме шуа тiянлы: ань вылö ыштöмöн видзöдысь сьöлöмас гозъя олöмсö пежалiс нин. 29 Веськыд синмыд кö ыштöдö тэнö, перйы сiйöс да шыбит. Бурджык син пöвтö воштыны вир-яйтö дзоньнас куслытöм биö шыбитöм дорысь. 30 Веськыд киыд кö ыштöдö тэнö, керышт сiйöс да шыбит. Бурджык ки пöвтö воштыны вир-яйтö дзоньнас куслытöм биö шыбитöм дорысь. 31 Нöшта шуöма: "Гöтырсö эновтысь мед сетас сылы торйöдчан гижöд". 32 Ме шуа тiянлы: верöсыс кö эновтö гöтырсö, а гöтырыс оз кырсав, сiйö сетö помка гöтырыслы пежавны гозъя олöмсö. Юксьöм аньöс гöтырö босьтысь тшöтш пежалö». 33 «Тi кывлiнныд, важ йöзлы вöлi шуöма: "Сетöм кывтö эн торк! Господь водзын сетöм кывтö кут!" 34 Шуа тiянлы: кыв сеттöг ов! Эн сет кывтö енэж водзын – сiйö Енлöн пукаланiныс. 35 Эн сет кывтö му водзын – сiйö Енлöн кок улыс. Эн сет кывтö Ерусалим кар водзын – сiйö ыджыд Öксылöн кар. 36 Аслад юрöн эн кöсйысь, öд тэ весиг öти юрси сi он вермы пöртны еджыдö либö сьöдö. 37 Тiян "да"-ныд мед лоö сöмын "да", тiян "ог"-ныд мед лоö сöмын "ог", а содтöд кывъясыс – омöльсяньыс». 38 «Тi кывлiнныд, вöлi шуöма: "Син понда син, пинь понда пинь". 39 Ме шуа тiянлы: тэныд лёксö вöчысьлы паныд эн сувт. Веськыд банад кö кучкасны, лöсьöд шуйгасö. 40 Зiльö кö кодкö ёрд пыр дöрöмтö босьтны, сет сылы тшöтш вылыс паськöмтö. 41 Тшöктö кö кодкö мунны сыкöд öти верст, мун сыкöд кыкöс. 42 Тэнсьыд корысьлы сет, водзöсöн босьтысьöс эн вöтлы». 43 «Тi кывлiнныд, вöлi шуöма: "Радейт матыссатö да мустöмт тэныд паныд мунысьöс". 44 Ме шуа тiянлы: радейтöй тiянлы паныд мунысьясöс, бурсиöй тiянöс ёрысьясöс, бурсö вöчöй тiянöс мустöмтысьяслы, кевмысьöй тiянöс öтдортысьяс да вöтлысьяс вöсна. 45 Сэки лоанныд енэжвыв Батьныдлы ныв-пиöн. Сiйö тшöктö шондiыслы öтмоза шонтыны лёк да бур йöзöс, сетö зэрсö веськыда да лёк нога олысьяслы. 46 Радейтанныд кö тiянöс радейтысьясöс, мыйысь удждонсö виччысянныд? Оз öмöй тадзи вöчны тшöтш вот перйысьяс? 47 Тi кö чолöмаланныд-сибöданныд сöмын вокъяснытö, тi öмöй бурджыка вöчанныд? Оз öмöй тадзи вöчны тшöтш ентöдтöмъяс? 48 Лоöй енэжвыв Батьныд моз тырвыйö бурöсь».