В первенствующей церкви премнози святии пастырие образ себе своим стадом представляюще, не причащахуся с еретики

Се колик ти облак, всякаго вероятия достойнейших свидетельств божественных отец, священными словесы, всячески возбраняющих православным христианом с еретики причащатися, предложих. хощеши ли да представлю ти и самех тех пастырей и учителей церковных, иже поелику словесы врученными себе от Христа Спаса словесныя овцы поучаху, да не питаются смертною пажитию, рекше, да не причащаются от еретик: потолику и самих себе живый образ представляху им, самем делом, самою вещию наказоваху, не причащающеся с еретики. Показуют сие церковнии истории. Сице бо повествуется, о святем Афанасии Велицем [Бароний, лето Господне 349; Феодорит книга 2, глава 8; Созомен книга 3, глава 19]: [Святыи Афанасии Великии, егда возвращен бысть повелением Константина от изгнания на престол свой во Александрию. первее прииде во Антиохию, идеже кесарь Константии обиташе, и тамо зело радостно и честно прият бысть. Обитающ же Афанасии во Антиохии, не сообщашеся Леонтию епископу, а с теми иже евстафиане нарицахуся, си есть с православными, по оном изгнанном епископе своем, сирыми в собрании домовном пребываше. Ибо церкви вся арианами отъяты бяху]. Подобне преподобный Максим Исповедник гнушаяся причащения еретиков единоволников, не причащашеся с ними, о нем же повествует, в житии его сице [минея четия генваря, в 21 день]: [Вопросиша преподобнаго, Троил патрикии, и Сергии евфрат царския трапезы началник, не приобщаешилися констянтинополскому фрону? глаголя святыи: не приобщаюся. (ниже) глаголаша ему: что сотвориши, егда римляне соединятся византяном? Ибо вчера приидоша из Рима два апокрисарии, и утро в день недельныи будут причащатися с патриархом пречистых таин. Отвеща: Аще и вся вселенная начнет с патриархом причащатися, аз не имам причаститися с ним. вем бо Духа Святаго чрез апостола Павла, и аггелов анафеме предающаго, аще бы инако благовестили новое что вносяще. (выше) глагола Феодосии: хощет царь и патриарх чрез нас уведати от тебе. чесо ради не приобщаешися с престолом констянтинополским? глагола Максим: весте сотворшаяся новшества, от шестаго индикта, мимошедшаго круга, яже начашася от Александрии, чрез надписание, Киром бывшим тамо патриархом, девяти главизн приятых, и утвержденных от престола констянтинопольскаго. и иная пременения, и приложения, синодове святых ущербления, сотворенная от первоседателей византийския церкве Сергия и Пирра, и Павла, которая новшества, всем церквам суть сведома. Тоея ради вины не сообщаются, раб ваш констянтинополстей церкве. да возмутся от церкве соблазны положенныя предреченными мужи. да возмутся с положившими я. и претыкание от стези да отметнется, и вы гладким путем евангелия, от всякия ереси очищенныя шествуйте, и егда обрящу церковь констянтинопольскую тако, якоже прежде бе, тогда и аз обрящуся в ней, якоже бех прежде, и пойду ко освящению тоя без всякаго увещания человеческаго. А доколеже в ней еретическия соблазны, и соблазнители архиереи будут, дотоль никаковое мя увещает слово, или дело, да бых когда им како приобщился].

Но и блаженная двоица Феодор и Феофан Начертанная, колика гнушающеся еретическаго причащения, самем делом, самою вещию научаета, не причащатися от еретиков, слыши [минея четия декабря в 27 день]: [Представлены бо быша некогда епарху. он же глаголаше лаская их: единою точию причаститеся с нами. и отпущу вы, да пойдета аможе хощете. блаженныи же Феодор возсмеявся, рече: Подобне глаголше господине епарше, егда бы кто кого молил, глаголя: Ничтоже от тебе прошу, точию да единою отсеку главу твою, и потом идеши аможе хощеши. Веждь убо яко хотящему нас увещати к вашему общению, удобнее есть превратити небо и землю, да та будет горе, оно же низу, неже нас от благочестия нашего отвратити].

Сим всем согласно, и блаженный Агапит папа Римский, зело гнушаяся сквернаго еретическаго причащения, не токмо не причащашеся с еретики но и сосуды, яже они прикосновением своим оскверниша, освяти паки. Сице бо о нем споведует Бароний, лета Господня 536 [лист 619, на обор.; Либерат, глава 22] [Анфима папа отметает. Никифор книга 17, глава 12; Анастасий баблиотикарь о Агапите]: [Пришед в Констянтинополь Агапит папа, послан сущь от Феодота короля Готфскаго, обладавшаго тогда Римом, мира просити у царя Иустиниана, сия лица, яже к нему кесарь чести ради посылаше. Благодарно приемляше, Анфиму же патриарху не сообщашеся, иже бе еретик евтихианин. егда же Агапита первейшии кесарстии сановницы понуждаху спрошением, дабы Анфима в сообщение принял, отвеща им, невозможно сему быти, дондеже исповедание веры своя напишет, и на свое епископство в Трапезонт возвратится. Анфима же низложив без собора, хотя ему милосердие показати даде ему власть возвратитися на епископство трапезонтское, аще бы отреклся ереси. А на место его Мину православна суща посвятити изволи. Обретается в книгохранилнице римской ватиканской и сие, яко Агапит отверг Анфима, вся сосуды церковныя и утвари, яже досякновением еретическим осквернишася, паки освяти и обнови. Тако еретиками церковь гнушашеся]. до зде Бароний.

Зриши ли каковии церковнии пастырие и учителие, якоже, словесы научаху врученныя себе словесныя овцы сыны церковныя, тако и самою вещию самем делом, образ себе представляху им, не приемлюще еретическаго причащения, да некако причастившеся причащения их, будут и во оном веце сопричастницы безконечныя муце, ждущей еретик.